|
|
29 մարտի 2024թ. ուրբաթ, ԴՁ Աւագ ուրբաթ Պահք Յիշատակ չարչարանաց, խաչելութեան եւ թաղման Տեառն մերոյ Յիսուսի Քրիստոսի ԳՈՂԳՈԹԱ Այսպես էր կոչվում Երուսաղեմի պարիսպներից դուրս՝ դեպի հյուսիս-արևմուտք ընկած բարձունքը, որի վրա խաչեցին Քրիստոսին: Այժմ այն գտնվում է քաղաքի մեջ՝ Ս. Հարության տաճարի ներսում, և մեկն է նրա բազմաթիվ խորաններից:Եկեղեցու ավանդության համաձայն՝ այստեղ է թաղված մեր նախահայր Ադամը: Այնտեղ, ուր նախամարդը կնքեց իր մահկանացուն՝ հատուցելով իր մեղքի վերջնական պատիժը, խաչ բարձրացավ Քրիստոս, որպեսզի բոլորիս ազատի այդ մեղքի ժառանգությունից:  Երուսաղեմի Ս. Հարության տաճար Գողգոթան՝ ադամական մեղքի այս հնագույն վկայարանը, դարձավ ավարտն ու լրումը Հիսուսի երկրային կյանքի և տնօրինությունների: Իր խաչելությամբ Նա այստեղ խորտակեց սատանայի զորությունը և Իր սոսկալի չարչարանքներով ու մահվամբ վերացրեց մահն ու ադամական մեղքի պատուհասը: Այստեղ Նա մեզ հաշտեցրեց Աստծո հետ՝ փրկություն պարգևելով աշխարհին: Ուխտավոր այցելուները մեծ ակնածանքով երկրպագում են Գողգոթայի խորանի առջև՝ համակվելով այս սրբազան խորհրդածություններով:  |
