---

Կարգաւորութիւն հասարակաց աղօթից Երեկոյի ժամուն,
որ կատարի ի դէմս Որդւոյն Աստուծոյ, որ էջ ի խաչէն եւ պատեալ պաստառակալաւ՝ եդաւ ի գերեզմանի

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Ես առ Աստուած կարդացի, եւ Նա լուաւ ինձ յերեկոյս, ի վաղորդայն եւ ի հասարակ աւուր:
Սպասէի Աստուծոյ իմոյ եւ ակն ունէի Կենարարին, որ փրկէ զծառայս Իւր եւ կեցուցանէ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՁԵ
Խոնարհեցո՛, Տէ՛ր, զունկն Քո եւ լո՛ւր ինձ, զի աղքատ եւ տնանկ եմ ես:
Պահեա՛ զանձն իմ սուրբ, Տէ՛ր. փրկեա՛ զծառայս Քո, Աստուա՛ծ իմ, որ ի Քեզ յուսացայ:
Ողորմեա՛ ինձ, Տէ՛ր, զի առ Քեզ աղաղակեցի զօրհանապազ. ուրա՛խ արա զանձն ծառայի Քո, զի առ Քեզ, Տէ՛ր, համբարձի զանձն իմ.
Զի Դու, Տէ՛ր, քաղցր եւ ուղիղ ես, բազումողորմ առ ամենեսեան, որ կարդան առ Քեզ:
Ո՛ւնկն դիր, Տէ՛ր, աղօթից իմոց եւ նայեա՛ց ի ձայն խնդրուածաց իմոց:
Յաւուր նեղութեան իմոյ կարդացի առ Քեզ, եւ լուար ինձ:
Ոչ ոք է նման Քեզ յաստուածս, Տէ՛ր, եւ ոչ ոք է որպէս զգործս Քո:
Զամենայն ազգս, զոր արարեր, եկեսցեն եւ երկիր պագցեն առաջի Քո եւ փառաւոր արասցեն զանուն Քո յաւիտեան:
Մեծ ես Դու, Տէ՛ր, եւ առնես սքանչելիս եւ Դու միայն ես Աստուած:
Առաջնորդեա՛ ինձ ի ճանապարհի Քում, եւ գնացից ի ճշմարտութեան Քում, եւ ուրախ եղիցի սիրտ իմ երկնչել յանուանէ Քումմէ:
Խոստովան եղէց առ Քեզ, Տէ՛ր Աստուած իմ, բոլորով սրտիւ իմով, փառաւոր արարից զանուն Քո յաւիտեան:
Մեծ եղեւ ի վերայ իմ ողորմութիւն Քո, Տէ՛ր, եւ փրկեցեր զանձն իմ ի դժոխոց ներքնոց:
Աստուա՛ծ, անօրէնք յարեան ի վերայ իմ, եւ ժողովք հզօրաց խնդրեցին զանձն իմ եւ ոչ համարեցան զՔեզ Աստուած առաջի իւրեանց:
Այլ Դու, Տէ՛ր Աստուած իմ, գթած ես եւ ողորմած, երկայնամիտ, բազումողորմ եւ ճշմարիտ. նայեա՛ց առ իս եւ ողորմեա՛ ինձ:
Տո՛ւր զօրութիւն ծառայի Քո, կեցո՛ զորդի աղախնոյ Քո եւ արա՛ առ իս նշան բարութեան:
Տեսցեն ատելիք իմ եւ ամաչեսցեն, զի Դու, Տէ՛ր, օգնեցեր ինձ եւ մխիթարեցեր զիս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Փա՜ռք Քեզ, Աստուա՛ծ, փա՜ռք Քեզ. յաղագս ամենայնի, Տէ՛ր, փա՜ռք Քեզ:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԼԹ
Ապրեցո՛ զիս, Տէ՛ր, ի մարդոյ չարէ. յառնէ անիրաւէ փրկեա՛ զիս:
Խորհեցան զանօրէնութիւն ի սիրտս իւրեանց, զօր ամենայն պատրաստեցան ի պատերազմ:
Սրեցին զլեզուս իւրեանց որպէս զօձի, եւ թոյնք իժից ի ներքոյ շրթանց նոցա:
Պահեա՛ զիս, Տէ՛ր, ի ձեռաց մեղաւորի. եւ ի մարդոյ չարէ փրկեա՛ զիս:
Խորհեցան խափանել զգնացս իմ, թաքուցին ամբարտաւանք որոգայթ ինձ:
Լարս ձգեցին որոգայթ ոտից իմոց, շուրջ զշաւղօք իմովք եդին ինձ զգայթակղութիւն:
Ասացի. «Տէր Աստուած իմ ես Դու. ո՛ւնկն դիր, Տէ՛ր, ձայնի աղօթից իմոց»:
Տէ՛ր, Տէ՛ր, զօրութի՛ւն փրկութեան իմոյ, հովանի՛ գլխոյ իմոյ յաւուր պատերազմի.
Մի՛ մատներ զիս, Տէ՛ր, ի ցանկութիւն մեղաւորաց, ոյք խորհեցան վասն իմ. մի՛ ընդ վայր հարկաներ զիս:
Զի մի՛ երբեք բարձրասցին, եւ խորհուրդք նոցա մի՛ կատարեսցին. վախճան կատարածի նոցա՝ վաստակ շրթանց իւրեանց ծածկեսցէ զնոսա:
Արկցես ի վերայ նոցա կայծակունս հրոյ եւ կործանեսցես զնոսա. ի տառապանաց մի՛ կարասցեն կեալ:
Մարդոյ լեզուանւոյ մի՛ յաջողեսցի ի վերայ երկրի, զայր մեղաւոր չարիք իւր որսասցեն ի կորուստ:
Ծանեայ, զի առնես, Տէ՛ր, դատաստան աղքատի եւ իրաւունս տնանկի:
Արդարք գոհասցին զանուանէ Քումմէ, բնակեսցեն ուղիղք առաջի երեսաց Քոց:

ՍԱՂՄՈՍ ՃԽ
Տէ՛ր, կարդացի առ Քեզ, եւ լո՛ւր ինձ. նայեա՛ ի ձայն աղօթից իմոց ի կարդալ իմում առ Քեզ:
Ուղիղ եղիցին աղօթք իմ որպէս խունկ առաջի Քո, Տէ՛ր, համբարձումն ձեռաց իմոց՝ պատարագ երեկոյի:
Դի՛ր, Տէ՛ր, պահապան բերանոյ իմոյ եւ դուռն ամուր՝ շրթանց իմոց, զի մի՛ խոտորեսցի սիրտ իմ բանիւ չարութեան:
Ի պատճառել զպատճառս մեղաց ընդ մարդս, ոյք գործեն զանօրէնութիւն. եւ ոչ եղէց կցորդ ընտրելոց նոցա:
Խրատեսցէ զիս արդարն ողորմութեամբ եւ յանդիման արասցէ. իւղ մեղաւորի մի՛ օծցէ զգլուխ իմ, եւ աղօթք իմ ի կամս նորա:
Արգելան մերձ առ վիմին դատաւորք նոցա. լուիցեն բանից իմոց եւ քաղցրասցին:
Որպէս թանձրութիւն հողոյ, զի սփռեալ է ի վերայ երկրի, ցրուեսցին ոսկերք նոցա մերձ ի դժոխս:
Առ Քեզ, Տէ՛ր, Տէ՛ր, են աչք իմ. ի Քեզ յուսացայ, Տէ՛ր. մի՛ հաներ զհոգի յինէն:
Պահեա՛ զիս յորոգայթէ, որ թաքուցաւ ինձ, ի գայթակղութենէ գործողին զանօրէնութիւն:
Անկցին ի ցանցս նորա մեղաւորք. միայն եմ ես, մինչեւ անցից:

ՍԱՂՄՈՍ ՃԽԱ
Ձայնիւ իմով ես առ Տէր կարդացի, ձայնիւ իմով զՏէր աղաչեցի:
Սփռեցից առաջի Տեառն զաղօթս իմ եւ զնեղութիւնս իմ առաջի Նորա պատմեցից:
Ի նուաղել յինէն հոգւոյ իմոյ Դու, Տէ՛ր, ծանեար զշաւիղս իմ. ի ճանապարհ, յոր եւ գնայի, թաքուցաւ ինձ որոգայթ:
Հայէի յաջմէ եւ տեսանէի, եւ ոչ ոք էր, որ ճանաչէր զիս. կորեաւ յինէն փախուստ իմ, եւ ոչ գտաւ խնդրող անձին իմոյ:
Աղաղակեցի առ Քեզ, Տէ՛ր, եւ ասացի. «Դու ես յոյս եւ բաժին իմ յերկրին կենդանեաց»:
Նայեա՛, Տէ՛ր, յաղօթս իմ, զի ես խոնարհ եղէ յոյժ. ապրեցո՛ զիս ի հալածչաց իմոց, զի հզօր եղեն քան զիս:
Տէ՛ր, հա՛ն ի բանտէ զանձն իմ. գոհանամ զանուանէ Քումմէ:
Եւ Քեզ սպասեն արդարք, մինչեւ հատուսցես:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Ալէլուիա, ալէլուիա:

ՄԱՂԹԱՆՔ
Օրհնեալ Տէր, որ բնակեալդ ես ի բարձունս, եւ օրհնեալ են փառք մեծութեան Քո. որ հաստատեցեր զլուսաւորս ի բարձունս, ի յերկնից լոյս ծագեցեր ընդ ամենայն տիեզերս. արարեր զարեգակն լուսատու տուընջեան, զլուսինն եւ զաստեղս՝ լուսատու գիշերոյ, եւ զլոյս ճրագի: Դու ես լոյս գովելի, սուրբ եւ առաջին լոյսն. ի Քէն փախնու խաւարն, եւ զլոյս Քո կենդանի, Տէ՛ր, ծագեա՛ ի սիրտս մեր: Եւ մեք միաբան ասասցուք. օրհնեալ է անուն սուրբ փառաց Քոց. եւ Քեզ երգեմք զօրհնութիւն եւ զփառս Հօր եւ Որդւոյ եւ Հոգւոյդ Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Հասեալքս ի ժամ երեկոյիս ամենեքեան համբառնալով զձեռս մեր՝ փառաւորեմք զՔեզ, Տէր Աստուա՛ծ մեր, որ շնորհեցեր մեզ զտիւս խաղաղութեամբ անցուցանել եւ հասանիլ ի ժամ երեկոյիս: Արժանաւորեա՛ զմեզ, Տէ՛ր, սուրբ սրտիւ, հրեշտակային երգով գոհաբանութիւն մատուցանել Տեառն Աստուծոյ ամենակալիդ. կեցո՛ եւ ողորմեա՛: Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՄԱՂԹԱՆՔ
Հասեալքս ի ժամ երեկոյիս ամենեքեան անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՄԵՍԵԴԻ
Մերձ է Տէր առ ամենեսեան, ոյք կարդան առ Նա, առ ամենեսեան, ոյք կարդան առ Նա ճշմարտութեամբ:
Զկամս երկիւղածաց Իւրոց առնէ Տէր. աղօթից նոցա լսէ եւ կեցուցանէ զնոսա:

Ուղիղ եղիցին աղօթք իմ
Որպէս խունկ առաջի Քո, Տէ՛ր:
Համբարձումն ձեռաց իմոց՝
Պատարագ երեկոյի:

ՔԱՐՈԶ
Եւ եւս խաղաղութեան զՏէր աղաչեսցուք:
Աղաչեսցուք զամենակալն Աստուած՝ զՀայր Տեառն մերոյ Յիսուսի Քրիստոսի, զԹագաւորն խաղաղութեան, յաղագս խաղաղութեան եւ վասն միայնոյ սուրբ կաթողիկէ եւ առաքելական Եկեղեցւոյ. զի զբազում ամս խաղաղութեամբ տացէ մեզ Տէր Աստուած մեր եւ զթագաւորս խաղաղարարս առաքեսցէ առ մեզ վասն մեծի սուրբ եւ ահաւոր անուան Իւրոյ: Զպետս գաւառաց, զզօրավարս, զզօրագլուխս, զժողովուրդս, զմուտս եւ զելս մեր խաղաղութեամբ պահեսցէ եւ զամենայն պատերազմունս թշնամւոյն խորտակեսցէ ի մէնջ: Տէրն ամենակալ կեցուսցէ եւ ողորմեսցի:
Զերեկս մերձեալ եւ զառաջիկայ գիշերս խաղաղութեամբ անցուցանել հաւատով՝ ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Լո՛ւր ձայնից մերոց, Տէր Աստուա՛ծ մեր, ընկա՛լ զաղաչանս մեր, զհամբարձումն ձեռաց մերոց եւ զբանս աղօթից՝ սրբելով զերեկոյի պատարագս մեր ի հոտ անուշից ի հաճոյս Քեզ պատրաստել: Յաւե՛լ ի մեզ, Տէ՛ր ամենակալ, զհաւատ, զյոյս, զսէր եւ զամենայն գործս առաքինութեան, որպէս զի ըստ կամաց Քոց բարեսիրաց, միշտ կրօնաւորեալք բարեպաշտութեամբ ի տուէ եւ ի գիշերի, արժանաւորք եղիցուք յաղագս անձանց մերոց փրկութեան եւ վասն հոգեւոր կենացդ աղաչել զՔեզ, Տէ՛ր, եւ գտանել ի Քէն զշնորհս եւ զողորմութիւն. եւ գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Քեզ երկիր պագանելով, Տէր Աստուա՛ծ մեր, գոհանամք զՔէն յաղագս խաղաղութեամբ անցուցանելոյ ի մէնջ զերկարութիւն տուընջեանս: Տո՛ւր մեզ, Տէ՛ր, աղաչեմք զՔեզ, զերեկս եւ զառաջիկայ գիշերս առանց մեղաց եւ առանց գայթակղութեան անցուցանել. հաստատուն կալ եւ մնալ ի հաւատ, ի յոյս, ի սէր եւ ի պատուիրանապահութեան Քո՝ խնդրելով զխաղաղութիւն ամենայն աշխարհի, եւ Եկեղեցւոյ Քում սրբոյ զհաստատութիւն, եւ անձանց մերոց զփրկութիւն: Որպէս զի ընդունելով ի Քէն զհայցուածս մեր՝ եւ զմեծ վայելչական փառաբանութիւն միշտ ի բարձունս առաքեսցուք ամենազօր տէրութեանդ, Քրիստոս Աստուա՛ծ մեր, այժմ եւ միշտ եւ յաւիտեանս յաւիտենից. ամէն:

ԵՐԵՔՍՐԲԵԱՆ
Սուրբ Աստուա՛ծ, սուրբ եւ հզօր, սուրբ եւ անմահ, որ խաչեցար վասն մեր. ողորմեա՛ մեզ:
(Երիցս կրկնեա՛)

Փառաւորեալ եւ օրհնեալ, միշտ սուրբ Կոյս Աստուածածի՛ն Մարիամ, մա՛յր Քրիստոսի, մատո՛ զաղաչանս մեր Որդւոյ քո եւ Աստուծոյ մերոյ:

ՄԱՂԹԱՆՔ
Փրկել զմեզ ի փորձութենէ եւ յամենայն վտանգից մերոց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն լսելի լինելոյ Տեառն Աստուծոյ ձայնի աղաչանաց մերոց՝ բարեխօսութեամբ սուրբ Աստուածածնին, եւ իջանելոյ ի վերայ մեր ողորմութեան եւ գթութեան Տեառն Աստուծոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԻ
Համբարձի զաչս իմ ի լերինս, ուստի եկեսցէ ինձ օգնութիւն:
Օգնութիւն ինձ ի Տեառնէ եկեսցէ, որ արար զերկինս եւ զերկիր:
Մի՛ տար ի սասանութիւն զոտն քո, եւ մի՛ ննջեսցէ պահապան քո,
Որպէս ոչ ննջէ եւ ոչ ի քուն երթայ պահապանն Իսրայելի:
Տէր պահեսցէ զքեզ եւ Տէր ընկալցի աջով ձեռամբ Իւրով:
Արեգակն ի տուէ զքեզ մի՛ մեղիցէ, եւ մի՛ լուսինն՝ ի գիշերի:
Տէր պահեսցէ զքեզ յամենայն չարէ, պահեսցէ Տէր զանձն քո:
Տէր պահեսցէ զմուտ եւ զել քո յայսմ հետէ մինչեւ յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՀԱՄԲԱՐՁԻ» ՇԱՐԱԿԱՆ

(Տրյ. Համօրէն մարտիրոսաց դձ. Ե.)

Յիշատակ է այսօր քաջ նահատակաց Քրիստոսի սրբոց վկայիցն. եկա՛յք, ժողովո՛ւրդք, ցնծութեամբ տօնեսցուք:
Քանզի տեւողք ի տանջանս եւ յաղթողք ի մարտի եւ պսակեալք ի Հօրէ. եկա՛յք, ժողովո՛ւրդք, ցնծութեամբ տօնեսցուք:
Լուսաւորեալք ի յերկրի, պայծառացեալք ի յերկինս եւ դասակցեալք ընդ հրեշտակս. եկա՛յք, ժողովո՛ւրդք, ցնծութեամբ տօնեսցուք:

ՔԱՐՈԶ
Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ զՏէր աղաչեսցուք: Ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Հա՛յր գթած, բարեխնամող, արարիչ ամենայն արարածոց, ընկա՛լ զպաղատանս ծառայից Քոց ի ժամ երեկոյիս, որ առատդ ես առ ամենեսեան պարգեւօք բարերարութեան Քո: Ողորմեա՛, Տէ՛ր, ամենայն աշխարհի եւ Եկեղեցւոյ Քում սրբոյ, հիւանդաց, վշտացելոց, ճանապարհորդաց, նաւորդաց, խոստովանողաց, ապաշխարողաց եւ հոգւոցն հանգուցելոց: Զի Դու, Տէ՛ր ամենակալ, գիտես զպէտս մեր եւ զկարիս, առաւել քան զոր խնդրեմք եւ իմանամք. եւ Քեզ ընդ Որդւոյ եւ Ամենասրբոյ Հոգւոյդ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ՆԱԽԱՏՕՆԱԿ

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ

Օրհ. Սրբոցն Ղեւոնդեանց դձ.

(Օրհ. Սրբոցն Ղեւոնդեանց դձ. Ա.)

Որ յառաջագոյն սահմանեցեր զփրկութիւն Հայաստանեայց՝ շնորհելով մեզ հրաւիրակ զերանելին զսուրբ Գրիգոր, օրհնեմք զՔեզ ընդ զօրս անմարմնականացն, Հա՛յր ամենակալ:
Որ նորին դաւանութեամբն խաչակից Քեզ ընտրեցեր զդասս քահանայիցն՝ շնորհաբաշխ օծութեամբ կարգեալ հովիւս եւ վարդապետս, գովեմք զՔեզ ընդ զօրս անմարմնականացն, Որդի՛դ Միածին:
Որ մաքրութեամբ աւազանին եւ փրկական հաղորդութեամբ զզինուորեալսն անուանդ Քո, պայծառացեալ արեամբն իւրեանց, յաղթող մարտիւ պսակեցեր, բարեբանեմք զՔեզ ընդ զօրս անմարմնականացն, Հոգի՛դ ճշմարիտ:

(Օրհ. Սրբոցն Ղեւոնդեանց դձ. Բ., 1-2 տներ)

Օրհնեմք զՔեզ, Շնորհատո՛ւ բարեաց, որ ընտրեցեր յորովայնէ զհրաւիրեալսն ի սկզբանէ փառաց Քոց հաղորդս. խնայեա՛ ի մեզ մաղթանօք սոցա:
Սահակայ եւ Յովսեփայ սուրբ հայրապետացն Ղեւոնդիէ սուրբ վարդապետն հրամանաւ լուսաւորել զարիական քաջ սպառազէնսն. խնայեա՛ ի մեզ մաղթանօք սոցա:

(Տրյ. Ծննդեան Յովհաննու Մկրտչին դձ.)

Այսօր ցնծան հրեշտակք ի յերկինս յիշատակաւ հողանիւթ հրեշտակին, որք համադասեալք ձայնին բարբառոյ՝ երգեն զօրհնութիւնս Հօր ի բարձունս:
Այսօր ցնծան հոգիք արդարոց, նահապետաց եւ մարգարէից՝ ձայնակից լինել մեծին ի ծնունդս կանանց, երգեն զօրհնութիւնս Որդւոյն Միածնի:
Այսօր ցնծան դասք առաքելոցն՝ տօնախմբելով զյիշատակ մեծի Մկրտչին, որ առաքելոցն է սկիզբն եւ մարգարէից լրումն. ընդ նոսին եւ մեք Բղխեցելոյն ի Հօրէ երգեմք զփառս ի բարձունս:

(Մնկ. Սրբոյն Գրիգորի Լուսաւորչին ելանելոյն ի վիրապէն դձ.)

Հրաշափառ Աստուա՛ծ եւ միշտ Բարեխնամո՛ղ, որ յառաջ գիտութեամբ զփրկութիւն Հայաստանեայց սկզբնաւորեալ՝ ի Պարթեւական մեղապարտ ազգէն լուսաւորիչ մեզ շնորհեցեր, վասն որոյ բարեխօսութեամբ սորա, Փրկի՛չ, կեցո՛ զմեզ այժմ եւ ի Քո յահաւոր գալստեանն:
Հրաշալի զարմացմամբ երանելին սուրբ Գրիգոր զանտանելի զչարչարանս ի յանձն էառ եւ երիւք հնգօք ամօք ի մէջ թունաւորացն բնակէր անդնդային տանջանօքն ի վիրապին. վասն որոյ բարեխօսութեամբ սորա, Փրկի՛չ, կեցո՛ զմեզ այժմ եւ ի Քո յահաւոր գալստեանն:
Հրաշագործ Քո բանիւդ եւ մեծ ողորմութեամբ ելեալ բժշկէր զհարուածեալսն ի դիւաբաղխ սաստիցն՝ երկրպագուս առնելով զամենեսեան Սուրբ Երրորդութեանդ. վասն որոյ բարեխօսութեամբ սորա, Փրկի՛չ, կեցո՛ զմեզ այժմ եւ ի Քո յահաւոր գալստեանն:

(Մնկ. Իգնատիոսի հայրապետին դձ.)

Որ հրաւիրեցեր զյառաջագոյն ընտրեալսն ի սկզբանէ աշխարհի ի հարսանիսն անապական՝ կոչելով յուրախութիւն ընդ բազմելոցն յառագաստին զաստուածազգեացն, աղաչանօք սորա կեցո՛ զմեզ, փառա՛ց Թագաւոր:
Որ յաթոռս քերովբէականս վերանստեալ հանգչէիր, Որդի՛ Աստուծոյ, հաճեցար խոնարհութեամբ բառնալ ի գիրկս յորդւոց Ադամայ, աղաչանօք սորա կեցո՛ զմեզ, փառա՛ց Թագաւոր:

(Տրյ. Սրբոց մարգարէից դձ.)

Այսօր, ժողովո՛ւրդք, որք ի հեթանոսաց՝ հրաւիրեալք յառաջագոյն մարգարէիւք գալ առ Աստուածն Աբրահամու յերկրպագութիւն, օրհնեցէ՛ք զՏէր յերկինս ընդ երկնաւորացն:
Այսօր, որդի՛ք դստեր վերին Սիոնի՝ շինեալք ի վերայ հիման առաքելոց եւ մարգարէից, որք եւ ըմպէք զառատաբուղխ վտակ Հոգւոյն ի յաղբերացն Իսրայելի յԵկեղեցիս սրբոց, օրհնեցէ՛ք զՏէր յօրհնութիւն ի նոր:
Այսօր վերին զօրացն համաձայնեալք դասք նահապետաց եւ մարգարէից՝ երգեն Աստուծոյ զերգս հոգեւորս. ի յիշատակի սոցա երգեմք եւ մեք զփառս ի բարձունս:

(Օրհ. Հոգեգալստեան Ա աւուր դձ. Ա.)

Առաքելոյ աղաւնոյ իջանելով մեծաձայն հնչմամբ ի բարձանց՝ ի նմանութիւն լուսոյ փայլման հրազինեաց անկիզելի զաշակերտսն, մինչդեռ նստէին ի սուրբ վերնատանն:
Աննիւթական աղաւնի, անքննելի, որ քննէ զխորս Աստուծոյ, զոր առեալ ի Հօրէ՝ պատմէ զահաւոր եւ զմիւսանգամ գալուստն, զոր քարոզեցին համագոյական:
Օրհնութի՜ւն ի բարձունս՝ Ելողին ի Հօրէ՝ Հոգւոյն Սրբոյ, Որով առաքեալքն արբեցան անմահական բաժակաւն եւ հրաւիրեցին զերկիրս ի յերկինս:

(Տրյ. Հանգստեան դձ. Դ.)

Ժամանակ դարձի իմոյ եհաս ի յերկիր. արդ, Տէ՛ր, ընկա՛լ զծառայս Քո, եւ Հոգի Քո բարի առաջնորդեսցէ ինձ ի յերկիր ուղիղ։
Խոստովանող հոգիս, որ ելից զունայնութեան ընթացս աշխարհի, արդ, Տէ՛ր, ընկա՛լ զծառայս Քո, եւ Հոգի Քո բարի առաջնորդեսցէ ինձ ի յերկիր ուղիղ։
Ի վերջնումն աւուր մեծի, յորժամ առնես զայցելութիւն Քոյոց սիրողաց, յայնժամ խնայեա՛ ի ծառայս Քո, եւ Հոգի Քո բարի առաջնորդեսցէ ինձ ի յերկիր ուղիղ։

(Մեծ. դձ.)

Զքեզ օրհնութեամբ մեծացուցանեմք:
Որ զԲանն Աստուած յարգանդի կրեցեր, սրբուհի՛ անարատ, եւ անճառապէս ծնար զՎերաձգողն երկնից, զքեզ օրհնութեամբ մեծացուցանեմք:
Որ էից Լուսոյն արժանի եղեր բառնալոյ ի քո գիրկս եւ Արեգականն արդարութեան եղեր արեւելք, զքեզ օրհնութեամբ մեծացուցանեմք:

(Ողր. Շողակաթին դձ.)

Որ հաստատեցեր բանիւ զԵկեղեցի Քո, Քրիստո՛ս, ի վերայ առաքելական վիմի՝ երգել ի սմա զերգս հոգեւորս:
Կանգնեալ ի սմա սեղան սրբութեան՝ բաշխէ զմարմին Իւր եւ զարիւն եւ տայ ի սմանէ մեզ նորոգութիւն ի թողութիւն մեղաց մերոց:
Իջեալ Հոգւոյն Սրբոյ աղաւնակերպ երեւմամբ ի վերայ մարմնոյ եւ արեանն Տեառն ի բժշկութիւն հոգւոց մերոց:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

(Օրհ. Սրբոցն Ղեւոնդեանց դձ. Բ., 3-րդ տուն)

Որ զմերկացեալսն յանճառ լուսոյն, զսեւացեալսն ի գոյն այծեաց, որոշելով ի սուրբ հօտէն, ընտրեալ զՔոյսն հաւաքեցեր, խնայեա՛ ի մեզ մաղթանօք սոցա:

(Հրց. Սրբոցն Ղեւոնդեանց դկ.)

Որ անդադար փառաբանիս յանմարմնոցն, քահանայք սուրբ լուսածնունդ զաւակօք զՔեզ բարեբանեմք, Աստուա՛ծ հարցն մերոց:
Որ ի շառաւիղէ Քոց սրբոց քարոզչացն պսակեալ ցուցեր զՀայաստան աշխարհս, զՔեզ բարեբանեմք, Աստուա՛ծ հարցն մերոց:
Որք արբին զհուրն կենդանի ընդ հրաւիրեալսն ի վերնատանն, յորդաբուղխ բանիւ շնորհաց լուսատու եղեն մանկանցն՝ արեամբ մկրտելով ընդ Քեզ, զՔեզ բարեբանեմք, Աստուա՛ծ հարցն մերոց:
Գ. ԶՏէր. Ամենայն ա՛զգ եւ ազի՛նք, ամենայն գո՛րծք Աստուծոյ, զԹագաւո՛րն ամենեցուն օրհնեցէք՝ զՀայրն երկնաւոր, եւ բա՛րձր արարէ՛ք զՆա յաւիտեան:
Որ հալածեաց զխաւար մեղաց ի տանէ Թորգոմական, զՀանդիսադի՛րն ամենեցուն գովեցէք՝ զԱստուածորդին, եւ բա՛րձր արարէք զՆա յաւիտեան:
Որ պսակեացն զՀայաստան նորասքանչ լուսաւորչօք, բարեբանեցէ՛ք զՍուրբ Հոգին, որդի՛ք լուսոյ, նո՛ր Իսրայէլ, եւ բա՛րձր արարէք զՆա յաւիտեան:

(Մեծ. դկ.)

Նահապետացն Աբրահամու, Իսահակայ եւ Յակոբայ պարգեւեցար ի յԱստուծոյ, Կո՛յս Մարիամ, դուստր նոցին. երանեն ազգ եւ ազինք այսօր զծնեալդ ի յԱննայէ:
Աղախի՛ն եւ մա՛յր Կենաց, Աջոյն ծնո՛ղ Հօր Միածնին, որ առ ի քէն մարմնովն ընկէց զամբարտաւանն յաթոռոյ, երանեն ազգ եւ ազինք այսօր զծնեալդ ի յԱննայէ:
Որ բարձրացոյց զանկեալ բնութիւնս ի քէն ծննդեամբ Որդին յերկինս, զկարօտեալքս ելից հացիւ եւ զմեծատունն ելոյծ ունայն, երանեն ազգ եւ ազինք այսօր զծնեալդ ի յԱննայէ:

(Ողր. Սրբոցն Ղեւոնդեանց դկ.)

Արեգակն արդարութեան ի Հայաստան ծագեալ՝ պայծառացուցեր սուրբ զԵկեղեցի հեղմամբ արեան սրբոցն. մաղթանօք սոցա խնայեա՛ ի մեզ, Պարգեւատո՛ւ բարեաց, եւ ողորմեա՛ Քո արարածոց:
Պանծալի սուրբ զաւակօք հովիւքն զուարթունք հրով Հոգւոյն շիջուցին զբոցն զկրակապաշտ Պարսիցն. մաղթանօք սոցա խնայեա՛ ի մեզ, Պարգեւատո՛ւ բարեաց, եւ ողորմեա՛ Քո արարածոց:
Պարթեւական տեսանողին յառաջագոյն ազդեցութեամբ զհաւատոյ որդիս սրբոյն Գրիգորի պսակազարդ տեսեալ. մաղթանօք սոցա խնայեա՛ ի մեզ, Պարգեւատո՛ւ բարեաց, եւ ողորմեա՛ Քո արարածոց:

(Տրյ. Սրբոցն Ղեւոնդեանց դկ.)

Երկնային հրաւիրակօք կոչեցեալք ի սկզբանէ փրկական բանին պատմողք եւ պարծանք Հայաստանեայց՝ դասակցեալք ընդ զօրս անմարմնականացն:
Զվիշապն անդնդային՝ նմանեալ փարաւոնի, զգազանացեալ զթագաւորն գործակցօք չարին սուզեալ, զյաղթականն երգեն զօրհնութիւնս Տեառն:
Հաւատոյ զինուք վառեալ Մամիկոնեան զօրավարին յաշխարհօրէն պատերազմին ախոյեանն Եկեղեցւոյ. անճառիցն եղեւ ժառանգորդ բարեաց:
Ախտակցաբար արտասուեսցուք զուրացողսն հաւատոյ՝ ընդ սրբոց հայրապետացն երգելով զփառս ի բարձունս Փրկողին զմեզ մաղթանօք սոցա:

ՄԱՂԹԱՆՔ
Քրիստոս Աստուա՛ծ մեր, վասն սուրբ խաչի Քո պատուականի զխաղաղութիւն Քո տո՛ւր մեզ, Տէ՛ր:
Վասն սրբուհւոյ Աստուածածնին եւ Յովհաննու Կարապետին եւ սրբոյն Ստեփանոսի Նախավկային զխաղաղութիւն Քո տո՛ւր մեզ, Տէ՛ր:
Վասն սրբոց Քոց առաքելոց, մարգարէից, վարդապետաց, մարտիրոսաց, հայրապետաց, ճգնաւորաց, կուսանաց, միանձանց եւ երկնային զօրացն զխաղաղութիւն Քո տո՛ւր մեզ, Տէ՛ր:
Եւ վասն նախկին լուսաւորչացն մերոց Թադէոսի եւ Բարթողիմէոսի եւ սրբոց Յակոբեանց՝ երջանիկ առաքելոցն, եւ սրբոյն Գրիգորի մերոյ Լուսաւորչին եւ սրբոցն Յակոբայ Մծբնայ հայրապետին, Մարուգէի ճգնաւորին, Մելիտոսի եպիսկոպոսին եւ Գէորգայ զօրավարին, բարեխօսութեամբ, յիշատակաւ եւ աղօթիւք սրբոց Ղեւոնդեանց քահանայիցն, որոց այսօր է յիշատակ, զխաղաղութիւն եւ զմեծ զողորմութիւն Քո պարգեւեա՛ մեզ, մարդասէ՛ր Տէր:

ՔԱՐՈԶ
Սուրբ ճգնաւորօքն աղաչեսցուք զՏէր, որք զչարսն պարտեցին, նեղութեանցն համբերեցին, լուսեղէն եւ երկնային անթառամ պսակացն արժանի եղեն: Աղօթիւք նոցա եւ բարեխօսութեամբ մեզ ողորմեսցի:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Որ ընտրեցեր եւ ընկալար զերանելի զվկայսն Քո, Քրիստոս Աստուա՛ծ մեր, եւ հաղորդս արարեր զնոսա կամաւոր չարչարանաց Քոց, արդ, բարեխօս առ Քեզ ունիմք, որք աստ եւ ընդ ամենայն տիեզերս սուրբք իցեն. որպէս զի աղօթիւք նոցա եւ բարեխօսութեամբ խաղաղացուսցես զկենցաղավարութիւնս մեր՝ փրկելով զմեզ յերեւելի եւ յաներեւոյթ թշնամւոյն: Շնորհեա՛ մեզ, Տէ՛ր, ըստ օրինակի նոցա կեալ եւ զվախճանն մեր կնքեա՛ ուղղափառ խոստովանութեամբ ի յոյս կենացն յաւիտենից: Զի եւ մեք արժանի եղիցուք մտանել յերկնային խորանսն լուսոյ եւ ժառանգել զպատրաստեալն ի սկզբանէ աշխարհի սրբոց Քոց զարքայութիւնդ. եւ ընդ նոսին գոհանալով փառաւորեսցուք զՔեզ ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: