---

Կարգաւորութիւն հասարակաց աղօթից Հայաստանեայց Եկեղեցւոյ,
որ կատարի ի մէջ գիշերի՝ ի դէմս Հօր Աստուծոյ

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Օրհնեալ համագոյ եւ միասնական անբաժանելի Սուրբ Երրորդութիւնն՝ Հայր եւ Որդի եւ Հոգի Սուրբ, այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Գ
Տէ՛ր, զի՜ բազում եղեն նեղիչք իմ, եւ բազումք յարեան ի վերայ իմ:
Բազումք ասէին զանձնէ իմմէ, թէ՝ «Չիք փրկութիւն սորա առ Աստուած իւր»:
Այլ Դու, Տէ՛ր, օգնական իմ ես, փառք իմ եւ բարձրացուցիչ գլխոյ իմոյ:
Ձայնիւ իմով ես առ Տէր կարդացի, եւ լուաւ ինձ ի լեռնէ սրբոյ Իւրմէ:
Ես ննջեցի եւ ի քուն եղէ, զարթեայ, եւ Տէր ընդունելի իմ է:
Ոչ երկեայց ես ի բիւրաւոր զօրաց նոցա, ոյք շուրջանակի պատեալ պաշարեալ պահէին զիս:
Արի՛, Տէ՛ր, եւ փրկեա՛ զիս, Աստուա՛ծ իմ. զի Դու հարեր զամենեսեան, ոյք էին ընդ իս թշնամութեամբ ի տարապարտուց, եւ զատամունս մեղաւորաց փշրեսցես:
Տեառնդ է փրկութիւն, ի վերայ ժողովրդեան Քո՝ օրհնութիւն Քո:

ՍԱՂՄՈՍ ՁԷ
Տէ՛ր Աստուած փրկութեան իմոյ, ի տուէ կարդացի եւ ի գիշերի առաջի Քո:
Մտցեն աղօթք իմ առաջի Քո, Տէ՛ր, խոնարհեսցի ունկն Քո ի խնդրուածս իմ,
Զի լցաւ չարչարանօք անձն իմ, եւ կեանք իմ ի դժոխս մերձեցան, եւ համարեցայ ես ընդ այնոսիկ, որք իջանեն ի գուբ:
Եղէ ես որպէս մարդ առանց օգնականի եւ ի մեռեալս ազատ:
Որպէս զվիրաւորս, որք ննջեն ի գերեզմանի:
Զորս Դու ոչ յիշեցեր, նոքա ի ձեռանէ Քումմէ մերժեցան:
Եդին զիս ի գբի ներքնումն՝ ի խաւարի եւ ի ստուերս մահու:
Յիս հաստատեցաւ սրտմտութիւն Քո, զամենայն զբօսանս Քո ածեր ի վերայ իմ:
Հեռի արարեր յինէն զծանօթս իմ, եւ եդին զիս նշաւակ իւրեանց:
Մատնեցայ եւ ոչ ելանէի, աչք իմ տկարացան յաղքատութենէ:
Աղաղակեցի առ Տէր զօրհանապազ եւ համբարձի առ Քեզ զձեռս իմ:
Մի՞թէ մեռելոց առնիցես զսքանչելիս Քո, կամ բժիշկք յարուցեալ խոստովան առնիցի՞ն առ Քեզ:
Մի՞թէ պատմեսցէ ոք երբեք ի գերեզմանի զողորմութիւնս Քո կամ զճշմարտութիւնս Քո` ի կորստեան:
Մի՞թէ ճանաչիցին ի խաւարի սքանչելիք Քո, կամ արդարութիւն Քո` յերկիր մոռացեալ:
Ես առ Քեզ, Տէ՛ր, աղաղակեցի. առաւօտու աղօթք իմ ժամանեսցեն առ Քեզ:
Ընդէ՞ր, Տէ՛ր, մերժես զանձն իմ կամ դարձուցանես զերեսս Քո յինէն:
Տնանկ եւ վաստակաւոր եմ ես ի մանկութենէ իմմէ. ի բարձրութենէ խոնարհեցայ եւ ապշեցայ:
Յիս հաստատեցաւ բարկութիւն Քո, արհաւիրք Քո խռովեցուցին զիս,
Շրջեցան զինեւ որպէս ջուր, զօր ամենայն պաշարեցին զիս ի միասին:
Հեռի արարեր յինէն զբարեկամս իմ եւ զծանօթս իմ վասն թշուառութեան իմոյ:

ՍԱՂՄՈՍ ՃԲ
Օրհնեա՛, ա՛նձն իմ, զՏէր, եւ ամենայն ոսկերք իմ՝ զանուն սուրբ Նորա:
Օրհնեա՛, ա՛նձն իմ, զՏէր եւ մի՛ մոռանար զամենայն տուրս Նորա.
Ո քաւէ զմեղս քո, բժշկէ զամենայն հիւանդութիւնս քո.
Ո փրկէ յապականութենէ զկեանս քո, պսակէ զքեզ ողորմութեամբ եւ գթութեամբ.
Ո լնու ի բարութենէ զցանկութիւն քո, նորոգեսցի որպէս արծուոյ մանկութիւն քո:
Առնէ ողորմութիւնս Տէր եւ իրաւունս ամենայն զրկելոց:
Եցոյց Տէր զճանապարհս Իւր Մովսիսի եւ որդւոցն Իսրայելի զկամս Իւր:
Գթած, ողորմած է Տէր, երկայնամիտ եւ բազումողորմ:
Ոչ ի սպառ բարկանայ Տէր եւ ոչ յաւիտեան պահէ ոխս:
Ոչ ըստ մեղաց մերոց արար մեզ եւ ոչ ըստ անօրէնութեան մերում հատոյց մեզ.
Այլ որպէս բարձր են երկինք յերկրէ, այնպէս զօրացոյց Տէր զողորմութիւն Իւր ի վերայ երկիւղածաց Իւրոց:
Որչափ հեռի են արեւելք յարեւմտից, այնչափ հեռի արար ի մէնջ զանօրէնութիւնս մեր:
Որպէս գթայ հայր ի վերայ որդւոց իւրոց, այնպէս գթասցի Տէր յերկիւղածս Իւր.
Զի Նա գիտաց զստեղծուածս մեր եւ յիշեաց, թէ հող եմք:
Մարդոյ որպէս խոտոյ են աւուրք իւր, որպէս ծաղիկ վայրի՝ այնպէս ծաղկէ:
Շնչէ ի նմա հողմ, եւ ոչ է, եւ ոչ եւս երեւի տեղի նորա:
Բայց ողորմութիւն Տեառն յաւիտեանս յաւիտենից ի վերայ երկիւղածաց Իւրոց, եւ արդարութիւն Նորա յորդւոց մինչեւ յորդիս,
Ոյք պահեն զուխտս Նորա, յիշեն զպատուիրանս Նորա եւ առնեն զնա:
Տէր յերկինս պատրաստեաց զաթոռ Իւր, արքայութիւն Նորա ամենեցուն տիրէ:
Օրհնեցէ՛ք զՏէր, ամենայն հրեշտա՛կք Նորա՝ հզօրք զօրութեամբ, ոյք առնէք զբան Նորա ի լսել ձայնի պատգամաց Նորա:
Օրհնեցէ՛ք զՏէր, ամենայն զօրութի՛ւնք Նորա, պաշտօնեա՛յք եւ արարո՛ղք կամաց Նորա:
Օրհնեցէ՛ք զՏէր, ամենայն գո՛րծք Նորա. զի ընդ ամենայն տեղիս է տէրութիւն Նորա. օրհնեա՛, ա՛նձն իմ, զՏէր:

ՍԱՂՄՈՍ ՃԽԲ
Տէ՛ր, լո՛ւր աղօթից իմոց, ո՛ւնկն դիր խնդրուածաց իմոց ճշմարտութեամբ Քով:
Լո՛ւր ինձ արդարութեամբ Քով եւ մի՛ մտաներ ի դատաստան ընդ ծառայի Քում, զի ոչ արդարանայ առաջի Քո ամենայն կենդանի:
Հալածեաց թշնամին զանձն իմ, խոնարհ արար յերկիր զկեանս իմ եւ նստոյց զիս ի խաւարի որպէս մեռեալ յաւիտենից:
Ձանձրացաւ յիս հոգի իմ, եւ սիրտ իմ խռովեցաւ յիս:
Յիշեցի զաւուրսն զառաջինս, խորհեցայ յամենայն գործս Քո. յարարածս ձեռաց Քոց խորհեցայ եւ համբարձի առ Քեզ զձեռս իմ:
Անձն իմ որպէս զերկիր ծարաւի է առ Քեզ. վաղվաղակի լո՛ւր ինձ, Տէ՛ր, զի նուաղեաց յինէն հոգի իմ:
Մի՛ դարձուցաներ զերեսս Քո յինէն. նմանիցեմ այնոցիկ, ոյք իջանեն ի գուբ:
Լսելի՛ արա ինձ առաւօտու զողորմութիւնս Քո, զի ես ի Քեզ, Տէ՛ր, յուսացայ:
Ցո՛յց ինձ ճանապարհ, յոր եւ գնացից, զի առ Քեզ, Տէ՛ր, համբարձի զանձն իմ:
Փրկեա՛ զիս ի թշնամեաց իմոց, Տէ՛ր, զի զՔեզ ապաւէն ինձ արարի:
Ուսո՛ ինձ առնել զկամս Քո, զի Դու ես Աստուած իմ:
Հոգի Քո բարի առաջնորդեսցէ ինձ յերկիր ուղիղ:
Վասն անուան Քո, Տէ՛ր, կեցուսցես զիս, արդարութեամբ Քով հանցես ի նեղութենէ զանձն իմ:
Ողորմութեամբ Քով սատակեա՛ զթշնամիս իմ եւ կորո՛ զամենայն նեղիչս անձին իմոյ, զի ես ծառայ Քո եմ:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Զարթուցեալքս ամենեքեան ի հանգստենէ քնոյ, զոր շնորհեաց մեզ մարդասէրն Աստուած ի մխիթարութիւն եւ ի սփոփանս տկարութեան մերում, եւ եկեալքս միաբան հոգեւոր երգով ի փառաբանութիւն եւ ի պատիւ ամենասուրբ անուան Տեառն մերոյ եւ Փրկչին Յիսուսի Քրիստոսի՝ ահիւ եւ դողութեամբ կացցուք յաղօթս առաջի Նորա: Եւ գոհացարուք զՆմանէ ի գիշերային ժամուս յայսմիկ վասն իրաւանց եւ արդարութեան Նորա. որ ընտրեաց զմեզ ողորմութեամբն Իւրով եւ շնորհեաց մեզ բերել զնմանութիւն երկնային հրեշտակացն ի փառաբանիչս Տեառն Աստուծոյ ամենեցուն եւ մեզ լինիլ: Եւ մեք, այսուհետեւ սրբելով զանձինս մեր ի խղճէ եւ ի չար գործոց, համբարձցուք զձեռս մեր ի սրբութիւն առանց բարկութեան եւ երկմտութեան: Հաւատով խնդրեսցուք ի Նմանէ զքաւութիւն եւ զթողութիւն յանցանաց մերոց՝ խոստովան լինելով զգաղտնիս սրտից մերոց ծածկագիտին Աստուծոյ: Որպէս զի ընդունելով զպաղատանս մեր աղօթիւք եւ բարեխօսութեամբ ամենայն սրբոց՝ շնորհեսցէ մեզ մարդասէրն Աստուած կեալ առաքինութեամբ եւ անարատ վարուք ըստ կամաց Նորա յայսմ աշխարհիս եւ արժանաւոր լինելով յաւիտենական եւ երկնային խորանացն, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս: Տէ՛ր մեր, կեցո՛ եւ ողորմեա՛:
Կեցո՛, Տէ՛ր:
Զմնացուած գիշերիս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
ԶՔէն գոհանամք, Տէր Աստուա՛ծ մեր, որ շնորհեցեր մեզ հանգիստ քնոյ խաղաղութեամբ: Եւ զարթուցեալ ժամանեցուցեր զմեզ կանխել յերկրպագութիւն ահաւոր եւ փառաւորեալ անուանդ Քում սրբոյ: Տո՛ւր մեզ, Տէ՛ր, աղաչեմք զՔեզ, զմնացուած գիշերիս խաղաղութեամբ անցուցանել. եւ զամենայն ժամանակս կենաց պանդխտութեան մերոյ երկիւղիւդ Քո ամրացո՛ եւ պահեա՛: Որպէս զի զգուշութեամբ եւ անարատ վարուք կրօնաւորեալք յայսմ աշխարհիս՝ ժամանեսցուք յանքոյթ եւ ի խաղաղ նաւահանգիստ յաւիտենական ի կեանսդ՝ շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի: Ընդ Որում Քեզ Հօր եւ Հոգւոյդ Սրբոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Նայեա՛ց, Տէ՛ր բարերար, ողորմութեամբ Քով յերկրպագուս եւ ի փառաբանիչս անուանդ Քում սրբոյ: Տէ՛ր զօրութեանց, խաղաղացո՛ զանձինս մեր յամենայն սատանայական խռովութեանց եւ յաշխարհական զբօսանաց: Զհրեշտակ խաղաղութեան Քո առաքեա՛ առ մեզ, որ եկեալ պահեսցէ զմեզ անխռովս ի տուէ եւ ի գիշերի, յարթնութեան եւ ի հանգստեան մերում: Որպէս զի բարեպաշտութեամբ եւ արժանաւորապէս Քեզ Տեառնդ ծառայելով ի կեանս յայսոսիկ՝ ժամանեսցուք յաւիտենական երկնից արքայութեան Քո, զոր պատրաստեցեր ի սկզբանէ աշխարհի սրբոց Քոց: Եւ ընդ նոսին գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից:

Օրհնեալ Տէր մեր Յիսուս Քրիստոս. ամէն:
Ալէլուիա, ալէլուիա:

ՇԱՐԱԿԱՆ ՕՐՀՆՈՒԹԵԱՆ

Օրհնութիւն սրբոց հայրապետացն. գձ.

(Օրհ. Սրբոց հայրապետացն գձ. Ա.)

Այսօր սրբոց հայրապետացն ժողովեալք ի միասին՝ եդին հաստատութեամբ զհիմունս հաւատոյ ի վերայ հիման առաքելոց եւ մարգարէից:
Այսօր զԲանն ի սկզբանէ քարոզեցին սուրբ հայրապետքն՝ յառաջ քան զյաւիտեանս ի Հօրէ ծնունդ անճառ, Արարիչ գոլով յաւիտեանց ընդ Հօր էակից Հոգւոյն:
Այսօր զՀոգին ճշմարտութեան դաւանեցին սուրբ հայրապետքն՝ ծագումն առ ի Հօրէ՝ յառաջ բղխեալ անհատաբար, ընդ Նմին յաւէտ մշտնջենաւոր փառակից Որդւոյն:

(Օրհ. Սրբոց հայրապետացն գձ. Բ.)

Ժողովեալ սուրբ հայրապետքն հրաւիրմամբ Հոգւոյն Սրբոյ՝ վերստին հաստատեցին զառաքելական քարոզութիւնն ի վերայ վիմի հաւատոյ հիման սուրբ Եկեղեցւոյ:
Որք զինու Հոգւոյն Սրբոյ արիաբար պատերազմեալք՝ վանեցին զընդդիմամարտ մոլութիւն հերձուածողացն, որպէս հովիւքն քաջք հերքեցին զգայլսն ի հօտէ գառանց:

(Մնկ. Սրբոյն Գրիգորի Լուսաւորչին մտանելոյն ի վիրապն գձ.)

Այսօր տօնէ Եկեղեցի ուրախութեամբ զյիշատակ սրբոյն Գրիգորի, որով լուսաւորեալ պայծառացաւ վայելչապէս՝ ի հանդերձս յոսկեհուռս զարդարեալ եւ պսակեալ. օրհնեցէ՛ք, մանկո՛ւնք, զՔրիստոս Թագաւորն:
Այսօր ցնծան նորածնեալ որդիք լուսոյ յիշատակաւ սուրբ Լուսաւորչին, որով հրաւիրեցան ի հարսանիսն անապական՝ մտանել ընդ Փեսային երկնաւորի ի յառագաստն լուսեղէն. օրհնեցէ՛ք, մանկո՛ւնք, զՔրիստոս Թագաւորն:
Այսօր քահանայք՝ հոգեւոր պատարագին սպասաւորք, վերապատուեն զքահանայապետն սուրբ, որով երկնայնոց քահանայութեանցն հաղորդեալք, յոր վերափոխեալ՝ այսօր մտանէ ի սրբութիւն սրբոց՝ միշտ բարեխօսել առ Տէր վասն մեր. օրհնեցէ՛ք, մանկո՛ւնք, զՔրիստոս Թագաւորն:

(Տրյ. Սրբոյն Մեծի Ներսեսի հայրապետին դձ.)

Այսօր զուարճացեալ տօնեն երկնայինքն ընդ մարդկան՝ պարակից եղեալ փրկութեան մերոյ, քանզի յայտնեցաւ մեզ հոգեւոր գանձն լուսոյ՝ արեւելեան արեգականն ճառագայթ սուրբն Ներսէս. բարեխօսութեամբ սորա, Տէ՛ր, պարգեւեա՛ զխաղաղութիւն Հայաստանեայց աշխարհի:
Այսօր վերստին նորոգեցաւ քահանայական գաւազանն՝ գեղեցկապէս ծաղկեալ պայծառութեամբ, քանզի շնորհեցաւ հովիւն քաջ բանաւոր հօտի՝ յարմատոյ Լուսաւորչին բողբոջ բուսեալ սուրբն Ներսէս. բարեխօսութեամբ սորա, Տէ՛ր, հաստատեա՛ զիշխանութիւն հայրապետական աթոռոյ:
Այսօր մեծապէս փառօք ցնծայ թագաւորական գաւազանն ընդ հաշտութեան սիրոյ սուրբ հայրապետին, քանզի եհաս ի յօգնութիւն օրինադրողն թագաւորաց, մարտակից զինուորական դասուն սուրբն Ներսէս. բարեխօսութեամբ սորա, Տէ՛ր, բարձրացո՛ զիշխանութիւն թագաւորական աթոռոյ:

(Մնկ. Սրբոյն Յակոբայ Մծբնայ հայրապետին գձ.)

Հայրապե՛տ սուրբ եւ անբիծ եւ ընտրեալ յորովայնէ, սքանչելագո՛րծ վկայ եւ պարծա՛նք ազգի մարդկան, առ Քրիստոս բարեխօսեա՛ վասն մեր՝ քո տօնողացս:
Հովի՛ւ հոգեւոր բանաւոր հօտի, լուսաւորի՛չ տիեզերաց, սի՛ւն լուսոյ՝ կանգնեալ ի մէջ Եկեղեցւոյ, առ Քրիստոս բարեխօսեա՛ վասն մեր՝ քո տօնողացս:
Հաստատութի՛ւն հաւատոյ, պսա՛կ ի գլուխ Եկեղեցւոյ, պայծառ քարո՛զ տիեզերաց եւ պարծա՛նք ազգի մարդկան, առ Քրիստոս բարեխօսեա՛ վասն մեր՝ քո տօնողացս:
Ի տաճարի քում սրբութեան երկրպագեմք քո նշխարաց, փառաւորեմք զօր յիշատակի կատարման քո հանգստեան. առ Քրիստոս բարեխօսեա՛ վասն մեր՝ քո տօնողացս:

(Ողր. Համօրէն մարտիրոսաց գձ. Բ.)

Զանմարմնոցն զմաքրութիւնսն մարմնական կրիւք տարեալ ի յանձինս իւրեանց քաջ եւ յաղթող երանեալ սուրբ հայրապետք. սոցա բարեխօսութեամբ ողորմեա՛ մեզ, Աստուա՛ծ:
Շնորհազարդ եւ պայծառ առաքինութեամբ հերքեցին զիշխանն անօրէն իւրեան գործակցօք ճգնող հայրապետք. սոցա բարեխօսութեամբ ողորմեա՛ մեզ, Աստուա՛ծ:
Հրեշտակք երկնից փափագին հանդիսի կատարման սոցա, որք ի մահուն իւրեանց կենդանացան, ելին ի կամարն երկնից, խառնեցան ի գունդս զուարթնոցն. սոցա բարեխօսութեամբ ողորմեա՛ մեզ, Աստուա՛ծ:

(Տրյ. Հոգեգալստեան Է աւուր գձ.)

Որ ի թեւս թեթեւս աննիւթ սաւառնեալ եւ Հրացայտդ սերովբէից վերանստեալ տեսչութեամբ խնամես զարարածս, Հոգի՛դ Սուրբ, օրհնեալ ես յարարածոց Քոց:
Որ սքանչելապայծառ հրաշալի ձայնիւ ընդ Հօր եւ ընդ Որդւոյ միշտ փառաբանիս եւ քաղցրութեամբ հայիս յարարածս, Հոգի՛դ Սուրբ, օրհնեալ ես յարարածոց Քոց:
Այսօր աստուածային տեսչութեամբ ի վերնատունն հնչեալ հողմաձայն հնչմամբ եւ զառաքեալսն արբուցեալ՝ բաշխեցար յարարածս. Հոգի՛դ Սուրբ, օրհնեալ ես յարարածոց Քոց:

(Տրյ. Հանգստեան գձ. Դ.)

Արարչագո՛րծ Աստուած, զարարածս Քո մի՛ անտես առներ, այլ գթա՛ ի ննջեցեալսն մեր եւ հանգո՛ ընդ սուրբս Քո ի խորան Քում սիրողաց։
Արարչակից Հօր Որդի՛, ի միւսանգամ Քո գալստեանն անդատապա՛րտ պահեա զննջեցեալսն մեր եւ հանգո՛ ընդ սուրբս Քո ի խորան Քում սիրողաց։
Կենդանարար Սո՛ւրբ Հոգի, յորժամ նորոգես զերեսս երկրի, նորափետուր զարդարեա՛ զննջեցեալսն մեր եւ հանգո՛ ընդ սուրբս Քո ի խորան Քում սիրողաց։

(Ճշւ. Մեծ. գձ.)

Սուրբ զԱստուածածինն օրհնութեամբ մեծացուցանեմք:
Աւետաւոր հրեշտակն աւետարանէր զծնեալ Փրկիչն ի սրբոյ Կուսէն:
Ասէ. «Ուրա՛խ լեր, բերկրեա՛լդ, քանզի Տէր տերանց է ընդ քեզ»:

(Մնկ. Խաչվերացի Դշ. գձ.)

Այսօր ուրախացեալ ցնծան երկնից բազմութիւնքն ի նաւակատիս սուրբ Եկեղեցւոյ, քանզի շնորհեցաւ մեզ Քահանայապետ յաւիտենից ի լուսաւորել զկաթուղիկէ սուրբ զԵկեղեցի. փա՜ռք գալստեան Քո, Տէ՛ր:
Այսօր սիւն լուսոյ հովանի եղեւ մեզ ի բարձանց, քանզի Թագաւորն երկնաւոր եկաւորի ի սուրբ Եկեղեցի, եւ զօրք հրեշտակաց ծաւալեալ՝ տօնեն ընդ մարդկան. փա՜ռք գալստեան Քո, Տէ՛ր:
Այսօր Քահանայապետ ճշմարիտ աստուածային օրինօքն պատուեալ՝ կանգնէ զքառանկիւն սեղան խաչին, արժանապէս պատարագեալ՝ բաշխէ զմարմին եւ զարիւն Տեառն. մաքրապէս մերձեցարո՛ւք, փրկեալք նո՛ր ժողովուրդք, եւ հայցեցէ՛ք ի Քրիստոսէ, զի շնորհեսցէ զսա մեզ ընդ երկայն աւուրս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

(Օրհ. Սրբոց հայրապետացն գձ. Բ.)

Եւ զհաւատս ճշմարիտս Սուրբ Երրորդութեանն ընդհանուր քարոզեցին յԵկեղեցիս ուղղափառաց՝ հաւատալ ի Հայր եւ յՈրդի եւ յԱմենասուրբ Հոգի:

ՄԱՂԹԱՆՔ
Բարեխօսութեամբ սրբուհւոյ Աստուածածնին եւ Յովհաննու Մկրտչին, սրբոյն Ստեփանոսի Նախավկային եւ սրբոյն Գրիգորի մերոյ Լուսաւորչին, յիշատակաւ եւ աղօթիւք Կոստանդնուպոլսոյ ս. ժողովոյն հարիւր յիսուն հայրապետացն, որոց այսօր է յիշատակ, եւ վասն խաչի Քո պատուականի, Տէ՛ր, ընկա՛լ զաղաչանս մեր եւ կեցո՛ զմեզ:

ՔԱՐՈԶ
(ԲԿ, ԴԿ)
Վասն ի վերուստ խաղաղութեան եւ փրկութեան անձանց մերոց զՏէր աղաչեսցուք:
Տէ՛ր, ողորմեա՛:
Վասն լսելի լինելոյ Տեառն Աստուծոյ ձայնի աղաչանաց մերոց զՏէր աղաչեսցուք:
Տէ՛ր, ողորմեա՛:
Վասն քաւիչ եւ ներող լինելոյ Աստուծոյ ի վերայ մեղաց մերոց զՏէր աղաչեսցուք:
Տէ՛ր, ողորմեա՛:
Վասն թողլոյ մեզ զամենայն յանցանս մեր զկամայ եւ զակամայ զՏէր աղաչեսցուք:
Տէ՛ր, ողորմեա՛:
Վասն զի մի՛ ընդ խոտանսն գտանիցիմք յաւուրն պատասխանատուութեան զՏէր աղաչեսցուք:
Տէ՛ր, ողորմեա՛:
Վասն հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
(ԲԿ, ԴԿ)
Տէ՛ր տուընջեան եւ գոյացուցի՛չ գիշերոյ, որ արարեր զտիւ ի զբօսանս բարեգործութեան՝ ի փրկութիւն անձանց մերոց, եւ զգիշեր՝ ի հանգիստ քնոյ տկարացեալ բնութեանս մերոյ, իսկ այժմ զարթուցեալ բացեր զբերանս մեր յօրհնաբանութիւն ահաւոր եւ փառաւորեալ անուանդ Քում սրբոյ, ընկա՛լ եւ այժմ զաղաչանս մեր եւ յաջողեա՛ մեզ ուղիղ հաւատով եւ առաքինասէր վարուք ի նոյն պաշտօն Քո կանխել միշտ եւ նովին կանոնիւս անդադար փառաւորել զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

ԶՔեզ, որ յամենայնի գթած եւ մարդասէր Տէրդ ես, աղաչեմք հանապազ, զի զօրացուսցես զմեզ օր ըստ օրէ կալ ի կարգի կրօնաւորութեան մերում: Թեթեւացո՛, Տէ՛ր, զքաղցր լուծ Քո, զոր եդիր ի վերայ մեր. զի կարասցուք կալ ի պատուիրանի Քում եւ զհաճոյսն առնել առաջի Քո յամենայն ժամ ի տուէ եւ ի գիշերի, հրեշտակային երգակցութեամբ զՔեզ օրհնել, զՔեզ գովել եւ Քեզ գոհութիւն եւ փառս մատուցանել ամենազօր տէրութեանդ այժմ եւ միշտ եւ յաւիտեանս յաւիտենից. ամէն:

Թագաւոր յաւիտեան:
Դու ես, Քրիստո՛ս, աղբիւր կենաց, բղխումն ողորմութեան: Շնորհեցեր Կոստանդնուպոլսոյ ս. ժողովոյն հարիւր յիսուն հայրապետացն յաղթող զնահատակութիւն՝ հալածել զխաւարն եւ լուսաւորել զանձինս մեր:
Սաղմոս. Աստուած փառաւորեալ է ի խորհուրդս սրբոց Իւրոց, մեծ եւ ահաւոր՝ ի վերայ այնոցիկ, որք շուրջ են զՆովաւ: Տէ՛ր Աստուած զօրութեանց, ո՞ նմանի Քեզ. հզօր ես Դու, Տէ՛ր, եւ ճշմարտութիւն Քո շուրջ է զՔեւ: Շնորհեցեր Կոստանդնուպոլսոյ ս. ժողովոյն հարիւր յիսուն հայրապետացն յաղթող զնահատակութիւն՝ հալածել զխաւարն եւ լուսաւորել զանձինս մեր:
Փոխ. Որ շնորհօք Սուրբ Հոգւոյն յաղթեցիք թշնամւոյն, երանեալ սուրբ վկա՛յք Քրիստոսի, վասն ձեր տօնողացս հայցեցէ՛ք յԱստուծոյ զթողութիւն մեղաց:
Փոխ. Որ պսակդ էք պարծանաց ամենայն առաքինեաց, նախաշաւիղ եւ առաջնորդ կենացն յաւիտենից, ո՛վ սուրբ վկայք, առ պսակիչն սրբոց եւ վասն մե՛ր բարեխօսեցէք՝ շնորհելով ողորմութիւն յանսպառ աղբերէն կենացն յաւիտենից:

ՄԱՂԹԱՆՔ
(ԲԿ, ԴԿ)
Սաղմոսիւք եւ օրհնութեամբ եւ երգօք հոգեւորօք անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեան յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: