---

Ի վեցերորդ ժամուն ժողովեսցին յեկեղեցին, ծածկեսցեն զսեղանն եւ ասասցեն զմնացեալ Ողորմեայսն:


Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Օրհնեալ Հայր Սուրբ՝ Աստուած ճշմարիտ. ամէն:

ՍԱՂՄՈՍ Ծ
Ողորմեա՛ ինձ, Աստուա՛ծ, ըստ մեծի ողորմութեան Քում, ըստ բազում գթութեան Քում քաւեա՛ զանօրէնութիւնս իմ:
Առաւե՛լ լուա զիս յանօրէնութենէ իմմէ եւ ի մեղաց իմոց սո՛ւրբ արա զիս:
Զանօրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ:
Քեզ միայն մեղայ, Տէ՛ր, եւ չար առաջի Քո արարի,
Որպէս արդար եղիցիս ի բանս Քո եւ յաղթող ի դատել Քեզ:
Անօրէնութեամբ յղացաւ եւ ի մեղս ծնաւ զիս մայր իմ:
Դու, Տէ՛ր, զճշմարտութիւն սիրեցեր, զանյայտս եւ զծածկեալս իմաստութեամբ Քով յայտնեցեր ինձ:
Ցօղեա՛ յիս մշտկաւ, եւ սուրբ եղէց, լուա՛, եւ քան զձիւն սպիտակ եղէց:
Լսելի՛ արա ինձ զցնծութիւն եւ զուրախութիւն, եւ ցնծասցեն ոսկերք իմ տառապեալք:
Դարձո՛ զերեսս Քո ի մեղաց իմոց եւ զամենայն անօրէնութիւնս իմ քաւեա՛ յինէն:
Սիրտ սուրբ հաստատեա՛ յիս, Աստուա՛ծ, եւ հոգի ուղիղ նորոգեա՛ ի փորի իմում:
Մի՛ ընկենուր զիս, Տէ՛ր, յերեսաց Քոց եւ զՀոգի Քո Սուրբ մի՛ հաներ յինէն:
Տո՛ւր ինձ ցնծութիւն փրկութեան Քո եւ հոգւով պետութեան Քո հաստատեա՛ զիս:
Ուսուցից անօրինաց զճանապարհս Քո, եւ ամպարիշտք առ Քեզ դարձցին:
Փրկեա՛ զիս յարենէ, Աստուա՛ծ, Աստուա՛ծ փրկութեան իմոյ. ցնծասցէ լեզու իմ յարդարութեան Քում:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Թէ կամեցեալ էիր, պատարագս մատուցանէաք, բայց Դու ընդ ողջակէզս իսկ ոչ հաճեցար:
Պատարագ Աստուծոյ՝ հոգի խոնարհ. զսիրտ սուրբ եւ զհոգի խոնարհ Աստուած ոչ արհամարհէ:
Բարի՛ արա, Տէ՛ր, կամօք Քովք Սիոնի, եւ շինեսցին պարիսպքն Երուսաղեմի:
Յայնժամ հաճեսցիս ընդ պատարագս արդարութեան, ուխտից պատարագս հանցեն ի սեղան Քո զուարակս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Յամենայն ժամու աղաչանք իմ այս են. ի մեղաց իմոց սո՛ւրբ արա զիս, Տէ՛ր, եւ յօտարէն պահեա՛ զծառայս Քո, մարդասէ՛ր Տէր:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Վասն հիւանդաց եւ ամենայն վշտացելոց աղաչեսցուք զՓրկիչն մեր Քրիստոս, զի ողորմեսցի ըստ մեծի ողորմութեան Իւրում եւ բժշկեսցէ զախտս եւ զհիւանդութիւնս հոգւոց եւ մարմնոց ծառայից Իւրոց եւ կատարեալ առողջութեամբ հասուսցէ զամենեսեան ի մշտնջենաւոր եւ յանախտ կեանս: Որ առաքեցաւ ի Հօրէ ի բժշկութիւն ազգի մարդկան Միածին Որդին Աստուծոյ՝ Տէր մեր եւ Փրկիչ Յիսուս Քրիստոս. կեցո՛ եւ ողորմեա՛:

ԱՂՕԹՔ
Փարատեա՛ զցաւս եւ բժշկեա՛ զհիւանդութիւնս ի ժողովրդենէ Քումմէ, Տէր Աստուա՛ծ մեր, եւ շնորհեա՛ ամենեցուն զկատարեալ առողջութիւն նշանաւ ամենայաղթ խաչիւ Քով, որով բարձեր զտկարութիւն ազգի մարդկան եւ դատապարտեցեր զթշնամին կենաց եւ փրկութեան մերոյ: Դու ես կեանք մեր եւ փրկութիւն, բարերա՛ր եւ բազումողո՛րմ Աստուած, որ միայն կարող ես թողուլ զմեղս եւ մերժել զախտս եւ զհիւանդութիւնս ի մէնջ, Որում յայտնի են պէտք կարեաց մերոց: Պարգեւի՛չդ բարեաց, պարգեւեա՛ զառատ ողորմութիւն Քո ի վերայ արարածոց Քոց ըստ իւրաքանչիւր պիտոյից, յորոց հանապազ փառաւորեալ գովի Ամենասուրբ Երորդութիւնդ այժմ եւ միշտ եւ յաւիտեանս յաւիտենից. ամէն:

Ի Սարկաւագ վարդապետէն ասացեալ
Յիշեա՛, Տէ՛ր, զպաշտօնեայս Քո, զծնողսն մեր, զվարդապետս, զեղբարս, զընկերս, զկերակրողս, զուխտաւորս, զճանապարհորդս, զհանգուցիչս, զվաստակաւորս, զխոստովանողս, զապաշխարողս, զգերիս, զհիւանդս, զնեղեալս, զիշխանս, զչարարարս, զբարերարս, զթշնամիս, զատելիս եւ որք պատուիրեցին մեզ հաւատով:

Յիշեա՛, Տէ՛ր, եւ ողորմեա՛:

Բարերար եւ բազումողո՛րմ Աստուած, Քո անմոռաց գիտութեամբդ եւ անբաւ մարդասիրութեամբդ յիշեա՛ զամենայն հաւատացեալս ի Քեզ եւ ողորմեա՛ ամենեցուն: Օգնեա՛ եւ փրկեա՛ յիւրաքանչիւր վտանգից եւ ի փորձութեանց: Արժանաւորեա՛ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Խ
Երանի՜ որ խորհի զաղքատն եւ զտնանկն. յաւուր չարի փրկէ զնա Տէր:
Տէր փրկէ զնա եւ կեցուցանէ, երանելի առնէ զնա ի վերայ երկրի եւ ոչ մատնէ զնա ի ձեռս թշնամեաց իւրոց:
Տէր օգնական է նմա ի մահիճս ցաւոց իւրոց, զամենայն անկողինս նորա դարձուցանէ ի հիւանդութենէ նորա:
Ես ասացի. «Տէ՛ր, ողորմեա՛ ինձ, բժշկեա՛ զանձն իմ, ես մեղայ Քեզ»:

ՍԱՂՄՈՍ Ղ
Որ բնակեալն է յօգնութիւն Բարձրելոյն, ընդ հովանեաւ Աստուծոյ յերկինս հանգիցէ:
Ասասցէ Տեառն. ընդունող իմ ես, ապաւէ՛ն իմ Աստուած, եւ ես յուսամ ի Նա:
Նա փրկեսցէ զիս յորոգայթէ որսողին եւ ի բանից խռովութենէ:
Ի թիկնամէջս Իւր ընկալցի զքեզ, ի հովանի թեւոց Նորա յուսասցիս:
Որպէս զէն շուրջ եղիցի զքեւ ճշմարտութիւն Նորա:
Ոչ երկիցես դու յերկիւղէ գիշերի եւ ոչ ի նետէ, որ թռչի ի տուէ:
Յիրէ, որ շրջի ի խաւարի, ի գայթակղութենէ դիւին ի հասարակ աւուր:
Անկցին ի կողմանէ քումմէ հազարք, եւ բիւրք` ընդ աջմէ քումմէ, եւ առ քեզ ինչ ոչ մերձեսցին:
Բայց միայն աչօք քովք հայեսցիս դու եւ զհատուցումն մեղաւորաց տեսցես, զի Դու, Տէ՛ր, յոյս իմ ես:
ԶԲարձրեալն արարեր քեզ ապաւէն. ոչ հասցեն առ քեզ չարք, եւ տանջանք մի՛ մերձեսցին ի յարկս քո:
Հրեշտակաց Իւրոց պատուիրեալ է վասն քո ի պահել զքեզ յամենայն ճանապարհս քո:
Ի բազուկս իւրեանց ընկալցին զքեզ, զի մի՛ երբեք հարցես զքարի զոտն քո:
Ի վերայ իժից եւ քարբից գնասցես դու, առ ոտն կոխեսցես զառիւծն եւ զվիշապն:
Քանզի յԻս յուսացաւ, եւ փրկեցից զնա, հովանի եղէց նմա, զի ծանեաւ զանուն Իմ:
Կարդասցէ առ Իս, եւ Ես լուայց նմա եւ առ նմա եղէց ի նեղութեան:
Փրկեցից, փառաւոր արարից զնա, երկայն աւուրբք լցուցից եւ ցուցից նմա զփրկութիւն Իմ:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Եւ եւս խաղաղութեան զՏէր աղաչեսցուք:
Խնդրեսցուք հաւատով ի Հօրէ վասն քաւութեան մեղաց եւ թողութեան յանցանաց, փրկելոյ զմեզ ի վշտաց եւ ի նեղութեանց, իջանելոյ ի վերայ մեր ողորմութեան եւ գթութեան Տեառն Աստուծոյ ամենակալին. կեցո՛ եւ ողորմեա՛:

ԱՂՕԹՔ
Հա՛յր գթութեանց եւ Աստուա՛ծ ամենայն մխիթարութեանց, որ մխիթարես զմեզ յամենայն նեղութեան մերում. լո՛ւր եւ այժմ ձայնի պաղատանաց ծառայից Քոց՝ ընդունելով զաղաչանս մեր. անցո՛ ի մէնջ զցասումն պատուհասի յանցանաց մերոց բարերարութեամբ Քով: Ներեա՛ եւ լո՛ւր մեզ, քաւեա՛ եւ թո՛ղ զմեղս մեր, արժանաւորեա՛ գոհութեամբ փառաւորել զՔեզ ընդ Որդւոյ եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Օրհնեալ Որդիդ Սուրբ՝ Աստուած ճշմարիտ. ամէն:

ՍԱՂՄՈՍ Ծ
Ողորմեա՛ ինձ, Աստուա՛ծ, ըստ մեծի ողորմութեան Քում, ըստ բազում գթութեան Քում քաւեա՛ զանօրէնութիւնս իմ:
Առաւե՛լ լուա զիս յանօրէնութենէ իմմէ եւ ի մեղաց իմոց սո՛ւրբ արա զիս:
Զանօրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ:
Քեզ միայն մեղայ, Տէ՛ր, եւ չար առաջի Քո արարի,
Որպէս արդար եղիցիս ի բանս Քո եւ յաղթող ի դատել Քեզ:
Անօրէնութեամբ յղացաւ եւ ի մեղս ծնաւ զիս մայր իմ:
Դու, Տէ՛ր, զճշմարտութիւն սիրեցեր, զանյայտս եւ զծածկեալս իմաստութեամբ Քով յայտնեցեր ինձ:
Ցօղեա՛ յիս մշտկաւ, եւ սուրբ եղէց, լուա՛, եւ քան զձիւն սպիտակ եղէց:
Լսելի՛ արա ինձ զցնծութիւն եւ զուրախութիւն, եւ ցնծասցեն ոսկերք իմ տառապեալք:
Դարձո՛ զերեսս Քո ի մեղաց իմոց եւ զամենայն անօրէնութիւնս իմ քաւեա՛ յինէն:
Սիրտ սուրբ հաստատեա՛ յիս, Աստուա՛ծ, եւ հոգի ուղիղ նորոգեա՛ ի փորի իմում:
Մի՛ ընկենուր զիս, Տէ՛ր, յերեսաց Քոց եւ զՀոգի Քո Սուրբ մի՛ հաներ յինէն:
Տո՛ւր ինձ ցնծութիւն փրկութեան Քո եւ հոգւով պետութեան Քո հաստատեա՛ զիս:
Ուսուցից անօրինաց զճանապարհս Քո, եւ ամպարիշտք առ Քեզ դարձցին:
Փրկեա՛ զիս յարենէ, Աստուա՛ծ, Աստուա՛ծ փրկութեան իմոյ. ցնծասցէ լեզու իմ յարդարութեան Քում:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Թէ կամեցեալ էիր, պատարագս մատուցանէաք, բայց Դու ընդ ողջակէզս իսկ ոչ հաճեցար:
Պատարագ Աստուծոյ՝ հոգի խոնարհ. զսիրտ սուրբ եւ զհոգի խոնարհ Աստուած ոչ արհամարհէ:
Բարի՛ արա, Տէ՛ր, կամօք Քովք Սիոնի, եւ շինեսցին պարիսպքն Երուսաղեմի:
Յայնժամ հաճեսցիս ընդ պատարագս արդարութեան, ուխտից պատարագս հանցեն ի սեղան Քո զուարակս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Յամենայն ժամու աղաչանք իմ այս են. ի մեղաց իմոց սո՛ւրբ արա զիս, Տէ՛ր, եւ յօտարէն պահեա՛ զծառայս Քո, մարդասէ՛ր Տէր:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Աղաչեսցուք զկենսատու Փրկիչն մեր Քրիստոս, որ կամաւոր խաչելութեամբն Իւրով զարարածս փրկեաց եւ հեղմամբ արեան Իւրոյ զթողութիւն շնորհեաց յուսացելոց Իւրոց:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Անկեալ առաջի Քո, բարերար եւ բազումողո՛րմ Աստուած, աղաչեմք ամենայն սրտիւք մերովք եւ խնդրեմք զգթութիւն ի Քէն, որպէս խոստացար ծառայից Քոց եւ ասացեր. «Զամենայն, զոր ինչ խնդրիցէք հաւատով յանուն Որդւոյ ի Հօրէ, տացի ձեզ»: Շնորհեա՛ եւ այժմ հաւատացելոցս ի Քեզ եւ կատարեա՛ ի բարի զխնդրուածս մեր, զի ի Քեզ եմք ապաւինեալ: Եւ Քո առատ ողորմութեամբդ մխիթարեա՛ զմեզ ի կեանս յայսոսիկ եւ առաջնորդեալ հասո՛ յանճառ երկնից արքայութիւնդ ի փառաբանութիւն եւ ի պատիւ Ամենասուրբ Երրորդութեանդ այժմ եւ միշտ եւ յաւիտեանս յաւիտենից. ամէն:

Ի Սարկաւագ վարդապետէն ասացեալ
Յիշեա՛, Տէ՛ր, զպաշտօնեայս Քո, զծնողսն մեր, զվարդապետս, զեղբարս, զընկերս, զկերակրողս, զուխտաւորս, զճանապարհորդս, զհանգուցիչս, զվաստակաւորս, զխոստովանողս, զապաշխարողս, զգերիս, զհիւանդս, զնեղեալս, զիշխանս, զչարարարս, զբարերարս, զթշնամիս, զատելիս եւ որք պատուիրեցին մեզ հաւատով:

Յիշեա՛, Տէ՛ր, եւ ողորմեա՛:

Բարերար եւ բազումողո՛րմ Աստուած, Քո անմոռաց գիտութեամբդ եւ անբաւ մարդասիրութեամբդ յիշեա՛ զամենայն հաւատացեալս ի Քեզ եւ ողորմեա՛ ամենեցուն: Օգնեա՛ եւ փրկեա՛ յիւրաքանչիւր վտանգից եւ ի փորձութեանց: Արժանաւորեա՛ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԺԴ
Սիրեցի, զի լուիցէ Տէր զձայն աղօթից իմոց:
Զի խոնարհեցոյց զունկն Իւր առ իս, եւ ես յաւուրս իմ կարդացի առ Նա:
Շրջեցան զինեւ երկունք մահու, եւ վիշտք դժոխոց գտին զիս:
Զնեղութիւն եւ զանձկութիւն գտի, եւ զանուն Տեառն կարդացի:
Ո՛ Տէր, փրկեա՛ զանձն իմ. ողորմած եւ արդար է Տէր Աստուած մեր:
Ողորմի եւ պահէ զտղայս Տէր. ես խոնարհ եղէ, եւ Տէր կեցոյց զիս:
Դա՛րձ, ա՛նձն իմ, ի հանգիստ քո, զի Տէր օգնեաց քեզ:
Փրկեաց զանձն իմ ի մահուանէ, զաչս իմ՝ յարտասուաց եւ զոտս իմ՝ ի գայթակղութենէ:
Հաճոյ եղէց առաջի Տեառն յերկրին կենդանեաց:

ՍԱՂՄՈՍ ՃԺԵ
Հաւատացի, զոր եւ խօսեցայ, եւ ես խոնարհ եղէ յոյժ:
Ես ասացի ի զարմանալ իմում, թէ ամենայն մարդ սուտ է:
Զի՞նչ տաց տրիտուր Տեառն ընդ ամենայնի, զոր եւ ետ ինձ:
Զբաժակ փրկութեան ընկալայց եւ զանուն Տեառն կարդացից:
Զաղօթս իմ Տեառն տաց առաջի ամենայն ժողովրդեան Նորա:
Պատուական է առաջի Տեառն մահ սրբոց Իւրոց:
Ո՜ Տէր, ես ծառայ Քո եմ, ծառայ եւ որդի աղախնոյ Քո:
Հատեր զկապանս իմ. Քեզ մատուցից պատարագ օրհնութեան եւ զանուն Տեառն կարդացից:
Զաղօթս իմ Տեառն տաց առաջի ամենայն ժողովրդեան Նորա, ի գաւիթս տան Տեառն եւ ի մէջ քո, Երուսաղէ՛մ:

ՍԱՂՄՈՍ ՃԺԶ
Օրհնեցէ՛ք զՏէր, ամենա՛յն ազինք, գովեցէ՛ք զՆա, ամենա՛յն ժողովուրդք:
Զօրասցի ողորմութիւն Նորա ի վերայ մեր, եւ ճշմարտութիւն Տեառն մնասցէ յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ ՀԱՆԳՍՏԵԱՆ

(Ողր. Հանգստեան գկ.)

Յանսկզբնական ծոցոյ Հօր խոնարհեալ Բա՛նդ, մարմնացար ի Կուսէն վասն փրկութեան մերոյ. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Անոխակալ քաղցրութեամբ, Որդի՛ Աստուծոյ, հաճեցար բառնալ զմեղս աշխարհի Քո խաչելութեամբն. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Կամաւորական մահուամբ Քո լուծեր զերկունս մահու եւ արժանի արարեր թողութեան յանցանաց քաւիչ Քո արեամբ. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Որ փոխանակ մեղաւորաց զմեռանիլ յանձն առեր, իջանելով ի դժոխս՝ փրկեցեր ի մեղսասէր բանտէն զգերեալսն, աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Բարեբանեմք զանչափ Քո զմարդասիրութիւնդ, որ երեքօրեայ յարուցեալ՝ զկենդանութիւն պարգեւեցեր աշխարհի. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։

(Աւագ օրհ. գկ. Է., 3-րդ տուն)

Մաքուր եւ անբիծ Կո՛յս յետ ծննդեան, որ մարմնով ծնար զԱրձակողն ի կապից մահու, բարեխօ՛ս լեր վասն անձանց մերոց փրկել ի սպառնալեաց գեհենոյն:

ՄԱՂԹԱՆՔ
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն եւ մեզ՝ մեղաւորացս, շնորհեա՛ զթողութիւն յանցանաց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

ՄԱՂԹԱՆՔ
Զսաղմոսերգութիւնս եւ զաղաչանս ընկալցի մարդասէրն Աստուած ի հաճոյս բարերար կամաց Իւրոց, մեր մեղացն եւ մեր բազում յանցանացն թողութիւն շնորհեսցէ, ի չարեաց փրկեսցէ, ի մեղաց պահեսցէ. եւ Նմա՝ փա՜ռք յաւիտեանս. ամէն:

Օրհնեալ թագաւորութիւն Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Ես առ Աստուած կարդացի, եւ Նա լուաւ ինձ յերեկոյս, ի վաղորդայն եւ ի հասարակ աւուր:
Սպասէի Աստուծոյ իմոյ եւ ակն ունէի Կենարարին, որ փրկէ զծառայս Իւր եւ կեցուցանէ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՁԵ
Խոնարհեցո՛, Տէ՛ր, զունկն Քո եւ լո՛ւր ինձ, զի աղքատ եւ տնանկ եմ ես:
Պահեա՛ զանձն իմ սուրբ, Տէ՛ր. փրկեա՛ զծառայս Քո, Աստուա՛ծ իմ, որ ի Քեզ յուսացայ:
Ողորմեա՛ ինձ, Տէ՛ր, զի առ Քեզ աղաղակեցի զօրհանապազ. ուրա՛խ արա զանձն ծառայի Քո, զի առ Քեզ, Տէ՛ր, համբարձի զանձն իմ.
Զի Դու, Տէ՛ր, քաղցր եւ ուղիղ ես, բազումողորմ առ ամենեսեան, որ կարդան առ Քեզ:
Ո՛ւնկն դիր, Տէ՛ր, աղօթից իմոց եւ նայեա՛ց ի ձայն խնդրուածաց իմոց:
Յաւուր նեղութեան իմոյ կարդացի առ Քեզ, եւ լուար ինձ:
Ոչ ոք է նման Քեզ յաստուածս, Տէ՛ր, եւ ոչ ոք է որպէս զգործս Քո:
Զամենայն ազգս, զոր արարեր, եկեսցեն եւ երկիր պագցեն առաջի Քո եւ փառաւոր արասցեն զանուն Քո յաւիտեան:
Մեծ ես Դու, Տէ՛ր, եւ առնես սքանչելիս եւ Դու միայն ես Աստուած:
Առաջնորդեա՛ ինձ ի ճանապարհի Քում, եւ գնացից ի ճշմարտութեան Քում, եւ ուրախ եղիցի սիրտ իմ երկնչել յանուանէ Քումմէ:
Խոստովան եղէց առ Քեզ, Տէ՛ր Աստուած իմ, բոլորով սրտիւ իմով, փառաւոր արարից զանուն Քո յաւիտեան:
Մեծ եղեւ ի վերայ իմ ողորմութիւն Քո, Տէ՛ր, եւ փրկեցեր զանձն իմ ի դժոխոց ներքնոց:
Աստուա՛ծ, անօրէնք յարեան ի վերայ իմ, եւ ժողովք հզօրաց խնդրեցին զանձն իմ եւ ոչ համարեցան զՔեզ Աստուած առաջի իւրեանց:
Այլ Դու, Տէ՛ր Աստուած իմ, գթած ես եւ ողորմած, երկայնամիտ, բազումողորմ եւ ճշմարիտ. նայեա՛ց առ իս եւ ողորմեա՛ ինձ:
Տո՛ւր զօրութիւն ծառայի Քո, կեցո՛ զորդի աղախնոյ Քո եւ արա՛ առ իս նշան բարութեան:
Տեսցեն ատելիք իմ եւ ամաչեսցեն, զի Դու, Տէ՛ր, օգնեցեր ինձ եւ մխիթարեցեր զիս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Փա՜ռք Քեզ, Աստուա՛ծ, փա՜ռք Քեզ. յաղագս ամենայնի, Տէ՛ր, փա՜ռք Քեզ:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԼԹ
Ապրեցո՛ զիս, Տէ՛ր, ի մարդոյ չարէ. յառնէ անիրաւէ փրկեա՛ զիս:
Խորհեցան զանօրէնութիւն ի սիրտս իւրեանց, զօր ամենայն պատրաստեցան ի պատերազմ:
Սրեցին զլեզուս իւրեանց որպէս զօձի, եւ թոյնք իժից ի ներքոյ շրթանց նոցա:
Պահեա՛ զիս, Տէ՛ր, ի ձեռաց մեղաւորի. եւ ի մարդոյ չարէ փրկեա՛ զիս:
Խորհեցան խափանել զգնացս իմ, թաքուցին ամբարտաւանք որոգայթ ինձ:
Լարս ձգեցին որոգայթ ոտից իմոց, շուրջ զշաւղօք իմովք եդին ինձ զգայթակղութիւն:
Ասացի. «Տէր Աստուած իմ ես Դու. ո՛ւնկն դիր, Տէ՛ր, ձայնի աղօթից իմոց»:
Տէ՛ր, Տէ՛ր, զօրութի՛ւն փրկութեան իմոյ, հովանի՛ գլխոյ իմոյ յաւուր պատերազմի.
Մի՛ մատներ զիս, Տէ՛ր, ի ցանկութիւն մեղաւորաց, ոյք խորհեցան վասն իմ. մի՛ ընդ վայր հարկաներ զիս:
Զի մի՛ երբեք բարձրասցին, եւ խորհուրդք նոցա մի՛ կատարեսցին. վախճան կատարածի նոցա՝ վաստակ շրթանց իւրեանց ծածկեսցէ զնոսա:
Արկցես ի վերայ նոցա կայծակունս հրոյ եւ կործանեսցես զնոսա. ի տառապանաց մի՛ կարասցեն կեալ:
Մարդոյ լեզուանւոյ մի՛ յաջողեսցի ի վերայ երկրի, զայր մեղաւոր չարիք իւր որսասցեն ի կորուստ:
Ծանեայ, զի առնես, Տէ՛ր, դատաստան աղքատի եւ իրաւունս տնանկի:
Արդարք գոհասցին զանուանէ Քումմէ, բնակեսցեն ուղիղք առաջի երեսաց Քոց:

ՍԱՂՄՈՍ ՃԽ
Տէ՛ր, կարդացի առ Քեզ, եւ լո՛ւր ինձ. նայեա՛ ի ձայն աղօթից իմոց ի կարդալ իմում առ Քեզ:
Ուղիղ եղիցին աղօթք իմ որպէս խունկ առաջի Քո, Տէ՛ր, համբարձումն ձեռաց իմոց՝ պատարագ երեկոյի:
Դի՛ր, Տէ՛ր, պահապան բերանոյ իմոյ եւ դուռն ամուր՝ շրթանց իմոց, զի մի՛ խոտորեսցի սիրտ իմ բանիւ չարութեան:
Ի պատճառել զպատճառս մեղաց ընդ մարդս, ոյք գործեն զանօրէնութիւն. եւ ոչ եղէց կցորդ ընտրելոց նոցա:
Խրատեսցէ զիս արդարն ողորմութեամբ եւ յանդիման արասցէ. իւղ մեղաւորի մի՛ օծցէ զգլուխ իմ, եւ աղօթք իմ ի կամս նորա:
Արգելան մերձ առ վիմին դատաւորք նոցա. լուիցեն բանից իմոց եւ քաղցրասցին:
Որպէս թանձրութիւն հողոյ, զի սփռեալ է ի վերայ երկրի, ցրուեսցին ոսկերք նոցա մերձ ի դժոխս:
Առ Քեզ, Տէ՛ր, Տէ՛ր, են աչք իմ. ի Քեզ յուսացայ, Տէ՛ր. մի՛ հաներ զհոգի յինէն:
Պահեա՛ զիս յորոգայթէ, որ թաքուցաւ ինձ, ի գայթակղութենէ գործողին զանօրէնութիւն:
Անկցին ի ցանցս նորա մեղաւորք. միայն եմ ես, մինչեւ անցից:

ՍԱՂՄՈՍ ՃԽԱ
Ձայնիւ իմով ես առ Տէր կարդացի, ձայնիւ իմով զՏէր աղաչեցի:
Սփռեցից առաջի Տեառն զաղօթս իմ եւ զնեղութիւնս իմ առաջի Նորա պատմեցից:
Ի նուաղել յինէն հոգւոյ իմոյ Դու, Տէ՛ր, ծանեար զշաւիղս իմ. ի ճանապարհ, յոր եւ գնայի, թաքուցաւ ինձ որոգայթ:
Հայէի յաջմէ եւ տեսանէի, եւ ոչ ոք էր, որ ճանաչէր զիս. կորեաւ յինէն փախուստ իմ, եւ ոչ գտաւ խնդրող անձին իմոյ:
Աղաղակեցի առ Քեզ, Տէ՛ր, եւ ասացի. «Դու ես յոյս եւ բաժին իմ յերկրին կենդանեաց»:
Նայեա՛, Տէ՛ր, յաղօթս իմ, զի ես խոնարհ եղէ յոյժ. ապրեցո՛ զիս ի հալածչաց իմոց, զի հզօր եղեն քան զիս:
Տէ՛ր, հա՛ն ի բանտէ զանձն իմ. գոհանամ զանուանէ Քումմէ:
Եւ Քեզ սպասեն արդարք, մինչեւ հատուսցես:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Ալէլուիա, ալէլուիա:

ՄԱՂԹԱՆՔ
Օրհնեալ Տէր, որ բնակեալդ ես ի բարձունս, եւ օրհնեալ են փառք մեծութեան Քո. որ հաստատեցեր զլուսաւորս ի բարձունս, ի յերկնից լոյս ծագեցեր ընդ ամենայն տիեզերս. արարեր զարեգակն լուսատու տուընջեան, զլուսինն եւ զաստեղս՝ լուսատու գիշերոյ, եւ զլոյս ճրագի: Դու ես լոյս գովելի, սուրբ եւ առաջին լոյսն. ի Քէն փախնու խաւարն, եւ զլոյս Քո կենդանի, Տէ՛ր, ծագեա՛ ի սիրտս մեր: Եւ մեք միաբան ասասցուք. օրհնեալ է անուն սուրբ փառաց Քոց. եւ Քեզ երգեմք զօրհնութիւն եւ զփառս Հօր եւ Որդւոյ եւ Հոգւոյդ Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Հասեալքս ի ժամ երեկոյիս ամենեքեան համբառնալով զձեռս մեր՝ փառաւորեմք զՔեզ, Տէր Աստուա՛ծ մեր, որ շնորհեցեր մեզ զտիւս խաղաղութեամբ անցուցանել եւ հասանիլ ի ժամ երեկոյիս: Արժանաւորեա՛ զմեզ, Տէ՛ր, սուրբ սրտիւ, հրեշտակային երգով գոհաբանութիւն մատուցանել Տեառն Աստուծոյ ամենակալիդ. կեցո՛ եւ ողորմեա՛: Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՄԱՂԹԱՆՔ
Հասեալքս ի ժամ երեկոյիս ամենեքեան անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՄԵՍԵԴԻ
Լուացից սրբութեամբ զձեռս իմ եւ շուրջ եղէց զսեղանով Քո, Տէ՛ր:
Տէ՛ր, սիրեցի զվայելչութիւն տան Քո եւ զտեղի յարկի փառաց Քոց:




ՍԱՂՄՈՍ ԾԴ
Կցորդ. Կակուղ էին բանք նոցա քան զձէթ, եւ ինքեանք էին որպէս սլաք:
Փոխ. Ո՛ւնկն դիր, Աստուա՛ծ, աղօթից իմոց եւ մի՛ անտես առներ զխնդրուածս իմ:
Նայեա՛ց առ իս եւ լո՛ւր ինձ, զի տրտմեցայ ես ի ձանձրանալ իմում եւ խռովեցայ:
Ի ձայնէ թշնամւոյն եւ ի նեղել մեղաւորի խոտորեցան յիս անիրաւութեամբ, բարկութեամբ ոխս պահէին ինձ:
Սիրտ իմ խռովեցաւ յիս, եւ երկիւղ մահու անկաւ ի վերայ իմ:
Ահ եւ դողումն եկն ի վերայ իմ, եւ ծածկեաց զիս խաւար:
Ասէի. «Տա՜յր ոք ինձ թեւս որպէս զաղաւնւոյ, զի թռչէի, վերանայի, հեռացեալ դադարէի յանապատի»:
Ակն ունէի Աստուծոյ, որ փրկէր զիս ի կարճմտութենէ ի զայրանալոյ եւ ի մրրկեալ նեղսրտութենէ:
Ընկլո՛, Տէ՛ր, եւ բաժանեա՛ զլեզուս նոցա, զի տեսի զանօրէնութիւն եւ զհակառակութիւն ի քաղաքի:
Ի տուէ եւ ի գիշերի շուրջ եղեն զպարսպօք նորա անօրէնութիւնք, չարիք եւ մեղք են ի մէջ նորա, եւ ոչ պակասեաց ի հրապարակաց նորա վաշխ եւ նենգութիւն:
Զի թէ թշնամւոյն նախատեալ էր, համբերէի արդեօք, կամ՝ ատելւոյն մեծաբանեալ էր ի վերայ իմ, թաքչէի արդեօք ի նմանէ:
Իսկ դու, մա՛րդ, հաւասար իմ, առաջնորդ իմ եւ ծանօթ իմ:
Ապաքէն ի նոյն քաղցրացուցեր ինձ եւ քեզ կերակուր, զի գնայաք միաբանութեամբ ի տուն Աստուծոյ:
Եկեսցէ մահ ի վերայ նոցա, եւ կենդանւոյն իջցեն ի դժոխս, զի չարութիւն է ի բնակութեան նոցա եւ ի մէջ նոցա:
Ես առ Աստուած կարդացի, եւ Տէր լուաւ ինձ յերեկոյս, ի վաղորդայն եւ ի հասարակ աւուր:
Պատմեցի եւ ասացի, եւ լուիցէ ձայնի իմում. փրկեսցէ խաղաղութեամբ զանձն իմ ի մերձաւորաց իմոց, զի կարեօք հասին ի վերայ իմ:
Լուիցէ Աստուած եւ խոնարհ արասցէ զնոսա, որ յառաջն է քան զյաւիտեանս:
Զի ոչ գոյր նոցա փոխանակ, եւ ոչ երկեան յԱստուծոյ:
Ձգեաց զձեռն Իւր ի հատուցանել նոցա, եւ նոքա պղծեցին զօրէնս Նորա:
Բաժանեցան ի սրտմտութենէ երեսաց Նորա, եւ եհաս ի սիրտս նոցա:
Կակուղ էին բանք նոցա քան զձէթ, եւ ինքեանք էին որպէս սլաք:
Ընկեա՛ ի Տէր զհոգս քո, եւ Նա կերակրէ զքեզ եւ ոչ տայ յաւիտեան սասանութիւն արդարոյ:
Դու, Աստուա՛ծ, իջուսցես զնոսա ի գուբ ապականութեան, արք արիւնահեղք եւ նենգաւորք մի՛ հասարակեսցեն զաւուրս իւրեանց. այլ ես ի Քեզ, Տէ՛ր, յուսացայ:


Եւ, մինչ ընթեռնուն զԳիրքն, ելցէ պատարագիչն ի սեղանն եւ զգեստաւորեսցի. եւ քաղեսցէ զխորհուրդն մինչեւ ի «Հաւատամքն»:

ՔԱՐՈԶ
Եւ եւս խաղաղութեան զՏէր աղաչեսցուք:
Աղաչեսցուք զամենակալն Աստուած՝ զՀայր Տեառն մերոյ Յիսուսի Քրիստոսի, զԹագաւորն խաղաղութեան, յաղագս խաղաղութեան եւ վասն միայնոյ սուրբ կաթողիկէ եւ առաքելական Եկեղեցւոյ. զի զբազում ամս խաղաղութեամբ տացէ մեզ Տէր Աստուած մեր եւ զթագաւորս խաղաղարարս առաքեսցէ առ մեզ վասն մեծի սուրբ եւ ահաւոր անուան Իւրոյ: Զպետս գաւառաց, զզօրավարս, զզօրագլուխս, զժողովուրդս, զմուտս եւ զելս մեր խաղաղութեամբ պահեսցէ եւ զամենայն պատերազմունս թշնամւոյն խորտակեսցէ ի մէնջ: Տէրն ամենակալ կեցուսցէ եւ ողորմեսցի:
Զերեկս մերձեալ եւ զառաջիկայ գիշերս խաղաղութեամբ անցուցանել հաւատով՝ ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Լո՛ւր ձայնից մերոց, Տէր Աստուա՛ծ մեր, ընկա՛լ զաղաչանս մեր, զհամբարձումն ձեռաց մերոց եւ զբանս աղօթից՝ սրբելով զերեկոյի պատարագս մեր ի հոտ անուշից ի հաճոյս Քեզ պատրաստել: Յաւե՛լ ի մեզ, Տէ՛ր ամենակալ, զհաւատ, զյոյս, զսէր եւ զամենայն գործս առաքինութեան, որպէս զի ըստ կամաց Քոց բարեսիրաց, միշտ կրօնաւորեալք բարեպաշտութեամբ ի տուէ եւ ի գիշերի, արժանաւորք եղիցուք յաղագս անձանց մերոց փրկութեան եւ վասն հոգեւոր կենացդ աղաչել զՔեզ, Տէ՛ր, եւ գտանել ի Քէն զշնորհս եւ զողորմութիւն. եւ գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Քեզ երկիր պագանելով, Տէր Աստուա՛ծ մեր, գոհանամք զՔէն յաղագս խաղաղութեամբ անցուցանելոյ ի մէնջ զերկարութիւն տուընջեանս: Տո՛ւր մեզ, Տէ՛ր, աղաչեմք զՔեզ, զերեկս եւ զառաջիկայ գիշերս առանց մեղաց եւ առանց գայթակղութեան անցուցանել. հաստատուն կալ եւ մնալ ի հաւատ, ի յոյս, ի սէր եւ ի պատուիրանապահութեան Քո՝ խնդրելով զխաղաղութիւն ամենայն աշխարհի, եւ Եկեղեցւոյ Քում սրբոյ զհաստատութիւն, եւ անձանց մերոց զփրկութիւն: Որպէս զի ընդունելով ի Քէն զհայցուածս մեր՝ եւ զմեծ վայելչական փառաբանութիւն միշտ ի բարձունս առաքեսցուք ամենազօր տէրութեանդ, Քրիստոս Աստուա՛ծ մեր, այժմ եւ միշտ եւ յաւիտեանս յաւիտենից. ամէն:

ԵՐԵՔՍՐԲԵԱՆ
Սուրբ Աստուա՛ծ, սուրբ եւ հզօր, սուրբ եւ անմահ, որ եկիր եւ գալոց ես. ողորմեա՛ մեզ:
(Երիցս կրկնեա՛)

Փառաւորեալ եւ օրհնեալ, միշտ սուրբ Կոյս Աստուածածի՛ն Մարիամ, մա՛յր Քրիստոսի, մատո՛ զաղաչանս մեր Որդւոյ քո եւ Աստուծոյ մերոյ:

ՄԱՂԹԱՆՔ
Փրկել զմեզ ի փորձութենէ եւ յամենայն վտանգից մերոց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն լսելի լինելոյ Տեառն Աստուծոյ ձայնի աղաչանաց մերոց՝ բարեխօսութեամբ սուրբ Աստուածածնին, եւ իջանելոյ ի վերայ մեր ողորմութեան եւ գթութեան Տեառն Աստուծոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԻ
Համբարձի զաչս իմ ի լերինս, ուստի եկեսցէ ինձ օգնութիւն:
Օգնութիւն ինձ ի Տեառնէ եկեսցէ, որ արար զերկինս եւ զերկիր:
Մի՛ տար ի սասանութիւն զոտն քո, եւ մի՛ ննջեսցէ պահապան քո,
Որպէս ոչ ննջէ եւ ոչ ի քուն երթայ պահապանն Իսրայելի:
Տէր պահեսցէ զքեզ եւ Տէր ընկալցի աջով ձեռամբ Իւրով:
Արեգակն ի տուէ զքեզ մի՛ մեղիցէ, եւ մի՛ լուսինն՝ ի գիշերի:
Տէր պահեսցէ զքեզ յամենայն չարէ, պահեսցէ Տէր զանձն քո:
Տէր պահեսցէ զմուտ եւ զել քո յայսմ հետէ մինչեւ յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՀԱՄԲԱՐՁԻ» ՇԱՐԱԿԱՆ

(Մնկ. Աւագ Եշ. ակ.)

Այսօր կանգնեցաւ աւազան մկրտութեան ի թողութիւն մեղաց մերոց։
Այսօր Տէրն մեր լուանայր զոտս աշակերտացն եւ պատուիրէր՝ զայս ասելով. «Մի ոմն ի ձէնջ, եղբա՛րք, մատնելոց է զԻս ի մահ եւ որոշի յաշակերտացդ»։
Զայն լուեալ Պետրոսի՝ ակնարկէր առ Յովհաննէս՝ հարցանել, թէ՝ ո՞վ իցէ։
Բանն, զոր ասաց Յիսուս, տրտմեցոյց զԻւր զաշակերտսն, եւ խռովեցան ամենեքեան։

ՔԱՐՈԶ
Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ զՏէր աղաչեսցուք: Ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Հա՛յր գթած, բարեխնամող, արարիչ ամենայն արարածոց, ընկա՛լ զպաղատանս ծառայից Քոց ի ժամ երեկոյիս, որ առատդ ես առ ամենեսեան պարգեւօք բարերարութեան Քո: Ողորմեա՛, Տէ՛ր, ամենայն աշխարհի եւ Եկեղեցւոյ Քում սրբոյ, հիւանդաց, վշտացելոց, ճանապարհորդաց, նաւորդաց, խոստովանողաց, ապաշխարողաց եւ հոգւոցն հանգուցելոց: Զի Դու, Տէ՛ր ամենակալ, գիտես զպէտս մեր եւ զկարիս, առաւել քան զոր խնդրեմք եւ իմանամք. եւ Քեզ ընդ Որդւոյ եւ Ամենասրբոյ Հոգւոյդ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ԻԲ
Կցորդ. Պատրաստ արարեր առաջի իմ սեղան՝ ակն յանդիման նեղչաց իմոց:
Փոխ. Տէր հովուեսցէ զիս, եւ ինձ ինչ ոչ պակասեսցի:
Ի վայրի դալարւոջ՝ անդ բնակեցոյց զիս եւ առ ջուրս հանգստեան սնոյց զիս:
Դարձոյց զանձն իմ առ իս, առաջնորդեաց ինձ ի ճանապարհս արդարութեան վասն անուան Իւրոյ:
Թէպէտ եւ գնացից ես ի մէջ ստուերաց մահու, ոչ երկեայց ի չարէ, զի Դու, Տէ՛ր, ընդ իս ես:
Ցուպ Քո եւ գաւազան՝ նոքա մխիթարեսցեն զիս:
Պատրաստ արարեր առաջի իմ սեղան՝ ակն յանդիման նեղչաց իմոց:
Օծեր իւղով զգլուխ իմ, բաժակ Քո որպէս անապակ արբեցոյց զիս:
Ողորմութիւն Քո, Տէ՛ր, զհետ իմ եկեսցէ զամենայն աւուրս կենաց իմոց՝ բնակել ինձ ի տան Տեառն ընդ երկայն աւուրս:

Ելցեն դպիրքն զգեստաւորեալք, եկեսցեն առաջի սեղանոյն եւ ընթերցցին զԳիրքն:


Ալէլուիա, ալէլուիա: Պատրաստ արարեր առաջի իմ զսեղան՝ ակն յանդիման նեղչաց իմոց:


Ապա բացեն զսեղանն եւ ասեն զՀաւատամքն.

Փա՜ռք Քեզ, Տէր Աստուա՛ծ մեր:

ՀԱՆԳԱՆԱԿ ՆԻԿԻԱԿԱՆ

Հաւատամք ի Մի Աստուած՝ ի Հայրն ամենակալ, յԱրարիչն երկնի եւ երկրի, երեւելեաց եւ աներեւութից: Եւ ի Մի Տէր Յիսուս Քրիստոս՝ յՈրդին Աստուծոյ՝ ծնեալն յԱստուծոյ Հօրէ միածին, այսինքն՝ յէութենէ Հօր: Աստուած յԱստուծոյ, Լոյս ի Լուսոյ, Աստուած ճշմարիտ յԱստուծոյ ճշմարտէ՝ ծնունդ եւ ոչ արարած: Նոյն Ինքն ի բնութենէ Հօր, Որով ամենայն ինչ եղեւ յերկինս եւ ի վերայ երկրի՝ երեւելիք եւ աներեւոյթք: Որ յաղագս մեր մարդկան եւ վասն մերոյ փրկութեան իջեալ յերկնից՝ մարմնացաւ, մարդացաւ, ծնաւ կատարելապէս ի Մարիամայ սրբոյ Կուսէն Հոգւովն Սրբով: Որով էառ զմարմին, զհոգի եւ զմիտ եւ զամենայն, որ ինչ է ի մարդ՝ ճշմարտապէս եւ ոչ կարծեօք: Չարչարեալ, խաչեալ, թաղեալ, յերրորդ աւուր յարուցեալ, ելեալ ի յերկինս նովին մարմնովն՝ նստաւ ընդ աջմէ Հօր: Գալոց է նովին մարմնովն եւ փառօք Հօր ի դատել զկենդանիս եւ զմեռեալս, Որոյ թագաւորութեանն ոչ գոյ վախճան: Հաւատամք եւ ի Սուրբ Հոգին՝ յանեղն եւ ի կատարեալն, որ խօսեցաւ յՕրէնս եւ ի Մարգարէս եւ յԱւետարանս. որ էջն ի Յորդանան, քարոզեաց յառաքեալսն եւ բնակեցաւ ի սուրբսն: Հաւատամք եւ ի մի միայն ընդհանրական եւ յառաքելական սուրբ Եկեղեցի. ի մի մկրտութիւն, յապաշխարութիւն, ի քաւութիւն եւ ի թողութիւն մեղաց, ի յարութիւնն մեռելոց, ի դատաստանն յաւիտենից հոգւոց եւ մարմնոց, յարքայութիւնն երկնից եւ ի կեանսն յաւիտենականս:

Մինչեւ ցաստ են հաւատոյ բանք:

Իսկ որք ասեն՝ էր երբեմն, յորժամ ոչ էր Որդի, կամ՝ էր երբեմն, յորժամ ոչ էր Սուրբ Հոգի, կամ թէ՝ յոչէից եղեն, կամ՝ յայլմէ էութենէ ասեն լինիլ զՈրդին Աստուծոյ եւ կամ զՍուրբ Հոգին, եւ թէ՝ փոփոխելիք են կամ այլայլելիք, զայնպիսիսն նզովէ կաթողիկէ եւ առաքելական Եկեղեցի:

Սրկ. Օրհնեա՛, Տէ՛ր:
Քհ. Իսկ մեք փառաւորեսցուք, որ յառաջ քան զյաւիտեանս, երկիր պագանելով Սրբոյ Երրորդութեանն եւ Միոյ Աստուածութեանն՝ Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. ամէն:
Սրկ. Եւ եւս խաղաղութեան զՏէր աղաչեսցուք:
Դպ. Տէ՛ր, ողորմեա՛:
Սրկ. Եւ եւս հաւատով աղաչեսցուք եւ խնդրեսցուք ի Տեառնէ Աստուծոյ եւ ի Փրկչէն մերմէ Յիսուսէ Քրիստոսէ ի ժամուս պաշտաման եւ աղօթից, զի արժանի ընդունելութեան արասցէ, լուիցէ Տէր ձայնի աղաչանաց մերոց, ընկալցի զխնդրուածս սրտից մերոց, թողցէ զյանցանս մեր, ողորմեսցի ի վերայ մեր: Աղօթք մեր եւ խնդրուածք յամենայն ժամ մտցեն առաջի մեծի տէրութեան Նորա, եւ Նա տացէ մեզ միաբան միով հաւատով եւ արդարութեամբ վաստակել ի գործս բարիս, զի զողորմութեան զշնորհսն Իւր արասցէ ի վերայ մեր: Տէրն ամենակալ կեցուսցէ եւ ողորմեսցի:
Դպ. Կեցո՛, Տէ՛ր:
Սրկ. Զժամ սուրբ պատարագիս եւ զառաջիկայ օրս խաղաղութեամբ անցուցանել հաւատով՝ ի Տեառնէ խնդրեսցուք:
Դպ. Շնորհեա՛, Տէ՛ր:
Սրկ. Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Դպ. Շնորհեա՛, Տէ՛ր:
Սրկ. Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Դպ. Շնորհեա՛, Տէ՛ր:
Սրկ. Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Դպ. Շնորհեա՛, Տէ՛ր:
Սրկ. Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Դպ. Տէ՛ր, ողորմեա՛:
Սրկ. Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Դպ. Քեզ՝ Տեառնդ, յանձն եղիցուք:
Սրկ. Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Դպ. Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սրկ. Օրհնեա՛, Տէ՛ր:
Քհ. Որպէս զի արժանաւորք եղիցուք գոհութեամբ փառաւորել զՔեզ ընդ Հօր եւ Սուրբ Հոգւոյդ այժմ եւ միշտ եւ յաւիտեանս յաւիտենից. ամէն: Խաղաղութի՜ւն ամենեցուն:
Դպ. Եւ ընդ հոգւոյդ քում:
Սրկ. Աստուծոյ երկրպագեսցուք:
Դպ. Առաջի Քո, Տէ՛ր:
Քհ. Խաղաղութեամբ Քով, Քրիստոս Փրկի՛չ մեր, որ ի վեր է քան զամենայն միտս եւ զբանս, ամրացո՛ զմեզ եւ աներկի՛ւղ պահեա յամենայն չարէ: Հաւասարեա՛ զմեզ ընդ ճշմարիտ երկրպագուս Քո, որք Հոգւով եւ ճշմարտութեամբ Քեզ երկիր պագանեն: Վասն զի Ամենասուրբ Երրորդութեանդ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:
Սրկ. Օրհնեա՛, Տէ՛ր:
Քհ. Տէր Աստուած օրհնեսցէ զամենեսեանդ:
Սրկ. Մի՛ ոք յերախայից, մի՛ ոք ի թերահաւատից եւ մի՛ ոք յապաշխարողաց եւ յանմաքրից մերձեսցի յաստուածային խորհուրդս:
Դպ. Մարմին տէրունական եւ արիւն փրկչական կայ առաջի. երկնային զօրութիւնք յաներեւոյթս երգեն եւ ասեն անհանգիստ բարբառով. «Սո՜ւրբ, Սո՜ւրբ, Սո՜ւրբ, Տէ՛ր զօրութեանց»:
Սրկ. Սաղմո՛ս ասացէք Տեառն Աստուծոյ մերում, դպի՛րք, ձայնիւ քաղցրութեամբ զերգս հոգեւորս:

ՍՐԲԱՍԱՑՈՒԹԻՒՆ

Դպ. Որ վերայ նստիս ի կառս հրանիւթս քառակերպեանս, անճառելի Բա՛նդ Աստուած, այսօր իջեալ ի յերկնայնոցն վասն Քո արարածոցս՝ յանձն առեր բազմիլ ընդ աշակերտսն: Եւ սերովբէքն եւ քերովբէքն հիացեալ զարմանային, եւ պետութիւնք վերին զօրացն սքանչացեալ աղաղակէին՝ ասելով. «Սո՜ւրբ, Սո՜ւրբ, Սո՜ւրբ, Տէ՛ր զօրութեանց»:

Եւ գան խնկարկելով ի սուրբ խորհուրդն:
Սրկ. Յարեւու եհար զխորան Իւր, եւ Ինքն՝ որպէս փեսայ, զի ելանէ յառագաստէ իւրմէ:
Դպ. Եւ ցնծայ Նա որպէս հսկայ յընթանալ զճանապարհս Իւր:
Սրկ. Որք զքրովբէիցն խորհրդաբար կերպարանիմք եւ կենդանարար Երրորդութեանն զերեքսրբեան օրհնութիւնս մատուցանեմք՝ զամենայն զկենցաղականս ի բաց դնելով զգործս, որպէս զի զԹագաւորն ամենեցուն ընդունիցիմք եւ զհրեշտակացն հանդիսապէս ընծայեալ՝ բերեմք զկարգ:

Եւ գան յարեւելից կողմն:
Սրկ. Ճանապա՛րհ արարէք Այնմիկ, որ նստի յերկնից երկինս ընդ արեւելս:
Դպ. Եւ կենդանարար Երրորդութեանն զերեքսրբեան օրհնութիւնս մատուցանեմք:

Եւ գան ի հարաւակողմն:
Սրկ. Աստուած ի հարաւոյ եկեսցէ, եւ Սուրբն՝ ի Փառան լեռնէ:
Դպ. Զամենայն զկենցաղականս ի բաց դնելով զգործս:

Եւ գան յաստիճան խորանին, եւ բարձող ահաւոր խորհրդոյն ասասցէ հանդարտութեամբ.
Սրկ. Համբարձէ՛ք, իշխա՛նք, զդրունս ձեր ի վեր. համբարձցին դրունք յաւիտենից, եւ մտցէ Թագաւոր փառաց:

Եւ պատարագողն խնկարկէ եւ հարցանէ.
Քհ. Ո՞վ է սա Թագաւոր փառաց, Տէր հզօր զօրութեամբ Իւրով, Տէր կարող ի պատերազմի:
Դպ. Որպէս զի զԹագաւորն ամենեցուն ընդունիցիմք:
Սրկ. Համբարձէ՛ք, իշխա՛նք, զդրունս ձեր ի վեր. համբարձցին դրունք յաւիտենից, եւ մտցէ Թագաւոր փառաց:
Քհ. Ո՞վ է սա Թագաւոր փառաց եւ Տէր զօրութեանց:
Դպ. Եւ զհրեշտակացն հանդիսապէս ընծայեալ՝ բերեմք զկարգ:
Սրկ. Սա Ինքն է Թագաւոր փառաց:

Եւ պատարագողն երկրպագէ ահիւ եւ դողութեամբ եւ առնու ի ձեռաց սարկաւագին եւ խաչակնքէ ի վերայ ժողովրդեան՝ ասելով.
Քհ. Օրհնեալ եկեալ անուամբ Տեառն:
Դպ. Ալէլուիա:
Սրկ. Եւ եւս խաղաղութեան զՏէր աղաչեսցուք:
Դպ. Տէ՛ր, ողորմեա՛:
Սրկ. Եւ եւս հաւատով եւ սրբութեամբ կացցուք յաղօթս առաջի սրբոյ սեղանոյս Աստուծոյ ահիւ: Մի՛ խղճիւ եւ գայթակղութեամբ, մի՛ նենգութեամբ, խորամանկութեամբ, մի՛ պատրանօք եւ խաբէութեամբ, մի՛ երկմտութեամբ եւ մի՛ թերահաւատութեամբ, այլ ուղիղ վարուք, պարզ մտօք, միամիտ սրտիւ, կատարեալ հաւատով, լցեալ սիրով, լի եւ առաւելեալ ամենայն գործովք բարութեան կացցուք յաղօթս առաջի սրբոյ սեղանոյս Աստուծոյ եւ գտցուք զողորմութեան զշնորհս յաւուր յայտնութեան եւ ի միւսանգամ գալստեան Տեառն մերոյ եւ Փրկչին Յիսուսի Քրիստոսի: Կեցուսցէ եւ ողորմեսցի:
Դպ. Կեցո՛, Տէ՛ր, եւ ողորմեա՛:
Սրկ. Օրհնեա՛, Տէ՛ր:
Քհ. Շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի, ընդ Որում Քեզ՝ Հօր, միանգամայն եւ Հոգւոյդ Սրբոյ, վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն: Խաղաղութի՜ւն ամենեցուն:
Դպ. Եւ ընդ հոգւոյդ քում:
Սրկ. Աստուծոյ երկրպագեսցուք:
Դպ. Առաջի Քո, Տէ՛ր:
Սրկ. Ողջո՛յն տուք միմեանց ի համբոյր սրբութեան: Եւ որք ոչ էք կարողք հաղորդիլ աստուածային խորհրդոյս, առ դրո՛ւնս ելէք եւ աղօթեցէ՛ք:

Դպ. Քրիստոս ի մէջ մեր յայտնեցաւ,
Որ Էնն Աստուած աստ բազմեցաւ:
Խաղաղութեան ձայն հնչեցաւ,
Սուրբ ողջոյնի հրաման տուաւ:
Եկեղեցիս մի անձն եղեւ,
Համբոյրս յօդ լրման տուաւ:
Թշնամութիւնն հեռացաւ,
Սէրն յընդհանուրս սփռեցաւ:
Արդ, պաշտօնեա՛յք, բարձեալ զձայն՝
Տո՛ւք զօրհնութիւն ի մի բերան
Միասնական Աստուածութեանն,
Որում սրովբէքն են սրբաբան:

Սրկ. Որք հաւատով կայք յանդիման
Սուրբ սեղանոյս արքայական,
Տեսէ՛ք բազմեալ զՔրիստոս Արքայն,
Եւ շուրջ պատեալ զօրք վերնական:
Դպ. Վեր համբառնամք զաչս ունելով
Եւ պաղատիմք զայս ասելով.
Զմեղս մեր մի՛ յիշեսցես,
Այլ գթութեամբ Քո քաւեսցես:
Ընդ հրեշտակացն օրհնեմք զՔեզ,
Եւ ընդ սրբոց Քոց, Տէ՛ր, փառք Քեզ:

Սրկ. Ահի՛ւ կացցուք, երկիւղի՛ւ կացցուք, բարւո՛ք կացցուք եւ նայեցարո՛ւք զգուշութեամբ:
Դպ. Առ Քեզ, Աստուա՛ծ:
Սրկ. Պատարագ Քրիստոս մատչի անարատ Գառն Աստուծոյ:
Դպ. Ողորմութիւն եւ խաղաղութիւն եւ պատարագ օրհնութեան:
Սրկ. Օրհնեա՛, Տէ՛ր:
Քհ. Շնորհք, սէր եւ աստուածային սրբարար զօրութիւնն Հօր եւ Որդւոյ եւ Հոգւոյն Սրբոյ եղիցի ընդ ձեզ՝ ընդ ամենեսեանդ:
Դպ. Ամէն: Եւ ընդ հոգւոյդ քում:
Սրկ. Զդրունս, զդրունս: Ամենայն իմաստութեամբ եւ զգուշութեամբ ի վեր ընծայեցուցէ՛ք զմիտս ձեր աստուածային երկիւղիւ:
Դպ. Ունիմք առ Քեզ, Տէ՛ր ամենակալ:
Սրկ. Եւ գոհացարուք զՏեառնէ բոլորով սրտիւ:
Դպ. Արժան եւ իրաւ:
Սրկ. Օրհնեա՛, Տէ՛ր:
Քհ. Եւ ընդ սերովբէսն եւ ընդ քերովբէսն միաձայն սրբասացութեամբ յօրինել նուագս եւ համարձակապէս գոչելով աղաղակել ընդ նոսին եւ ասել:
Դպ. Սո՜ւրբ, Սո՜ւրբ, Սո՜ւրբ, Տէ՛ր զօրութեանց. լի են երկինք եւ երկիր փառօք Քո: Օրհնութիւն ի բարձունս: Օրհնեալ, որ եկիր եւ գալոցդ ես անուամբ Տեառն: Ովսաննայ ի բարձունս:

Սրկ. Օրհնեա՛, Տէ՛ր:
Քհ. Առէ՛ք, կերէ՛ք. այս է մարմին Իմ, որ վասն ձեր եւ բազմաց բաշխի՝ ի քաւութիւն եւ ի թողութիւն մեղաց:
Դպ. Ամէն:
Սրկ. Օրհնեա՛, Տէ՛ր:
Քհ. Արբէ՛ք ի սմանէ ամենեքեան. այս է արիւն Իմ նորոյ ուխտի, որ յաղագս ձեր եւ բազմաց հեղանի՝ ի քաւութիւն եւ ի թողութիւն մեղաց:
Դպ. Ամէն: Հա՛յր երկնաւոր, որ զՈրդիդ Քո ետուր ի մահ վասն մեր պարտապան պարտեաց մերոց. հեղմամբ արեան Նորա աղաչեմք զՔեզ, ողորմեա՛ Քո բանաւոր հօտի:
Սրկ. Օրհնեա՛, Տէ՛ր:
Քհ. Եւ զՔոյս ի Քոյոց Քեզ մատուցանեմք ըստ ամենայնի եւ յաղագս ամենեցուն:
Դպ. Յամենայնի օրհնեալ ես, Տէ՛ր: Օրհնեմք զՔեզ, գովեմք զՔեզ, գոհանամք զՔէն, աղաչեմք զՔեզ, Տէր Աստուա՛ծ մեր:
Սրկ. Օրհնեա՛, Տէ՛ր:
Քհ. Խաղաղութի՜ւն ամենեցուն:
Դպ. Եւ ընդ հոգւոյդ քում:
Սրկ. Աստուծոյ երկրպագեսցուք:
Դպ. Առաջի Քո, Տէ՛ր: Որդի՛ Աստուծոյ, որ պատարագեալ Հօր ի հաշտութիւն՝ հաց կենաց բաշխիս ի մեզ. հեղմամբ արեան Քո սուրբ աղաչեմք զՔեզ, ողորմեա՛ արեամբ Քով փրկեալ հօտի:
Սրկ. Օրհնեա՛, Տէ՛ր:
Քհ. Որպէս զի եղիցի սա ամենեցուն մեզ՝ մերձեցելոցս, յանդատապարտութիւն, ի քաւութիւն եւ ի թողութիւն մեղաց:
Դպ. Հոգի՛ Աստուծոյ, որ զՓառակցի Քո զխորհուրդ իջեալ ի յերկնից՝ կատարես ի ձեռն մեր. հեղմամբ արեան Սորա աղաչեմք զՔեզ, հանգո՛ զհոգիս մեր ննջեցելոցն:
Սրկ. Օրհնեա՛, Տէ՛ր:
Քհ. Ընդ որս եւ մեզ այց արասցես, բարերա՛ր Աստուած. աղաչեմք:
Դպ. Յիշեա՛, Տէ՛ր, եւ ողորմեա՛:
Քհ. Աստուածածնին սրբոյ Կուսին Մարիամու եւ Յովհաննու Մկրտչին, Ստեփանոսի Նախավկային եւ ամենայն սրբոց եղիցի յիշատակ ի սուրբ պատարագս. աղաչեմք:
Դպ. Յիշեա՛, Տէ՛ր, եւ ողորմեա՛:

Սարկաւագն յառաջակողմն սեղանոյն ձեռնամած ասասցէ.
Սրկ. Առաքելոց սրբոց, մարգարէից, վարդապետաց, մարտիրոսաց եւ ամենայն հայրապետաց սրբոց, առաքելագործ եպիսկոպոսաց, երիցանց, ուղղափառ սարկաւագաց եւ ամենայն սրբոց եղիցի յիշատակ ի սուրբ պատարագս. աղաչեմք:
Դպ. Յիշեա՛, Տէ՛ր, եւ ողորմեա՛:

Սրկ. Օրհնեալ, գովեալ եւ փառաւորեալ, հրաշալի եւ աստուածազարդ գալստեանն Քրիստոսի երկիր պագանեմք:
Դպ. Փա՜ռք գալստեան Քո, Տէ՛ր:

Սրկ. Առաջնորդացն մերոց եւ առաջին լուսաւորչացն՝ սրբոց Թադէոսի եւ Բարթուղիմէոսի առաքելոցն եւ Գրիգորի Լուսաւորչին, Արիստակիսի, Վրթանիսի, Յուսկանն, Գրիգորիսի, Ներսիսի, Սահակայ, Դանիելի եւ Խադայ, Մեսրոպայ վարդապետին եւ Գրիգորի Նարեկացւոյն եւ Ներսիսի Կլայեցւոյն, Յովհաննու Որոտնեցւոյն եւ Գրիգորի եւ Մովսիսի Տաթեւացեացն եւ սրբոց Գրիգորիսեանց եւ Ներսիսեանց, հովուաց եւ հովուապետաց Հայաստանեայց եղիցի յիշատակ ի սուրբ պատարագս. աղաչեմք:
Դպ. Յիշեա՛, Տէ՛ր, եւ ողորմեա՛:
Սրկ. Միանձնացելոց սրբոց, առաքինասէր եւ աստուածուսոյց կրօնաւորացն՝ Պօղոսի, Անտոնի, Պօղայ, Մակարայ, Ոնոփրիոսի, աբբայ Մարկոսի, Սրապիոնի, Նեղոսի, Արսենի, Եւագրի, Պարսամայ, Յովհաննիսեանց եւ Սիմէոնեանց, սրբոց Ոսկեանց եւ Սուքիասեանց եւ ամենայն սրբոց հարց եւ աշակերտելոց նոցին ընդ տիեզերս եղիցի յիշատակ ի սուրբ պատարագս. աղաչեմք:
Դպ. Յիշեա՛, Տէ՛ր, եւ ողորմեա՛:
Սրկ. Թագաւորաց հաւատացելոց՝ սրբոց Աբգարու, Կոստանդիանոսի, Տրդատայ եւ Թէոդոսի եւ ամենայն սուրբ եւ բարեպաշտ թագաւորաց եւ աստուածասէր իշխանաց եղիցի յիշատակ ի սուրբ պատարագս. աղաչեմք:
Դպ. Յիշեա՛, Տէ՛ր, եւ ողորմեա՛:
Սրկ. Ընդհանուր ամենայն հաւատացելոց՝ արանց եւ կանանց, ծերոց եւ տղայոց եւ ամենայն չափու հասակի հաւատով եւ սրբութեամբ ի Քրիստոս ննջեցելոցն եղիցի յիշատակ ի սուրբ պատարագս. աղաչեմք:
Դպ. Յիշեա՛, Տէ՛ր, եւ ողորմեա՛:
Սրկ. Օրհնեա՛, Տէ՛ր:
Քհ. Եւս առաւել՝ զեպիսկոպոսապետն մեր եւ զպատուական հայրապետն ամենայն Հայոց զտէր տէր (այս անուն) շնորհեսցես մեզ ընդ երկայն աւուրս ուղիղ վարդապետութեամբ:
Սրկ. Գոհութիւն եւ փառաբանութիւն մատուցանեմք Քեզ, Տէր Աստուա՛ծ մեր, վասն սուրբ եւ անմահ պատարագիս, որ ի վերայ սրբոյ սեղանոյս, զի սա մեզ ի սրբութիւն կենդանութեան պարգեւեսցէ: Սովաւ շնորհեա՛ զսէր, զհաստատութիւն եւ զըղձալի զխաղաղութիւն ամենայն աշխարհի, սրբոյ Եկեղեցւոյ եւ ամենայն ուղղափառ եպիսկոպոսաց, եպիսկոպոսապետին մերոյ եւ պատուական հայրապետին ամենայն Հայոց՝ տեառն տեառն (այս անուն), եւ մերոյ արքեպիսկոպոսին եւ երջանիկ րաբունապետին՝ տեառն (այս անուն), եւ քահանայիս, որ զպատարագս մատուցանէ, եւ վասն զօրութեանց եւ յաղթութեանց թագաւորաց քրիստոնէից եւ իշխանացն բարեպաշտից: Աղաչեսցուք եւ խնդրեսցուք եւ վասն հոգւոցն հանգուցելոց. եւս առաւել՝ վասն հանգուցեալ րաբունապետացն մերոց եւ շինողաց սուրբ եկեղեցւոյս, եւ որք ընդ հովանեաւ սորին են հանգուցեալ: Ազատութիւն եղբարց մերոց գերելոց եւ շնորհ առաջիկայ ժողովրդեանս. հանգիստ՝ հաւատով եւ սրբութեամբ ի Քրիստոս կատարելոցն: Եղիցի յիշատակ ի սուրբ պատարագս. աղաչեմք:
Դպ. Ըստ ամենայնի եւ յաղագս ամենեցուն:
Սրկ. Օրհնեա՛, Տէ՛ր:
Քհ. Եւ եղիցի ողորմութիւն մեծիս Աստուծոյ եւ Փրկչիս մերոյ Յիսուսի Քրիստոսի ընդ ձեզ՝ ընդ ամենեսեանդ:
Դպ. Ամէն: Եւ ընդ հոգւոյդ քում:

Եւ սարկաւագն քարոզէ ի թիւ.
Սրկ. Եւ եւս խաղաղութեան զՏէր աղաչեսցուք:
Դպ. Տէ՛ր, ողորմեա՛:
Սրկ. Ամենայն սրբովք, զորս յիշատակեցաք, եւս առաւելապէս զՏէր աղաչեսցուք:
Դպ. Տէ՛ր, ողորմեա՛:
Սրկ. Վասն մատուցեալ սուրբ եւ աստուածային անմահ պատարագիս, որ ի վերայ սրբոյ սեղանոյս, զՏէր աղաչեսցուք:
Դպ. Տէ՛ր, ողորմեա՛:
Սրկ. Որպէս զի Տէր Աստուած մեր, որ ընկալաւ զսա ի սուրբ, յերկնային եւ յիմանալի Իւր մատուցարանն, զփոխանակն առաքեսցէ առ մեզ զշնորհս եւ զպարգեւս Հոգւոյն Սրբոյ, զՏէր աղաչեսցուք:
Դպ. Տէ՛ր, ողորմեա՛:
Սրկ. Ընկա՛լ, կեցո՛ եւ ողորմեա՛ եւ պահե՛ա զմեզ, Տէ՛ր, Քոյին շնորհիւդ:
Դպ. Կեցո՛, Տէ՛ր, եւ ողորմեա՛:
Սրկ. Զամենասրբուհի զԱստուածածինն՝ զմիշտ Կոյսն Մարիամ, հանդերձ ամենայն սրբովք յիշելով, զՏէր աղաչեսցուք:
Դպ. Յիշեա՛, Տէ՛ր եւ ողորմեա՛:
Սրկ. Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Դպ. Տէ՛ր, ողորմեա՛:
Սրկ. Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Դպ. Քեզ՝ Տեառնդ, յանձն եղիցուք:
Սրկ. Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Դպ. Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

Յորժամ պատարագիչն հասանիցի յայն տեղին, յորում ասէ՝ «Եւ տո՛ւր մեզ համարձակաձայն ....», ելցէ աւագ երէցն ի բեմն՝ ունելով ի ձեռին զխաչն եւ զԱւետարանն, եւ զեկուցանէ զբան սրբոյն Բարսղի ի լուր ամենեցուն.

ԽՐԱՏ
սրբոյն Բարսղի
Լուարո՛ւք ինձ, որդեա՛կք իմ սիրելիք, եւ ես երկիւղ Տեառն ուսուցանեմ ձեզ աննախանձաբար՝ իբրեւ հարազատ որդւոց. քանզի հարկ ի վերայ կայ, եւ վայ է ինձ, եթէ ոչ աւետարանեմ ձեզ հանապազօր, զի թերեւս կարացից ծանուցանել ձեզ, եթէ զինչ են կամքն Աստուծոյ՝ բարին եւ հաճոյն եւ կատարեալն:
Զի մարգարէն Եզեկիէլ հանապազ զարհուրեցուցանէ զիս յասելն իւրում բանիւ Աստուծոյ ի վերայ քահանայից այսպէս. «Որդի՛ մարդոյ, դէտ կացուցի զքեզ ի վերայ ժողովրդեանդ այդորիկ. եթէ տեսանիցես զսուրն եկեալ հասեալ եւ ոչ ազդ առնիցես փողով, եւ նոքա ոչ զգուշանայցեն, եւ եկեալ սուրն գտանիցէ զոք անպատրաստ, նա յանօրէնութեան իւրում մեռցի, եւ զարիւն նորա ի ձեռաց քոց խնդրեցից»:
Արդ, սուր՝ գեհենին սպառնալիքն են, եւ փող՝ պատուիրանն Աստուծոյ, զոր զեկուցանեմ ձեզ այսօր ի վերայ բեմիս: Ես, ո՛վ եղբարք, մարդ եմ իբրեւ զձեզ եւ առաւել եւս զառածեալ մեղօք, բայց զի կարգեցայ ձեզ տեսուչ եւ խրատող, արտասուօք եւ բազում հառաչանօք սրտի՝ սիրով առաջի առնեմ ձեզ զհաճոյսն Աստուծոյ:
Ոչ եթէ նորաձայն ինչ՝ մտացածին բանիւք առնելով զձեզ վտարանդիս, քանզի ստուգապէս եւ համարս տալոց եմ ընդ ձեզ առաջի Աստուծոյ կենդանւոյ, վասն որոյ զվաղնջուց դրոշմեալ կանոն սրբոց հարցն դիւրալուր բանիւք ձեզ մատուցանեմ. բայց նախ զա՛յս գիտասջիք, զի ոչ հրեշտակաց հաւատացաւ քահանայութեան պատիւն, զի անմեղք են, այլ մարդկանց. զի որպէս մեք մեղանչեմք եւ յուսամք թողութեան ի Քրիստոսէ, նոյնպէս եւ ձեզ տացուք յոյս թողութեան եւ ապաշխարութեան:
Եւ արդ, աղաչեմ զձեզ զամենեսեան երկայնմտութեամբ լսել ինձ:
Ահա բանին երկինք, եւ Քրիստոս իջեալ բազմի ի վերայ սրբոյ սեղանոյս. եւ ամենայն զօրք երկնից՝ յերկիր ծաւալին աներեւութապէս ի սպաս Որդւոյն Աստուծոյ եւ շուրջ զսեղանովն բոլորին, եւ Սուրբ Հոգին առատապէս բաշխէ զշնորհս մերձեցելոցն սրբութեամբ:
Արդ, դուք, եղբա՛րք իմ, բազում զգուշութեամբ եւ երկիւղիւ դի՛ք ի սիրտս ձեր. մի՛ զտեսանելին եւեթ նկատել հաց եւ գինի, այլ՝ զմեծ խորհուրդն, որ ծածկեալ է ի մարմնաւոր աչաց տեսութենէ, որ միայն հոգւոյ ակամբ տեսանի այնոցիկ, որ սրբութեամբ խնդրեն զնա, յորմէ ճաշակեալ ուրախանան ի ցնծութիւնս աստուածայինս, քանզի կարող է Աստուած ի միս հում եւ յարիւն դարձուցանել, որպէս եղեւ միում ի սրբոցն:
Բայց զի զգալիքս ոչ կարեն տանիլ զմիս հում եւ զարիւն, վասն այնորիկ հացիւ եւ գինւով տպաւորեաց Աստուած. այլ մի՛ իբրեւ զհաց հայիք եւ մի՛ իբրեւ զգինի նկատէք, քանզի սա է ճշմարիտ մարմին եւ արիւն Որդւոյն Աստուծոյ. մի՛ սովորական ընդունելութեամբ արհամարհանօք ոք մերձեսցի իբրեւ ի դոյզն ինչ կերակուր, զի հուր կիզող է, այրիչ եւ սպառիչ մեղաւորաց, որով պարտ է նախ սրբիլ ի մեղաց ի ձեռն ապաշխարութեան, զի մի՛ յոլովութեամբ մեղացն կիզիցիմք ի հուրն, զի սպառին ոգիք այնոցիկ, որք ոչ նախ մեկնին ի մեղաց, այլ բեւեռեալ կան ի նոսա:
Եւ մի՛, դարձեալ, անյուսաբար ոք հեռանայցէ եւ զերկիւղ սնոտի ի մէջ բերցէ, որ ոչ է այն երկիւղ, այլ արհամարհանք. զի սա է դուռն երկնից արքայութեան եւ նոյն ինքն արքայութիւն, որ է Քրիստոս Որդի Աստուծոյ եւ Աստուած մեր, եւ մերձեցելոցն սրբութեամբ զորդեգրութիւն անջինջ գրէ երկնաւորի Հօրն:
Այլ ի միտ առնուլ արժան է, զի ամենայն հարազատ որդի զնմանութիւն կերպարանաց հօրն բերէ յինքեան. եւ դու յորժամ ասես՝ «Հայր մեր, որ յերկինս», եւ զխնդրուածս մատուցանես, արժան է զնմանութիւն Նորին ի քեզ բերել, զի լսելի լինիցի. ապա եթէ զնմանութիւն ոչ ունիցիս երկնաւոր Հօրն բարերարի եւ մարդասիրի, ոչ լսէ Նա քեզ եւ ոչ խոնարհի յաղաչանս քո. այլ նա՛ լսէ քեզ, զորոյ զկերպարան գործոյն ունիս, որ ի սանդարամետսն է:
Արդ, լսելով զայս, ի բա՛ց փարատեցէք յանձանց ձերոց զչարութիւն եւ զամենայն խարդախութիւն. թողէ՛ք ի սրտէ իւրաքանչիւր ոք զյանցանս եղբօր ձերոյ եւ զամենայն խէթ, զոր ունիք առ միմեանս, զի եւ ձեր գտեալ թողութիւն յերկնաւոր Հօրէն՝ արժանի լինիջիք զենմանս այսորիկ:
Ի բա՛ց մերժեցէք ի ձէնջ ամենեքեան զանհաւատութիւն եւ զխիղճ բծաւորութեան եւ զթերահաւատութիւն:
Սրբեցէ՛ք ի ձէնջ զնախանձ, զնենգութիւն, զչարութիւն, զկեղծաւորութիւն, զհպարտութիւն, զամբարտաւանութիւն, զամբարհաւաճութիւն, զմարդահաճութիւն, զհակառակութիւն, զոխս, զվաշխս, զտոկոսիս եւ զամենայն չարեաց արմատ զարծաթսիրութիւնն եւ զագահութիւն, այլ եւ զկանացի փաթեթսն եւ զկախարդասար դեղատուութիւնս եւ զամենայն չարախօսութիւն եւ զթշնամութիւն, զցաւս ցանկութեան, մանաւանդ զտգեղն եւ զտխեղծ հայհոյիչ բան ձերմէ, որով զմիմեանս նախատէք, եւ զանօրէն կռապաշտութիւն եւ զանկարգ եւ զանառակ մոլորութիւնն, զորս ի յիշումն ածելն ապականէ եւ գարշեցուցանէ զմիտս նախ՝ զիւրն եւ ապա՝ զլսողացն. քանզի յաւուրն դատաստանի որդնալից լինին գարշելի բերանք այնոցիկ, որք ոչ մեկնին ի նոցանէ, զի ասաց Տէր. «Որ ասէ ցեղբայրն իւր՝ մորոս, պարտաւոր լիցի գեհեան հրոյն». արդ, պարտ է արմատախիլ առնել զայնպիսի չարիսն ի մէնջ. մի՛ ոք շուն, մի՛ ոք պոռնիկ, մի՛ արուագէտ, մի՛ գող, մի՛ յափշտակող, մի՛ գէճ, մի՛ որովայնամոլ, մի՛ արբեցող, մի՛ չարակամ, մի՛ չարայոյզ, մի՛ սպանող, մի՛ խռովարար, մի՛բարկացող, անողորմ, մի՛ բանսարկու, մի՛ պիղծ, մի՛ թշնամանող, մի՛ երդմնահար, մի՛ ուխտադրուժ, մի՛ անօրէն, մի՛ անիրաւ, մի՛ բամբասող եւ մի՛ այլովք մեղօք, զի են մեղք, որ մահու չափ են, զորս ոչ իսկ արժանի համարիմ յիշել ի տեղւոջս:
Եւ զայս ասելով՝ պատուիրեմ, զի ամենեւին զհին մարդն ի բաց ընկեցէք ամենայն չար գործովք իւրովք: Այլ զգաստացեալք զգեցարուք ամենեքեան վարս պարկեշտս, սուրբս, բարեխոհս, հեզս, քաղցունս, անոխակալս, խաղաղարարս, ողորմած ի վերայ հիւանդաց եւ վշտացելոց, գթած ի վերայ տնանկաց, աղքատաց եւ կարօտելոց՝ զարդարեալ ամենայն արդարութեամբ, սիրով, հաւատով, յուսով, ունել զսէր կատարեալ առ Աստուած եւ առ մարդիկ, քանզի լրումն ամենայն արդարութեան սէր է ի սուրբ սրտէ եւ յանկեղծաւոր հաւատոց:
Պատուեցէ՛ք զհարս եւ զմարս ձեր. ա՛րք, սիրեցէ՛ք զկանայս ձեր իբրեւ զանձինս ձեր. եւ դուք, կանա՛յք, հնազա՛նդ լերուք արանց ձերոց. միաբան երկերո՛ւք յԱստուծոյ, պատուեցէ՛ք զօր միաշաբաթին:
Երիտասա՛րդք եւ կուսա՛նք, զսրբութի՛ւն սիրեցէք, զի ընդունելով զսրբութիւնս զայս՝ լուսաւորեսջիք որպէս լուսափայլ հայելի, յորժամ նշոյլք արեգականն ճառագայթեն ի նա. եւ աճեցեալք յառաքինութիւնս՝ կեցջիք արդարութեամբ եւ ոչ դատապարտեսջիք՝ ըստ առաքելոյն բանի. զի արդարեւ իսկ մահտարաժամք եւ յոլով աշխատութիւնք անըմբերելի ցաւոց, ուրկութիւնք եւ այլն ամենայն յանարժան հաղորդութենէ լինի:
Մի՛ կեղծաւորեալ ոք ի ներքս մնասցէ՝ կարծելով յարտաքս կացելոցն, եթէ ի հաղորդելոցն իցէ, վասն զի անարժանն եւ երկմիտն ոչ ինչ առնու յԱստուծոյ, վասն զի Աստուած ոչ փորձի. մի՛ զմարդկային ամօթս պատճառէք, զի ոչ ինչ է այս իսկ ամօթ, այլ այն է մեծ ամօթ, որ ի տիեզերական հրապարակին է. զոր այժմ յինէն թաքուցանես եւ ոչ խոստովանիս եւ ոչ ապաշխարես, անդ առաջի մեծի Դատաւորին հրապարակեալ՝ բացայայտի, որ ոչ եւս կարես թաքուցանել զգործս քո, քանզի հոգիդ քո լինի քեզ դատախազ:
Արդ, ահա ասացի ձեզ զամենայն աննախանձաբար, յայսմ հետէ անպարտ եմ. արիւն ձեր ի գլուխս ձեր, քաւեալ եմ ես յարենէ ձերմէ, զի յիմ վերայ այս եւեթ կայր:
Բայց գիտեմ, զի են ոմանք ի ձենջ, որ արհամարհեն զասացելովքս, վասն որոյ վկայութիւն դնեմ ձեզ զբանս զայսոսիկ, զոր խօսեցայ ընդ ձեզ այսօր ի վերայ բեմիս. յաւուրն դատաստանի առաջի ահաւոր բեմին Քրիստոսի յանդիման կացուցանեմ զձեզ վկայութեամբ սուրբ Աւետարանիս. ապա յայնժամ ոչ եւս կարէ արհամարհել արհամարհողն, այլ կշտամբեալ պատուհասակոծ լինի եւ առաքի ի գեհեն՝ ի հուրն անշէջ:
Այժմ բանիս աւարտումն արարից, զի զամենայն ինչ, որ վասն խորհրդոյս էր, ասացի ձեզ սակաւուք՝ ըստ պատշաճի իրին:
Արդ, որք արժանապէս հաղորդին՝ զարդարեալք գործովք բարեաց, ընդ Պետրոսի եւ ընդ այլոց սրբոց առաքելոցն պատուեալ՝ պսակին ի Քրիստոսէ Աստուծոյ մերմէ. եւ որք ապստամբութեամբ հաղորդին, կրկին ի խաչ հանեն զՈրդին Աստուծոյ. եւ որք լրբենի երեսօք եւ անարժանութեամբ հաղորդին, մասն եւ բաժին զՅուդայի մատնչի եւ զխաչահանուացն ընկալնուն: Զօգուտն ձեր դո՛ւք գիտէք:
Այլ Հոգին Սուրբ, որ սրբոցն է բնակարան եւ աղբիւր է ամենայն բարեաց, մաքրեսցէ զհոգիս եւ զմարմինս ձեր եւ զհաղորդութիւն փրկական խորհրդոյս ի թողութիւն մեղաց արասցէ ձեզ, Որում ընդ Հօր եւ ընդ Որդւոյ Միածնի Յիսուսի Քրիստոսի՝ Տեառն մերոյ, փառք յաւիտեանս. ամէն:


Սրկ. Օրհնեա՛, Տէ՛ր:
Քհ. Եւ տո՛ւր մեզ համարձակաձայն բարբառով բանալ զբերանս մեր, կարդալ զՔեզ, երկնաւո՛րդ Հայր, երգել եւ ասել:
Դպ. Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ:

Սրկ. Օրհնեա՛, Տէ՛ր:
Քհ. Զի Քո է արքայութիւն եւ զօրութիւն եւ փառք յաւիտեանս. ամէն: Խաղաղութի՜ւն ամենեցուն:
Դպ. Եւ ընդ հոգւոյդ քում:
Սրկ. Աստուծոյ երկրպագեսցուք:
Դպ. Առաջի Քո, Տէ՛ր:

Եւ քահանայն խոնարհի, եւ ամենայն ժողովուրդքն խոնարհին ի ծունկս: Եւ սարկաւագն ձայնէ.
Սրկ. Օրհնեա՛, Տէ՛ր:
Քհ. Քրիստոսիւ Յիսուսիւ՝ Տերամբ մերով, ընդ Որում Քեզ՝ Հոգւոյդ Սրբոյ, եւ Հօր ամենակալի վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:
Սրկ. Պռօսխումէ:
Քհ. Ի սրբութիւն սրբոց:
Դպ. Միայն Սուրբ, միայն Տէր, Յիսուս Քրիստոս, ի փառս Աստուծոյ Հօր. ամէն:
Սրկ. Օրհնեա՛, Տէ՛ր:
Քհ. Օրհնեալ Հայր Սուրբ՝ Աստուած ճշմարիտ:
Դպ. Ամէն:
Սրկ. Օրհնեա՛, Տէ՛ր:
Քհ. Օրհնեալ Որդիդ Սուրբ՝ Աստուած ճշմարիտ:
Դպ. Ամէն:
Սրկ. Օրհնեա՛, Տէ՛ր:
Քհ. Օրհնեալ Հոգիդ Սուրբ՝ Աստուած ճշմարիտ:
Դպ. Ամէն:
Սրկ. Օրհնեա՛, Տէ՛ր:
Քհ. Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Դպ. Ամէն: Հայր Սուրբ, Որդիդ Սուրբ, Հոգիդ Սուրբ: Օրհնութի՜ւն Հօր եւ Որդւոյ եւ Սրբոյ Հոգւոյն այժմ եւ միշտ եւ յաւիտեանս յաւիտենից. ամէն:

Սրկ. Օրհնեա՛, Տէ՛ր:
Քհ. Ի սուրբ, ի սուրբ, պատուական մարմնոյ եւ յարենէ Տեառն մերոյ եւ Փրկչին Յիսուսի Քրիստոսի ճաշակեսցուք սրբութեամբ, որ իջեալ յերկնից՝ բաշխի ի միջի մերում: Սա է կեանք, յոյս յարութեան, քաւութիւն եւ թողութիւն մեղաց: Սաղմո՛ս ասացէք Տեառն Աստուծոյ մերում, սաղմո՛ս ասացէք երկնաւոր Թագաւորիս մերում անմահի, որ նստի ի կառս քերովբէականս:

Եւ խաչակնքէ քահանայն սկիհովն ի վերայ ժողովրդեանն եւ դառնայ ի սուրբ սեղանն: Դպիրք եւ սարկաւագունք եղանակեն փոխն ի փոխ.

Տէ՛ր, ողորմեա՛, Տէ՛ր, ողորմեա՛,
Տէ՛ր, ողորմեա՛, Տէ՛ր, ողորմեա՛:
Ամենասո՛ւրբ Երրորդութիւն,
Տո՛ւր աշխարհիս խաղաղութիւն
Եւ հիւանդաց բժշկութիւն,
Ազգիս Հայոց՝ այցելութիւն:

Այլք յաւելուն կամ փոխանակեն ընդ վերնոյն.
Արի՛, Աստուա՛ծ հարցն մերոց,
Որ ապաւէնդ ես նեղելոց:
Հա՛ս յօգնութիւն ծառայից Քոց,
Լե՛ր օգնական ազգիս Հայոց:
Տէ՛ր, ողորմեա՛, Տէ՛ր, ողորմեա՛,
Յիսո՛ւս Փրկիչ, մեզ ողորմեա՛
Միջնորդութեամբ սուրբ եւ անմահ պատարագիս:
Ընկա՛լ, Տէ՛ր, եւ ողորմեա՛:

Սրկ. Սաղմո՛ս ասացէք Տեառն Աստուծոյ մերոյ, դպի՛րք, ձայնիւ քաղցրութեամբ զերգս հոգեւորս, զի Սմա վայել են սաղմոսք եւ օրհնութիւնք, ալէլուք եւ երգք հոգեւորք: Պաշտօնեա՛յք, հանդերձ երգովք սաղմո՛ս ասացէք եւ զՏէր յերկինս օրհնեցէ՛ք:

Եւ քարշեն զվարագոյրն, եւ դպիրքն եղանակեն.

Դպ. Օրհնեալ է Աստուած. Քրիստոս պատարագեալ բաշխի ի միջի մերում. ալէլուիա:
Մատի՛ք առ Տէր եւ առէ՛ք զլոյս. ալէլուիա:
Ճաշակեցէ՛ք եւ տեսէ՛ք, զի քաղցր է Տէր. ալէլուիա:
Օրհնեցէ՛ք զՏէր յերկինս. ալէլուիա:
Օրհնեցէ՛ք զՆա ի բարձունս. ալէլուիա:
Օրհնեցէ՛ք զՆա, ամենայն հրեշտա՛կք Նորա. ալէլուիա:
Օրհնեցէ՛ք զՆա, ամենայն զօրութի՛ւնք Նորա. ալէլուիա:

Յորժամ «Քրիստոս պատարագեալ»-ն վճարիցի` ասասցեն դպիրքն յորդորական ձայնիւ զտաղս. «Եկա՛յք, մարդի՛կ ամենայն»: Եւ ապա հողորդեսցին արժանաւորքն եւ արձակեսցին: