---

Կարգաւորութիւն հասարակաց աղօթից Առաւօտու ժամուն,
որ կատարի ի դէմս Որդւոյն Աստուծոյ, որ երեւեցաւ իւղաբերիցն

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Լցաք առաւօտու ողորմութեամբ Քով, ցնծացաք եւ ուրախ եղաք զամենայն աւուրս կենաց մերոց:
Ուրախ եղաք փոխանակ աւուրցն, յորս խոնարհ արարեր զմեզ, եւ ամացն՝ յորս տեսաք զչարչարանս:
Հայեա՛, Տէ՛ր, ի ծառայս Քո եւ ի գործս ձեռաց Քոց եւ առաջնորդեա՛ որդւոց նոցա. եղիցի լոյս Տեառն Աստուծոյ ի վերայ մեր:
Զգործս ձեռաց մերոց ուղի՛ղ արա ի մեզ, Տէ՛ր, եւ զգործս ձեռաց մերոց յաջողեա՛ մեզ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՕՐՀՆՈՒԹԻՒՆ ԵՐԻՑ ՄԱՆԿԱՆՑՆ
Օրհնեալ ես, Տէ՛ր Աստուած հարցն մերոց, գովեալ եւ փառաւորեալ է անուն Քո յաւիտեան:
Յիրաւունս անցուցեր զայս ամենայն ընդ մեզ. արդար ես Դու, Տէ՛ր, եւ ամենայն գործք Քո ճշմարիտ են:
Ճանապարհք Քո ուղիղ են, եւ ամենայն դատաստանք Քո արդար են:
Դատաստան արդարութեան ածեր ի վերայ մեր ըստ ամենայնի, զոր ինչ ածեր ի վերայ մեր, եւ քաղաքի սրբոյ հարցն մերոց Երուսաղեմի:
Արդարութեամբ եւ յիրաւի ածեր զայս ամենայն ի վերայ մեր վասն մեղաց մերոց:
Անօրինեցաք եւ յանցեաք ապստամբ լինիլ ի Քէն, մեղաք յամենայնի եւ պատուիրանաց Քոց մեք ոչ անսացաք:
Ոչ պահեցաք եւ ոչ արարաք, որպէս պատուիրեցեր Դու մեզ, զի զբարիս գտցուք մեք ի Քէն:
Արդ, զամենայն, զոր արարեր եւ զոր ինչ ածեր ի վերայ մեր, արդար դատաստանաւ արարեր:
Մատնեցեր զմեզ ի ձեռս թշնամեաց մերոց՝ անօրինաց, խստաց եւ ապստամբողաց:
Ի ձեռս թագաւորի անօրինի եւ չարի քան զամենայն երկիր մատնեցեր զմեզ:
Եւ արդ, ոչ գոյ մեզ ժամ բանալ զբերանս մեր, զի ամօթ եւ նախատինք եղաք ծառայից Քոց եւ պաշտօնէից:
Այլ մի՛ մատներ զմեզ ի սպառ վասն անուան Քո, մի՛ ցրեր զուխտս Քո եւ մի՛ ի բացեայ առներ զողորմութիւնս Քո ի մէնջ:
Վասն Աբրահամու սիրելւոյ Քո, Իսահակայ ծառայի Քո եւ Իսրայելի սրբոյ Քո:
Խոստացար նոցա եւ ասացեր. «Բազմացուցից զզաւակ ձեր որպէս զաստեղս երկնից բազմութեամբ եւ որպէս զաւազ առ ափն ծովու»:
Եւ արդ, Տէ՛ր, նուազեցաք մեք քան զամենայն ազգս եւ եմք տառապեալ յամենայն երկրի այսօր վասն մեղաց մերոց:
Ոչ գոյ ի ժամանակի յայսմիկ իշխան, մարգարէ եւ առաջնորդ. ո՛չ ողջակէզք պատարագաց, ո՛չ խունկք օրինաց եւ ո՛չ տեղի պատարագս մատուցանելոյ առաջի Քո եւ զողորմութիւն գտանել ի Քէն:
Այլ անձամբք խոնարհեալ եւ հոգւով տառապանաց ընդունելի լիցուք մեք որպէս զողջակէզս խոյոց եւ զուարակաց եւ որպէս բիւրաւորս գառանց պարարտաց:
Այնպէս ընդունելի լիցին պատարագք մեր այսօր առաջի Քո, զի կատարեալ գտցուք զկնի Քո, զի չիք ամօթ յուսացելոցս ի Քեզ:
Եւ արդ, գամք զհետ Քո ամենայն սրտիւք մերովք, երկնչիմք ի Քէն եւ խնդրեմք զերեսս Քո. Տէ՛ր, մի՛ յամօթ առներ զմեզ:
Այլ արա՛ առ մեզ ըստ հեզութեան Քում եւ ըստ բազում ողորմութեան Քում. փրկեա՛ զմեզ վասն սքանչելեաց Քոց, Տէ՛ր, եւ փառաւորեսցի անուն Քո յաւիտեան:
Յամօթ լիցին ամենեքեան, որք չարչարեն զծառայս Քո. ամաչեցեալ լիցին բռնութիւնք նոցա, եւ ամենայն զօրութիւնք նոցա խորտակեսցին:
Եւ ծանիցեն, զի Դու ես Տէր Աստուած միայն, որ փառաւորեալդ ես ի վերայ ամենայն տիեզերաց:
Օրհնեալ ես Դու, Տէ՛ր Աստուած հարցն մերոց, գովեալ եւ առաւել բարձրացեալ յաւիտեան:
Եւ օրհնեալ է անուն սուրբ փառաց Քոց, գովեալ եւ առաւել բարձրացեալ յաւիտեան:
Օրհնեալ ես ի տաճարի փառաց սրբութեան Քո, գովեալ եւ առաւել բարձրացեալ յաւիտեան:
Օրհնեալ ես ի վերայ աթոռոյ արքայութեան Քո, գովեալ եւ առաւել բարձրացեալ յաւիտեան:
Օրհնեալ ես, որ նստիս ի քերովբէս եւ հայիս յանդունդս, գովեալ եւ առաւել բարձրացեալ յաւիտեան:
Օրհնեալ ես ի վերայ հաստատութեան երկնից, գովեալ եւ առաւել բարձրացեալ յաւիտեան:
Օրհնեցէ՛ք, ամենայն գո՛րծք Տեառն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, երկի՛նք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, հրեշտա՛կք Տեառն եւ ջո՛ւրք, որ ի վերայ երկնից, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, զօրութի՛ւնք Տեառն, արեգա՛կն եւ լուսի՛ն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, աստե՛ղք երկնից, անձրե՛ւք եւ ցօ՛ղք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, ամենայն հո՛ղմք, հո՛ւր եւ ջե՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, ցո՛ւրտ եւ տօ՛թ, ցօ՛ղ եւ ձիւնաբե՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, սա՛ռն եւ պա՛րզ, եղեա՛մն եւ ձի՛ւն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, տի՛ւք եւ գիշե՛րք, լո՛յս եւ խաւա՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, ա՛մպք եւ փայլատակո՛ւնք եւ երկի՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, լերի՛նք եւ բլո՛ւրք եւ ամենայն բո՛յսք երկրի, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, աղբի՛ւրք, ծո՛վք եւ գե՛տք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, կէ՛տք եւ ամենայն կայտա՛ռք, որ ի ջուրս, եւ թռչո՛ւնք երկնից, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, գազա՛նք եւ անասո՛ւնք եւ որդի՛ք մարդկան, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեսցէ Իսրայէլ զՏէր, օրհնեսցէ եւ բարձր արասցէ զՆա յաւիտեան:
Օրհնեցէ՛ք, քահանա՛յք, զՏէր. օրհնեցէ՛ք եւ բա՛րձր արարէք զՆա յաւիտեան
Օրհնեցէք, ծառա՛յք Տեառն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, անձի՛նք եւ շո՛ւնչք արդարոց, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, սո՛ւրբք եւ խոնա՛րհք սրտիւք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, Անանիա՛, Ազարիա՛ եւ Միսայէ՛լ, զՏէր. օրհնեցէ՛ք եւ բա՛րձր արարէք զՆա յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Օրհնեցէ՛ք, ամենա՛յն արարածք, զԱրարիչն արարածոց, զՏէրն տերանց, զԹագաւորն թագաւորաց, զԱստուածն աստուածոց:
Օրհնեցէ՛ք, գովեցէ՛ք, բարեբանեցէ՛ք, զի քաղցր է, զի յաւիտեան է ողորմութիւն Նորա:

«ՀԱՐՑ» ՇԱՐԱԿԱՆ

(Հրց. Սրբոյ Զատկին դկ.)

Այսօր մեծ աւետիք Ադամայ նախաստեղծին տուաւ. արի՛, որ ննջես, լուսատու եղեւ քեզ յարուցեալն Քրիստոս՝ Աստուած հարցն մերոց:
Այսօր ձայն աւետեաց յԵւայի գոչեն լսելիս դստերքն իւղաբերք. տեսաք յարուցեալ զյարութիւնն Քո զՔրիստոս, Աստուա՛ծ հարցն մերոց:
Այսօր հրեշտակք յերկնից իջեալ՝ տան զաւետիս մարդկան. յարեաւ Խաչելեալն, եւ յարոյց զձեզ ընդ Ինքեան Աստուած հարցն մերոց:
Գ. ԶՏէ՛ր օրհնեցէք եւ բա՛րձր արարէք զՆա յաւիտեան:
Այսօր Տէրն մեր յարեաւ. եկա՛յք պարեսցուք ընդ հրեշտակս յաղթական երգով. օրհնեցէ՛ք եւ բա՛րձր արարէք զՆա յաւիտեան:
Այսօր սիւն լուսոյ ծագեաց սուրբ Եկեղեցւոյ Յարուցեալն ի մեռելոց Քրիստոս. օրհնեցէ՛ք եւ բա՛րձր արարէք զՆա յաւիտեան:

ՔԱՐՈԶ
Եկեալքս ամենեքեան ի սուրբ, կաթողիկէ եւ առաքելական Եկեղեցի աղաչեսցուք զՄիածին Որդին Աստուծոյ՝ զՏէրն մեր եւ զՓրկիչն Յիսուս Քրիստոս, որ էջ փառօք Հօր ի մէջ հնոցին եւ փրկեաց զերիս մանկունսն ի Քաղդէացւոց անտի. լուսաւոր եւ սուրբ պահեսցէ զմիտս մեր, զի մի՛ երբեք խաբիցուք մեք ի մեղաց եւ ի ցանկութենէ աշխարհի: Այլ արժանի եղիցուք պահել զպատուիրանս Նորա, առնուլ զպսակն լուսոյ եւ կենաց ի յանձինս մեր, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս՝ Տէր մեր. կեցո՛ եւ ողորմեա՛:

ՄԱՂԹԱՆՔ
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Հզօր, յաղթող, սքանչելագործ, սուրբ եւ մեծի յարութեանն Քրիստոսի Աստուծոյ մերոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ԵՐԳ ՄԱՐԻԱՄՈՒ ԱՍՏՈՒԱԾԱԾՆԻՆ
Մեծացուսցէ անձն իմ զՏէր, եւ ցնծասցէ հոգի իմ Աստուծով Փրկչաւ իմով:
Այց արար ի վերայ խոնարհութեան աղախնոյ Իւրոյ. այսուհետեւ երանիցեն ինձ ամենայն ազգք:
Արար ընդ իս մեծամեծս Հզօրն. եւ Սուրբ է անուն Նորա:
Ողորմութիւն արար ազգաց յազգս երկիւղածաց Իւրոց, արար զօրութիւն բազկաւ Իւրով:
Ցրուեաց զամբարտաւանս ի մտաց սրտից եւ քակեաց զհզօրս յաթոռոց:
Զխոնարհս բարձրացոյց, զկարօտս ելից բարութեամբ եւ զմեծատունս արձակեաց ունայնս:
Պաշտպանեաց Իսրայելի ծառայի Իւրոյ՝ յիշելով զողորմութիւն Իւր:
Որպէս խօսեցաւ առ հարսն մեր ընդ Աբրահամու եւ զաւակի նորա յաւիտեան:

ՕՐՀՆՈՒԹԻՒՆ ԶԱՔԱՐԻԱՅԻ՝ ՀՕՐՆ ՅՈՎՀԱՆՆՈՒ ՄԿՐՏՉԻ
Օրհնեալ Տէր Աստուած Իսրայելի, որ յայց ել եւ արար փրկութիւն ժողովրդեան Իւրոյ:
Յարոյց մեզ եղջիւր փրկութեան ի տանէ Դաւթի ծառայի Իւրոյ, որպէս խօսեցաւ բերանովք սրբոցն, որ յաւիտենից մարգարէքն էին:
Փրկութիւն ի թշնամեաց մերոց եւ ի ձեռաց ամենայն ատելեաց մերոց:
Առնել ողորմութիւն առ հարս մեր եւ յիշել զկտակարանս սրբութեան Իւրոյ:
Երդումն, զոր երդուաւ Աբրահամու հօր մերոյ՝ տալ մեզ առանց երկիւղի զփրկութիւն թշնամեաց մերոց:
Պաշտել զՆա սրբութեամբ եւ արդարութեամբ առաջի Նորա զամենայն աւուրս կենաց մերոց:
Եւ դու, մանո՛ւկ, մարգարէ Բարձրելոյն կոչեսջիր, գնասցես առաջի Տեառն՝ պատրաստել զճանապարհս Նորա, տալ զգիտութիւն փրկութեան ժողովրդեան Իւրոյ՝ ի թողութիւն ամենայն մեղաց մերոց, վասն գթոյ ողորմութեան Տեառն Աստուծոյ մերոյ, որով երեւեցաւ մեզ Արեգակն ի բարձանց՝ լուսաւոր առնել զխաւար մեր, ծագել լոյս ի վերայ այսոցիկ, որ նստէաք ի խաւարի եւ ի ստուերս մահու, ուղղել զոտս մեր ի ճանապարհս խաղաղութեան:

ԱՂՕԹՔ ՍԻՄԷՈՆԻ ԾԵՐՈՒՆՒՈՅՆ
Արդ արձակեա զծառայս Քո, Տէ՛ր, ըստ բանի Քում ի խաղաղութիւն, զի տեսին աչք իմ զփրկութիւն Քո, զոր պատրաստեցեր առաջի ամենայն ժողովրդոց. լոյս յայտնեցաւ հեթանոսաց եւ փառք՝ ժողովրդեան Քում Իսրայելի:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՄԵԾԱՑՈՒՍՑԷ» ՇԱՐԱԿԱՆ

(Մեծ. Սրբոյ Զատկին դկ.)

Աստուածածի՛ն, տաճա՛ր լուսոյ, որ մարմնով պարագրեալ՝ անճառաբար ծնար զԲանն Աստուած, զքեզ բարեբանեալ մեծացուցանեմք:
Ուրա՛խ լեր եւ բերկրեա՛, մա՛յր եւ Կո՛յս, քանզի Ծնեալն ի Կուսէդ այսօր վերստին յարութեամբ ծնաւ ի կոյս գերեզմանէն. զքեզ բարեբանեալ մեծացուցանեմք:
Ցնծա՛ եւ զուարճացի՛ր, հա՛րսն ի յերկրէ երկնից, քանզի այսօր երկնայնոցն իջեալ՝ տային քեզ զաւետիս յարութեան Միածնի Որդւոյ քո. զքեզ բարեբանեալ մեծացուցանեմք:

ՔԱՐՈԶ
Եւ եւս խաղաղութեան զՏէր աղաչեսցուք:
Տէ՛ր, ողորմեա՛:
Վասն սուրբ տեղւոյս շինութեան եւ բարեկարգութեան զՏէր աղաչեսցուք:
Տէ՛ր, ողորմեա՛:
Տէ՛ր, ողորմեա՛:
Վասն ժողովրդեանս, որք մտանեն ընդ դրունս սրբոյ եկեղեցւոյ, զՏէր աղաչեսցուք:
Տէ՛ր, ողորմեա՛:
Վասն ընդունելոյ զպաղատանս սոցա ըստ մեծի ողորմութեան Իւրում զՏէր աղաչեսցուք:
Տէ՛ր, ողորմեա՛:
Եւ եւս՝ միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Դու ես Թագաւոր յաւիտեանս յաւիտենից, Քրիստոս Աստուա՛ծ մեր, եւ Քեզ ընդ Հօր եւ Հոգւոյդ Սրբոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ԵՐԳ ԻՒՂԱԲԵՐԻՑ ԱՒԵՏԱՐԱՆԻՆ
Եղիցի անուն Տեառն օրհնեալ յայսմ հետէ մինչեւ ի յաւիտեան:
Օրհնեցէ՛ք, մանկո՛ւնք, զՏէր, եւ օրհնեցէ՛ք զանուն Տեառն:
Եղիցի անուն Տեառն օրհնեալ յայսմ հետէ մինչեւ ի յաւիտեան:
Յարեւելից մինչեւ ի մուտս արեւու օրհնեալ է անուն Տեառն. ի յայսմ հետէ մինչեւ ի յաւիտեան:
Փա՜ռք եւ երկրպագութի՜ւն Հօր եւ Որդւոյ եւ Սրբոյ Հոգւոյն եւ այժմ եւ միշտ եւ յաւիտեանս յաւիտենից. ամէն. ի յայսմ հետէ մինչեւ ի յաւիտեան:
Արի՛, Տէ՛ր, օգնեա՛ մեզ եւ փրկեա՛ զմեզ վասն անուան Քո:
Արի՛ եւ մի՛ մերժեր զմեզ ի սպառ վասն անուան Քո:
Թագաւորեսցէ Տէր յաւիտեան՝ Աստուած Քո, Սիո՛ն, ազգէ յազգ:
Օրհնեա՛, ա՛նձն իմ, զՏէր. օրհնեցից զՏէր ի կենդանութեան իմոյ:
Սրկ. Օրթի:
Քհ. Խաղաղութի՜ւն ամենեցուն:
Դպ. Եւ ընդ հոգւոյդ քում:
Սրկ. Երկիւղածութեամբ լուարո՛ւք:Քհ. Սրբոյ Աւետարանիս Յիսուսի Քրիստոսի, որ ըստ Յովհաննու:
Դպ. Փա՜ռք Քեզ, Տէր Աստուա՛ծ մեր:
Սրկ. Պռօսխումէ:
Դպ. Ասէ Աստուած:

ԱՒԵՏԱՐԱՆ ԻՒՂԱԲԵՐԻՑ
(Յովհ. 20.1-18)

Վասն յարութեան Տեառն մերոյ Յիսուսի Քրիստոսի

Եւ ի միաշաբաթոջն Մարիամ Մագդաղենացի գայ առաւօտուն ընդ արշալոյսն ի գերեզման անդր եւ տեսանէ զվէմն՝ բարձեալ ի դրաց գերեզմանին:
Ապա ընթանայ եւ գայ առ Սիմոն Պետրոս եւ առ միւս աշակերտն, զոր սիրէրն Յիսուս, եւ ասէ ցնոսա. «Բարձին զՏէր ի գերեզմանէ անտի, եւ ոչ գիտեմ, ուր եդին զՆա»:
Ել Պետրոս եւ միւս աշակերտն եւ գային ի գերեզմանն. ընթանային երկոքեան ի միասին. եւ միւս աշակերտն յառաջեաց ընթացաւ վաղագոյն քան զՊետրոս եւ եկն նախ ի գերեզմանն. եւ խոնարհեալ տեսանէ, զի կային անդ կտաւքն, բայց ի ներքս ոչ եմուտ:
Եկն եւ Սիմոն Պետրոս, որ գայրն զկնի նորա, եւ եմուտ ի գերեզմանն. եւ տեսանէ զկտաւսն, զի կային անդ. եւ վարշամակն, որ էր ի գլուխ Նորա, ոչ ընդ այլ կտաւսն կայր, այլ՝ ուրոյն ծալեալ ի մի կողմն:
Յայնժամ եմուտ եւ միւս աշակերտն, որ եկեալն էր յառաջագոյն ի գերեզմանն, ետես եւ հաւատաց. զի չեւ եւս գիտէին զգիրս, թէ պարտ է Նմա ի մեռելոց յառնել:
Չոգան դարձեալ առ միմեանս աշակերտքն:
Բայց Մարիամ կայր արտաքոյ գերեզմանին եւ լայր. եւ մինչ դեռ լայր, խոնարհեցաւ ի գերեզմանն եւ տեսանէ երկուս հրեշտակս ի սպիտակս, զի նստէին մի ի սնարից եւ մի յանոտից, ուր կայր մարմինն Յիսուսի:
Եւ նոքա ասեն ցնա. «Կի՛ն դու, զի՞ լաս»:
Ասէ ցնոսա. «Զի բարձին զՏէրն իմ ի գերեզմանէ աստի, եւ ոչ գիտեմ, ուր եդին զՆա»:
Զայս իբրեւ ասաց, դարձաւ ի թիկունս կոյս եւ տեսանէ զՅիսուս, զի կայր. եւ ոչ գիտէր, թէ Յիսուս իցէ:
Ասէ ցնա Յիսուս. «Կի՛ն դու, զի՞ լաս, զո՞ խնդրես»:
Նմա այսպէս թուեցաւ, թէ պարտիզպանն իցէ, ասէ ցնա. «Տէ՛ր, եթէ դու բարձեր զՆա, ասա՛ ինձ, ո՞ւր եդիր զՆա, զի ես առից զՆա»:
Ասէ ցնա Յիսուս. «Մարիա՛մ»:
Եւ նա դարձաւ եւ ասէ ցՆա եբրայեցերէն «Րաբբունի՛», որ թարգմանի «վարդապետ»:
Ասէ ցնա Յիսուս. «Մի՛ մերձենար յԻս, զի չեւ եւս ելեալ եմ առ Հայր Իմ. այլ ե՛րթ դու առ եղբարսն Իմ եւ ասա՛ ցնոսա. «Ելանեմ Ես առ Հայր Իմ եւ առ Հայր ձեր եւ Աստուածն Իմ եւ Աստուած ձեր»»:
Գայ Մարիամ Մագդաղենացի եւ պատմէ աշակերտացն, եթէ ետես նա զՏէր, եւ զայս ինչ ասաց ցնա:

ԵՐԳ
զկնի Իւղաբերից աւետարանին

Փա՜ռք յարութեան Քո, Տէ՛ր. ոչ դադարեցայց, Քրիստո՛ս, օրհնել զՔեզ զամենայն աւուրս կենդանութեան իմոյ:
Փա՜ռք յարութեան Քո, Տէ՛ր. ոչ դադարեցայց, Յիսո՛ւս, գովել զՔեզ զամենայն աւուրս կենդանութեան իմոյ:
Ես ոչ դադարեցայց, Փրկի՛չ, փառաւորել զՔեզ զամենայն աւուրս կենդանութեան իմոյ:
Փոխ Ի գիշերի համբարձէ՛ք զձեռս ձեր ի սրբութիւն եւ օրհնեցէ՛ք զՏէր:
Աստ օրհնեցէ՛ք, ամենայն ծառա՛յք Տեառն, զՏէր ի սրբութիւն. եւ օրհնեցէ՛ք զՏէր:

Լուսապայծառ հրեշտակն նստելով ի կենսատու գերեզմանին եւ աւետէր կանանցն. «Յարեաւ Աստուած»:

ՔԱՐՈԶ
զկնի Իւղաբերից աւետարանին եւ երգոյն
Զուարճացեալքս մեծաւ ուրախութեամբ աւետեօք յարութեան Տեառն մերոյ եւ Փրկչին Յիսուսի Քրիստոսի, որ եղեւ պտուղ եւ անդրանիկ ամենայն ննջեցելոց, խորտակեաց զդրունս դժոխոց եւ ելոյծ զբռնութիւն մահու եւ ետ յոյս հաստատութեան վերստին նորոգման կենդանութեան ամենայն մարդկան, խնդրեսցուք հաւատով ի Փրկչէն մերմէ Յիսուսէ Քրիստոսէ, զի զմեզ արժանի արասցէ յարութեան Իւրոյ՝ կերպարանակից առնել զմարմին խոնարհութեան մերոյ՝ ըստ նմանութեան մարմնոյ փառաց Իւրոց: Վասն զի զայս խոստացաւ՝ զմեծ եւ զանճառելի շնորհս պարգեւել սիրելեաց Իւրոց, ճշմարիտն Աստուած Յիսուս Քրիստոս՝ Տէր մեր. կեցո՛ եւ ողորմեա՛:

ԱՂՕԹՔ
Ամենակեցոյց, ճշմարիտ, սուրբ, մեծի յարութեանն Քրիստոսի Աստուծոյ մերոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Ծ
Ողորմեա՛ ինձ, Աստուա՛ծ, ըստ մեծի ողորմութեան Քում, ըստ բազում գթութեան Քում քաւեա՛ զանօրէնութիւնս իմ:
Առաւե՛լ լուա զիս յանօրէնութենէ իմմէ եւ ի մեղաց իմոց սո՛ւրբ արա զիս:
Զանօրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ:
Քեզ միայն մեղայ, Տէ՛ր, եւ չար առաջի Քո արարի,
Որպէս արդար եղիցիս ի բանս Քո եւ յաղթող ի դատել Քեզ:
Անօրէնութեամբ յղացաւ եւ ի մեղս ծնաւ զիս մայր իմ:
Դու, Տէ՛ր, զճշմարտութիւն սիրեցեր, զանյայտս եւ զծածկեալս իմաստութեամբ Քով յայտնեցեր ինձ:
Ցօղեա՛ յիս մշտկաւ, եւ սուրբ եղէց, լուա՛, եւ քան զձիւն սպիտակ եղէց:
Լսելի՛ արա ինձ զցնծութիւն եւ զուրախութիւն, եւ ցնծասցեն ոսկերք իմ տառապեալք:
Դարձո՛ զերեսս Քո ի մեղաց իմոց եւ զամենայն անօրէնութիւնս իմ քաւեա՛ յինէն:
Սիրտ սուրբ հաստատեա՛ յիս, Աստուա՛ծ, եւ հոգի ուղիղ նորոգեա՛ ի փորի իմում:
Մի՛ ընկենուր զիս, Տէ՛ր, յերեսաց Քոց եւ զՀոգի Քո Սուրբ մի՛ հաներ յինէն:
Տո՛ւր ինձ ցնծութիւն փրկութեան Քո եւ հոգւով պետութեան Քո հաստատեա՛ զիս:
Ուսուցից անօրինաց զճանապարհս Քո, եւ ամպարիշտք առ Քեզ դարձցին:
Փրկեա՛ զիս յարենէ, Աստուա՛ծ, Աստուա՛ծ փրկութեան իմոյ. ցնծասցէ լեզու իմ յարդարութեան Քում:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Թէ կամեցեալ էիր, պատարագս մատուցանէաք, բայց Դու ընդ ողջակէզս իսկ ոչ հաճեցար:
Պատարագ Աստուծոյ՝ հոգի խոնարհ. զսիրտ սուրբ եւ զհոգի խոնարհ Աստուած ոչ արհամարհէ:
Բարի՛ արա, Տէ՛ր, կամօք Քովք Սիոնի, եւ շինեսցին պարիսպքն Երուսաղեմի:
Յայնժամ հաճեսցիս ընդ պատարագս արդարութեան, ուխտից պատարագս հանցեն ի սեղան Քո զուարակս:

«ՈՂՈՐՄԵԱ» ՇԱՐԱԿԱՆ

(Ողր. Սրբոյ Զատկին դկ.)

Այսօր զՊասեք չարչարանացն ելից Իսրայելի փոխեցեր ի փրկութիւն հոգւոց Զատիկ սուրբ յարութեամբ Քո, Քրիստո՛ս:
Այսօր ընդ արեանցն օրինակին անբան գառանցն զենմանց պարգեւեցեր մեզ, Գա՛ռն Աստուծոյ, զարիւնդ Քո փրկական:
Այսօր ընդ անդրանկացն ազատութեան ազատեցեր զգերեալսն, Պտո՛ւղ կենաց ննջեցելոց եւ Անդրանի՛կ մեռելոց:

ՔԱՐՈԶ
Երկրպագեմք Քեզ, Տէր Աստուա՛ծ մեր, անցեալքս ընդ երկարութիւն գիշերիս. եւ կանխեալքս ի տեղւոջ խոստովանութեան մատուցանեմք զառաւօտու աղօթս մեր: ԶՔեզ, Տէ՛ր, օրհնեմք եւ փառաւորեմք. եւ զՔէն, Տէ՛ր, գոհանամք, որ արժանի արարեր զգիշերս խաղաղութեամբ անցուցանել եւ հասանիլ ի ժամ առաւօտուս: Արժանաւորեա՛ զմեզ, Տէ՛ր, անճառ խոստմանց Քոց, զոր խոստացար սիրելեաց Քոց, ճշմարի՛տդ Աստուած Յիսուս Քրիստոս, Տէ՛ր մեր. կեցո՛ եւ ողորմեա՛:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՄԱՂԹԱՆՔ
Ողորմած, գթած, ճշմարիտ, սուրբ, մեծի յարութեանն Քրիստոսի Աստուծոյ մերոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԽԸ
Ալէլուիա, ալէլուիա:
Օրհնեցէ՛ք զՏէր յերկնից, օրհնեցէ՛ք զՆա ի բարձանց:
Օրհնեցէ՛ք զՆա, ամենայն հրեշտա՛կք Նորա. օրհնեցէ՛ք զՆա, ամենայն զօրութի՛ւնք Նորա:
Օրհնեցէ՛ք զՆա, արեգա՛կն եւ լուսի՛ն. օրհնեցէ՛ք զՆա, ամենայն աստե՛ղք եւ լո՛յսք:
Օրհնեցէ՛ք զՆա, երկի՛նք երկնից եւ ջո՛ւրք, որ ի վերոյ քան զերկինս:
Օրհնեցէ՛ք զանուն Տեառն, զի Նա ասաց, եւ եղեն. հրամայեաց, եւ հաստատեցան:
Կացոյց զնա յաւիտեանս յաւիտենից. սահման եդ, եւ ոչ անցանեն:
Օրհնեցէ՛ք զՏէր յերկրէ, վիշա՛պք եւ ամենայն խո՛րք,
Հո՛ւր եւ կարկո՛ւտ, ձի՛ւն եւ սա՛ռն, հո՛ղմ եւ մրրի՛կ, որք առնէք զբան Նորա.
Լերի՛նք եւ ամենայն բարձո՛ւնք, ծա՛ռք պտղաբերք եւ ամենայն մա՛յրք.
Գազա՛նք եւ ամենայն անասո՛ւնք, սողո՛ւնք եւ ամենայն թռչո՛ւնք թեւաւորք.
Թագաւո՛րք երկրի եւ զօ՛րք իւրեանց, իշխա՛նք եւ ամենայն դատաւո՛րք երկրի:
Երիտասա՛րդք եւ կուսա՛նք, ծե՛րք եւ տղա՛յք, օրհնեցէ՛ք զանուն Տեառն:
Բարձրացաւ անուն Նորա միայն. խոստովանութիւն Նմա՝ յերկինս եւ յերկրի:
Բարձր առնէ Տէր զեղջիւր ժողովրդեան Իւրոյ. օրհնութիւն Նմա՝ յամենայն սրբոց Նորա, յորդւոցն Իսրայելի ժողովոյն, որ մերձ է առ Տէր:

ՍԱՂՄՈՍ ՃԽԹ
Օրհնեցէ՛ք զՏէր յօրհնութիւն ի նոր. օրհնութիւն Նմա յԵկեղեցիս սրբոց:
Ուրախասցի Իսրայէլ յԱրարիչ իւր, որդիք Սիոնի ցնծասցեն ի Թագաւորն իւրեանց:
Օրհնեցէ՛ք զանուն Նորա օրհնութեամբ. սաղմոսիւք եւ օրհնութեամբ սաղմոս երգեսցեն Նմա:
Հաճի Տէր ընդ ժողովուրդ Իւր սուրբ եւ բարձր առնէ զհեզս ի փրկութեան:
Պարծեսցին սուրբքն փառօք եւ ցնծասցեն ի հանգիստ իւրեանց եւ բարձր արասցեն զԱստուած բերանովք իւրեանց:
Սուր երկսայրի ետ ի ձեռս նոցա՝ առնուլ զհատուցումն ի հեթանոսաց՝ ի յանդիմանութիւն ամենայն ժողովրդոց:
Ի կապել զթագաւորս նոցա կապանօք, զզօրավարս նոցա՝ ձեռնակապօք երկաթեօք.
Առնել նոցա դատաստան ըստ Գրոց. եւ փառք այս են ամենայն սրբոց Նորա:

ՍԱՂՄՈՍ ՃԾ
Օրհնեցէ՛ք զԱստուած ի սրբութեան Նորա. օրհնեցէ՛ք զՆա ի հաստատութեան, ի զօրութեան Նորա:
Oրհնեցէ՛ք զՆա ի զօրութեան Նորա. օրհնեցէ՛ք զՆա ի բազում մեծութեան Նորա:
Օրհնեցէ՛ք զՆա ի ձայն օրհնութեան. օրհնեցէ՛ք զՆա սաղմոսիւք եւ օրհնութեամբ:
Օրհնեցէ՛ք զՆա ցնծութեամբ. գովեցէ՛ք զՆա ուրախութեամբ:
Օրհնեցէ՛ք զՆա ի բանս քաղցր. գովեցէ՛ք զՆա ի բարբառ լսելի:
Օրհնեցէ՛ք զՆա ի ձայն գոհութեան. ամենա՛յն հոգիք, օրհնեցէ՛ք զՏէր:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՏԷՐ ՅԵՐԿՆԻՑ» ՇԱՐԱԿԱՆ

(Տրյ. Սրբոյ Զատկին դկ.)

Այսօր հրեշտակք ի բարձունս ուրախանան ընդ մարդկան, որք իջեալ ի յերկնից՝ տան զաւետիս աշխարհի. «Ցնծացէ՛ք այսօր, Քրիստոս յարեաւ ի մեռելոց»:
Այսօր զուարթունն ի վիմին խնկաբերից սուրբ կանանցն փողէր ձայնիւ ցնծութեամբ՝ պատմել աշակերտացն՝ ասելով. «Ցնծացէ՛ք այսօր, Քրիստոս յարեաւ ի մեռելոց»:
Այսօր վիմին հաւատոյ եւ Յովհաննու սիրելւոյ ընդ հակառակս ընթացեալ ի գերեզման Յարուցելոյն, զոր տեսեալ՝ պատմէին. «Քրիստոս յարեաւ ի մեռելոց»:
Այսօր եւ մեք զուարճացեալք՝ պայծառասցուք տօնիւս. ընդ հաշտութեանն Աստուծոյ միմեանց արկցուք գիրկս սիրով եւ միաբան գոչեսցուք. «Քրիստոս յարեաւ ի մեռելոց»:

Յորժամ զ«Տէր յերկնից»ի յետին տունն ասասցեն, ամենեքեան համբուրեսցեն զմիմեանս` ասելով. «Քրիստոս յարեաւ ի մեռելոց. ձեզ եւ մեզ` մեծ աւետիս»:

ՕՐՀՆՈՒԹԻՒՆ ԱՌԱՒՕՏՈՒ

Փա՜ռք ի բարձունս Աստուծոյ եւ յերկիր խաղաղութիւն, ի մարդիկ հաճութիւն. եւ օրհնութի՜ւն Քեզ ի բարձունս: Օրհնեալ ես, Տէր Աստուա՛ծ մեր, օրհնեմք զՔեզ եւ գովեմք զՔեզ: Խոստովանիմք, Տէ՛ր, զՔեզ եւ երկիր պագանեմք Քեզ: Փառաւորեմք զՔեզ, գոհանամք, Տէ՛ր, զՔէն վասն մեծի փառաց Քոց: Տէ՛ր Թագաւոր, Սո՛ւրբդ երկնային, Աստուա՛ծ եւ Հա՛յր ամենակալ, Տէ՛ր եւ Որդի՛ Հօր Միածին, Յիսո՛ւս Քրիստոս եւ Սուրբ Որդի՛, Տէ՛ր Աստուած, Գա՛ռն Աստուծոյ եւ Որդի՛ Հօր, որ առեր զմերս ի Կուսէն: Ողորմեցար, բարձեր զմեղս աշխարհի. եւ արդ ընկա՛լ զաղաչանս մեր: Սո՛ւրբդ, որ նստիս ընդ աջմէ Հօր, ողորմեա՛ց մեզ. զի Դու միայն սուրբ, Դու միայն բարձրեալ ես, Դու միայն Տէր մեր Յիսուս Քրիստոս: Տէր եւ Հոգիդ Սուրբ, որ ի փառս Աստուած ընդ Հօր. ամէն:
Եւ յամենայն ժամ օրհնեմք զՔեզ, Տէ՛ր, եւ գովեմք զանուն սուրբ Քո յաւիտեան եւ յաւիտեանս յաւիտենից: Արժանի՛ արա, Տէ՛ր, զօրս զայս խաղաղութեամբ. եւ առանց մեղաց պահեա՛ զմեզ: Օրհնեալ ես, Տէ՛ր Աստուած հարցն մերոց. գովեալ եւ փառաւորեալ է անուն սուրբ Քո յաւիտեանս. ամէն:
Օրհնեա՛լ Տէր, ուսո՛ ինձ զարդարութիւնս Քո: (Երիցս կրկնեա՛)
Տէ՛ր, ապաւէն եղեր մեզ ազգէ յազգ: Ես աղաչեմ, Տէ՛ր, ողորմեա՛ ինձ եւ բժշկեա՛ զանձն իմ. ես մեղայ Քեզ: Ցո՛յց մեզ, Տէ՛ր, զողորմութիւնս Քո. եւ զփրկութիւնս Քո տո՛ւր մեզ: Տէ՛ր, ողորմութիւն Քո յաւիտեան. զգործս ձեռաց Քոց մի՛ անտես առներ: Տէ՛ր իմ, զՔեզ ապաւէն ինձ արարի. ուսո՛ ինձ առնել զկամս Քո, զի Դու ես Աստուած իմ: Ի Քէն է, Տէ՛ր, աղբիւր կենդանութեան, եւ լուսով երեսաց Քոց տեսանեմք զլոյս: Ծագեա՛ զողորմութիւնս Քո, որք ճանաչեն զՔեզ, Տէ՛ր:

ՄԱՂԹԱՆՔ
Փա՜ռք, պատի՜ւ եւ երկրպագութի՜ւն ի բարձունս Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԱՌԱՒՕՏՈՒ ԵՐԳ
Զյարութիւն զՓրկչին օրհնեսցուք. զՓրկչին մերոյ օրհնեսցուք զյարութիւն:
Յարեաւ Աստուած, եւ ցրուեցան ամենայն թշնամիք Նորա:

ՔԱՐՈԶ
Ասասցուք ամենեքեան միաբանութեամբ. Տէ՛ր, ողորմեա՛:
Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ զՏէր աղաչեսցուք:
Տէ՛ր, ողորմեա՛:
Վասն ամենայն սուրբ եւ ուղղափառ եպիսկոպոսաց զՏէր աղաչեսցուք:
Տէ՛ր, ողորմեա՛:
Վասն հայրապետին մերոյ տեառն (այս անուն) կենաց եւ փրկութեան հոգւոյ նորին զՏէր աղաչեսցուք:
Տէ՛ր, ողորմեա՛:
Վասն վարդապետաց, քահանայից, սարկաւագաց, դպրաց եւ ամենայն ուխտի մանկանց Եկեղեցւոյ զՏէր աղաչեսցուք:
Տէ՛ր, ողորմեա՛:
Վասն բարեպաշտ թագաւորաց եւ աստուածասէր իշխանաց, զօրավարաց եւ զօրաց նոցին զՏէր աղաչեսցուք:
Տէ՛ր, ողորմեա՛:
Վասն զի Տէրն ամենակալ հնազանդեցուսցէ առաջի նոցա զամենայն պատերազմունս թշնամեաց զՏէր աղաչեսցուք:
Տէ՛ր, ողորմեա՛:
Յաղագս հարց եւ եղբարց մերոց, որք ի գերութեան են եւ ի չար ծառայութեան, զՏէր աղաչեսցուք:
Տէ՛ր, ողորմեա՛:
Յաղագս ճանապարհորդաց եւ նաւորդաց՝ խաղաղութեամբ հասանիլ ի նաւահանգիստն բարութեան, զՏէր աղաչեսցուք:
Տէ՛ր, ողորմեա՛:
Յաղագս հիւանդաց եւ ամենայն վշտացելոց փութապէս առողջութեան զՏէր աղաչեսցուք:
Տէ՛ր, ողորմեա՛:
Յաղագս բարեխառնութեան օդոց, անձրեւաց քաղցրութեան եւ պտղոց առատութեան զՏէր աղաչեսցուք:
Տէ՛ր, ողորմեա՛:
Յաղագս ուխտաւորաց եւ պտղաբերից ի սուրբ Եկեղեցի Աստուծոյ զՏէր աղաչեսցուք:
Տէ՛ր, ողորմեա՛:
Եւ յաղագս այնոցիկ, որք մատնեալք են ի ձեռս անօրինաց վասն անուանն Քրիստոսի, զՏէր աղաչեսցուք:
Ազատեա՛, Տէ՛ր, եւ ողորմեա՛:
Յաղագս հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Յաղագս փրկելոյ զմեզ Տեառն Աստուծոյ յերեւելի եւ յաներեւոյթ թշնամւոյն զՏէր աղաչեսցուք:
Տէ՛ր ողորմեա՛:

ՄԱՂԹԱՆՔ
Բարեխօս ունիմք սուրբ զՄարիամ զԱստուածածինն՝ զփառաւորեալ եւ օրհնեալ միշտ սուրբ Կոյսն, սուրբ զՅովհաննէս Մկրտիչն, սուրբ զՍտեփանոս Նախավկայն, սուրբ զառաքեալսն եւ զմարգարէսն, զարի եւ զյաղթող սուրբ վկայսն եւ զմեծ խոստովանողն Քրիստոսի՝ զհայրապետն մեր զսուրբն Գրիգոր՝ լուսաւորիչն Հայաստանեայց աշխարհի:
Յիշեսջի՛ք եւ զամենայն սուրբս եւ նոքօք զՏէր աղաչեսցուք:
Յիշեա՛, Տէ՛ր, եւ ողորմեա՛:
Զառաւօտս լուսոյ եւ զառաջիկայ օրս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս՝ միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Գոհանամք զՔէն, Տէր Աստուա՛ծ մեր, որ երեւելի լուսով Քով զուարճացուցեր զամենայն արարածս Քո, իսկ իմանալի լուսով պատուիրանաց Քոց զամենեսեան լուսաւորեցեր զհաւատացեալս ի Քեզ: Զօրացո՛ եւ զմեզ, Տէ՛ր, ի պահպանութիւն պատուիրանաց Քոց ի տուընջեանս յայսմիկ եւ յամենայն ժամանակի, որպէս զի լուսաւորեալ մտօք միշտ զհաճոյս Քո արասցուք եւ հանդերձեալ բարեացդ հասցուք ընդ ամենայն սուրբս Քո շնորհօք եւ մարդասիրութեամբ Տեառնդ մերոյ եւ Փրկչիդ Յիսուսի Քրիստոսի, Որում վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Խաղաղութի՛ւն մեր եւ Կեա՛նք, որ ի Հօրէ առաքեցար, Միածին Որդի՛ Աստուծոյ, Տէ՛ր մեր եւ Փրկիչ Յիսո՛ւս Քրիստոս, տո՛ւր մեզ զխաղաղութիւն Քո, զոր շնորհեցեր սրբոց Քոց առաքելոց փչմամբ Քո ի նոսա զկենդանացուցիչ եւ զամենազօր Հոգիդ Քո Սուրբ. որպէս զի եւ մեք խաղաղացեալք յամենայն աշխարհական սահեցմանց՝ լիցուք տաճար եւ բնակարան աստուածային շնորհացդ եւ գոհանալով փառաւորեսցուք զՔեզ ընդ Հօր եւ Սուրբ Հոգւոյդ, Քրիստոս Աստուա՛ծ մեր, այժմ եւ միշտ եւ յաւիտեանս յաւիտենից. ամէն:

ԵՐԵՔՍՐԲԵԱՆ
Սուրբ Աստուա՛ծ, սուրբ եւ հզօր, սուրբ եւ անմահ, որ յարեար ի մեռելոց. ողորմեա՛ մեզ:
(Երիցս կրկնեա՛)

Փառաւորեալ եւ օրհնեալ, միշտ սուրբ Կոյս Աստուածածի՛ն Մարիամ, մա՛յր Քրիստոսի, մատո՛ զաղաչանս մեր Որդւոյ քո եւ Աստուծոյ մերոյ:

ՄԱՂԹԱՆՔ
Փրկել զմեզ ի փորձութենէ եւ յամենայն վտանգից մերոց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն լսելի լինելոյ Տեառն Աստուծոյ ձայնի աղաչանաց մերոց՝ բարեխօսութեամբ սուրբ Աստուածածնին, եւ իջանելոյ ի վերայ մեր ողորմութեան եւ գթութեան Տեառն Աստուծոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ ԹԱՓՕՐԻ

(Օրհ. Սրբոյ Զատկին աձ. Ա.)

Այսօր յարեաւ ի մեռելոց Փեսայն անմահ եւ երկնաւոր. քեզ՝ աւետի՜ք խնդութեան, հա՛րսն ի յերկրէ Եկեղեցի. օրհնեա՛ ի ձայն ցնծութեան զԱստուած քո, Սիո՛ն:
Այսօր անճառ Լոյսն ի Լուսոյ լուսաւորեաց զմանկունս քո. լուսաւորեա՛, Երուսաղէ՛մ, քանզի յարեաւ Լոյս Քո Քրիստոս. օրհնեա՛ ի ձայն ցնծութեան զԱստուած քո, Սիո՛ն:
Այսօր խաւարն անգիտութեան հալածեցաւ Երրեակ Լուսովն, եւ քեզ ծագեաց լոյս գիտութեան Յարուցեալն ի մեռելոց Քրիստոս. օրհնեա՛ ի ձայն ցնծութեան զԱստուած քո, Սիո՛ն:

ՍԱՂՄՈՍ ԿԴ
Քեզ վայելէ օրհնութիւն, Աստուա՛ծ, ի Սիոն, եւ Քեզ տացին աղօթք յԵրուսաղէմ:
Լո՛ւր աղօթից իմոց, զի առ Քեզ ամենայն մարմին եկեսցէ:
Բանք անօրինաց զօրացան ի վերայ մեր. զամպարշտութիւնս մեր Դու քաւեսցես:
Երանի՜ զոր ընտրեցեր եւ ընկալար, եւ բնակեսցէ ի գաւիթս Քո:
Լցցուք մեք ի բարութենէ տան Քո, սուրբ է տաճար Քո սքանչելի արդարութեամբ:
Լո՛ւր մեզ, Աստուա՛ծ փրկիչ մեր, յո՛յս ամենայն ծագաց երկրի եւ որ ի ծով հեռի,
Ո պատրաստէ զլերինս զօրութեամբ Իւրով եւ զգեցեալ է զօրութիւն.
Ո խռովեցուցանէ զմեծութիւն ծովու եւ զձայն ալեաց նորա ցածուցանէ:
Խռովեսցին հեթանոսք, եւ երկիցեն բնակիչք երկրի ի նշանաց Քոց:
Յելս առաւօտու եւ ընդ երեկոյս զուարճասցին. հայեցար յերկիր, արբուցեր զնա եւ բազում արարեր զմեծութիւն նորա:
Գետն Աստուծոյ լի եղեւ ջուրբ. պատրաստ արարեր զկերակուր նորա, զի այսպէս է պատրաստութիւն:
Զակօս նորա արբուցեր եւ բազում արարեր զարմտիս նորա:
Ի ցօղել նորա զուարթ եղիցի բոյս նորա. օրհնեսցի պսակ տարւոյ քաղցրութեան Քո:
Դաշտք Քո լցցին պարարտութեամբ, պարարտասցին գեղեցկութիւնք անապատի:
Բլուրք ցնծութիւն զգեցցին, եւ զգեցցին խոյք մաքեաց:
Հովիտք բազում արասցեն ցորեան, աղաղակեսցեն եւ օրհնեսցեն:


Ալէլուիա, ալէլուիա: Հասեալ կային ոտք մեր առ դրունս քո, Երուսաղէ՛մ:


Եւ ապա ասասցեն շարական եւ ընթեռնուցուն զչորեսին աւետարանսն դեպ ի չորս կողմանսն աշխարհի:

Դէպ ի յարեւելս.

(Տրյ. Հմբ. Յարութեան աձ. Ա.)

Ընդ լուսանալ միաշաբաթին կանխեցին կանայքն ի գերեզմանն ի խնկել զանապական մարմինն:
Եւ գտին զվէմն բարձեալ ի դրանց գերեզմանին եւ լուեալ բարբառ հրեշտակէն, եթէ՝ «Յարեաւ Քրիստոս եւ խափանեաց զմահ»:
Եւ հանդիպեալ Քո, Տէ՛ր, առաքելոցն եւ տուեալ ողջոյն կենդանարար՝ առաքեցեր զնոսա ի փրկութիւն տիեզերաց:


Դէպ ի յարեւմուտս.

(Տրյ. Հմբ. Յարութեան ակ. Ա.)

Առաքեցար ի Հօրէ, Բա՛նդ Աստուած, ի փրկութիւն ազգի մարդկան. օրհնեմք զՔեզ, սո՛ւրբ Աստուած:
Ի գերեզման իջեր, Թագաւո՛ր անմահ, եւ ի Հօրէ ոչ մեկնեցար. օրհնեմք զՔեզ, սո՛ւրբ Աստուած:
Ի յերրորդ աւուր յարեար աստուածապէս եւ ի յերկինս համբարձար. փա՜ռք յարութեան Քո, Տէ՛ր. օրհնեմք զՔեզ, սո՛ւրբ Աստուած:


Դէպ ի հարաւային կողմն.

(Տրյ. Հմբ. Յարութեան բձ. Ա.)

Ի գերեզման Քո կանխեցին կանայքն, զիւղս եւ զխունկս բերին ի պատիւ թաղման Քո, զի զմեղօք զհողացեալս վերածեր ի կեանս:
Փոխանակ իւղոյն զհաւատս անբիծս եւ զաղաչանս մեր ընդ առաւօտեան կանանցն ընկա՛լ, որք զողջոյն կենաց լուան Եւայի ունկամբն:
Ետուն աւետիս առաքելոցն. «Յարեաւ Յարուցիչն մեր, աւերեաց զդժոխս եւ զթշնամին կապեաց ի յանլոյծ կապանս»:


Դէպ ի հիւսիսային կողմն.

(Տրյ. Հմբ. Յարութեան բկ. Ա.)

Քո յարութեանդ փառք վայելէ, երկայնամի՛տ Տէր:
Օրհնեալ է Քո յարութիւնդ, Աստուա՛ծ, որ զմահ մահու ծանուցեր Քոյին կամաւոր մահուամբդ. Քո յարութեանդ փառք վայելէ, երկայնամի՛տ Տէր:
Գոչումն ահեղ հրեշտակին ի վիմին, որ քարոզէր առ սուրբ կանայսն. «Յարեաւ Տէրն ի մեռելոց». Քո յարութեանդ փառք վայելէ, երկայնամի՛տ Տէր:


Եւ ապա եկեսցեն յատեանն` ասելով շարական.

(Օրհ. Խաչվերացի աձ. Ա.)

Որ զանարատ բազուկս Քո ի խաչին տարածեցեր, Քրիստո՛ս Աստուած, եւ նշան յաղթութեան ետուր մեզ, սովաւ զկեանս մեր պահեա՛:
Որ զաշխարհակեցոյց բազկատարածութիւն խաչի Քո, Քրիստո՛ս Աստուած, գաւազան զօրութեան ետուր մեզ, սովաւ զկեանս մեր պահեա՛:
Որ զմեռեալն ի ճաշակմանէ փայտին յանցանաց՝ կենաց փայտիւն կենագործեցեր, սովաւ զկեանս մեր պահեա՛:

ՍԱՂՄՈՍ Դ
Փոխ. Նշանեցաւ առ մեզ լոյս երեսաց Քոց, եւ ետուր ուրախութիւն սրտից մերոց:
Ի կարդալ իմում լուար ինձ, Աստուա՛ծ, ըստ արդարութեան. ի նեղութեան ինձ անդորր արարեր. ողորմեա՛ ինձ եւ լո՛ւր աղօթից իմոց:
Որդի՛ք մարդկան, մինչեւ յե՞րբ էք խստասիրտք, ընդէ՞ր սիրէք զնանրութիւն եւ խնդրէք զստութիւն:
Ծաներո՛ւք, զի սքանչելիս արար Տէր սրբոյ Իւրում. եւ Տէր լուիցէ ինձ ի կարդալ իմում առ Նա:
Բարկանայք՝ եւ մի՛ մեղանչէք. զոր ինչ ասէք ի սիրտս ձեր, յանկողինս ձեր զղջացարո՛ւք:
Մատուցէ՛ք պատարագս արդարութեան եւ յուսացարո՛ւք ի Տէր:
Բազումք ասէին, թէ՝ «Ո՞ ցուցցէ մեզ զբարութիւն Տեառն»:
Նշանեցաւ առ մեզ լոյս երեսաց Քոց, եւ ետուր ուրախութիւն սրտից մերոց:
Ի պտղոյ ցորենոյ, գինւոյ եւ ձիթոյ իւրեանց լցուցեր զնոսա:
Խաղաղութեամբ յայս եւ ի սոյն ննջեսցուք եւ զարթիցուք, զի Դու, Տէ՛ր, միայն առանձին յուսով Քով բնակեցուցեր զմեզ:

ԿԱՆՈՆ ԱՆԴԱՍՏԱՆԻ

ՔԱՐՈԶ
Սրկ. Եւ եւս խաղաղութեան զՏէր աղաչեսցուք:
Քհ. Տէ՛ր, ողորմեա՛:
Սրկ. Վասն ի վերուստ խաղաղութեան եւ փրկութեան անձանց մերոց զՏէր աղաչեսցուք:
Քհ. Տէ՛ր, ողորմեա՛:
Սրկ. Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Քհ. Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛: Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

Դպ. Ամէն: Ալէլուիա, ալէլուիա, ալէլուիա:
Քհ. Օրհնեսցի եւ պահպանեսցի եւ նախախնամեալ պահեսցի արեւելեան կողմն աշխարհիս եւ հայրապետութիւն Հայոց այս նշանաւ սուրբ խաչիս եւ սուրբ Աւետարանաւս եւ աւուրս շնորհիւ անուամբ Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Եւ շրջելով գնան յարեւելս եւ դարձուցանեն զերեսս յարեւմուտս եւ ասեն.
Դպ. Ամէն: Ալէլուիա, ալէլուիա, ալէլուիա:
Քհ. Օրհնեսցի եւ պահպանեսցի եւ նախախնամեալ պահեսցի արեւմտեան կողմն աշխարհիս եւ թագաւորութիւն քրիստոնէից այս նշանաւ սուրբ խաչիս եւ սուրբ Աւետարանաւս եւ աւուրս շնորհիւ անուամբ Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Եւ շրջելով գնան ի հիւսիս եւ դարձուցանեն զերեսս ի հարաւ եւ ասեն.
Դպ. Ամէն: Ալէլուիա, ալէլուիա, ալէլուիա:
Քհ. Օրհնեսցի եւ պահպանեսցի եւ նախախնամեալ պահեսցի հարաւային կողմն աշխարհիս, երկիրս, անդաստանս եւ պտղաբերութիւն տարւոյս այս նշանաւ սուրբ խաչիս եւ սուրբ Աւետարանաւս եւ աւուրս շնորհիւ անուամբ Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Եւ շրջելով գնան ի հարաւ եւ դարձուցանեն զերեսս ի հիւսիս եւ ասեն.
Դպ. Ամէն: Ալէլուիա, ալէլուիա, ալէլուիա:
Քհ. Օրհնեսցի եւ պահպանեսցի եւ նախախնամեալ պահեսցի հիւսիսային կողմն աշխարհիս, վանքս, անապատս, քաղաքս եւ գիւղս եւ բնակեալ ժողովուրդս ի նոսա այս նշանաւ սուրբ խաչիս եւ սուրբ Աւետարանաւս եւ աւուրս շնորհիւ անուամբ Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Դպ. Ամէն:
Եւ դառնան ի բեմն եւ ասեն դարձեալ.
Քհ. Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Սուրբ խաչիւս աղաչեսցուք զՏէր, զի սովաւ փրկեսցէ զմեզ ի մեղաց եւ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Պահպանեա՛ զմեզ, Քրիստոս Աստուա՛ծ մեր, ընդ հովանեաւ սուրբ եւ պատուական խաչիւդ Քով ի խաղաղութեան: Փրկեա՛ յերեւելի եւ յաներեւոյթ թշնամւոյն, արժանաւորեա՛ գոհութեամբ փառաւորել զՔեզ ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

ԺԱՄԱՄՈՒՏ
Քանզի յարեաւ ի մեռելոց Քրիստոս Աստուած յաւիտենից, Արարիչ եւ Յարութիւն ազգի մարդկան, զՈր օրհնեն անդադար զինուորութիւնք հրեշտակաց եւ ամենայն զուարթունք երկնից, ընդ որս գոչելով՝ ասեմք. «Փա՜ռք սոսկալի յարութեան Քո, Տէ՛ր»:

(Մնկ. Յարութեան Ղազարու դկ. ստղ.)

Յիսուս Միածինն՝ անմահութեանց Պարգեւատուն, երեւեցաւ մեզ, խափանեաց զզօրութիւն մահու:
Բղխմամբ արտասուաց Մարիամու եւ Մարթայի անկեալ առ ոտսն Տեառն՝ խնդրէին զնորոգումն եղբօրն:
Բանիւ Բանն Աստուած կենագործեաց զՂազարոս ի թաղմանէ, եւ եկեալ արտաքս անապական:

ՍԱՂՄՈՍ ՃԻԹ
Կցորդ. Եղիցին ականջք Քո ի լսել զձայն աղօթից իմոց:
Փոխ. Ի խորոց կարդացի առ Քեզ, Տէ՛ր. Տէ՛ր, լո՛ւր ձայնի իմում:
Եղիցին ականջք Քո ի լսել զձայն աղօթից իմոց:
Թէ զանօրէնութիւնս իմ քննես, Տէ՛ր, Տէ՛ր, իսկ ո՞ կարէ կալ առաջի Քո, զի ի Քէն է քաւութիւն:
Վասն անուան Քո համբերի, Տէ՛ր, համբեր անձն իմ բանի Քում, յուսացաւ անձն իմ ի Տէր:
Ի պահէ առաւօտու մինչեւ յերեկոյ, ի պահէ առաւօտու յուսացաւ Իսրայէլ ի Տէր:
Ի Տեառնէ է ողորմութիւն բազում, ի Նմանէ է փրկութիւն, եւ Նա փրկեաց զԻսրայէլ յամենայն նեղութեանց նորա:


ՄԱՂԹԱՆՔ
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն եւ մեզ՝ մեղաւորացս, շնորհեա՛ զթողութիւն յանցանաց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ԵՐԳ ՏԵԱՌՆ ՆԵՐՍԻՍԻ
վասն առաջնոյ աւուր միաշաբաթին եւ ի խորհուրդ արարչութեան եւ յարութեանն Քրիստոսի

Նորաստեղծեալ Բանն յանէից
Ի սկզբանէ զերկինս յերկնից.
Եւ զերկնային զօրս անմարմնոց,
Իմանալեացն զուարթնոց.
Եւ զգալի տարերց քառից,
Հակառակաց միաբանից,
Որով յաւէտ փառաբանի
Երրորդութիւնն անճառելի:

Երեքսրբեան Մի Տէրութիւն,
Միով բնութեամբ Աստուածութիւն,
Լոյսն, որ անեղ արարչական
Ասաց լինել լոյս եղական,
Զոր եւ ծագեաց յօրն առաջին՝
Միաշաբաթ կիւրակէին,
Որով յաւէտ փառաբանի
Երրորդութիւնն անճառելի:

Րաբունօրէն բացատրեսցուք,
Զծածկեալ խորհուրդն ծանիցուք,
Զի լոյսն անտես իմանալի՝
Մաքուր հոգւոց տեսանելի,
Ի սոյն ծագեաց միաշաբաթ
Մեզ յարութեան սուրբ ճառագայթ.
Եկա՛յք, փրկեա՛լք, ընդ զուարթնոյն
Տո՛ւք օրհնութիւն Յարուցելոյն:

Սէրդ սիրով խոնարհեցար,
Ի փրկութիւն մեր մարմնացար,
Նովին մարմնովն խաչեցար,
Ի գերեզման մահու եդար,
Այսօր յարեար աստուածաբար,
Ի հրեշտակաց քարոզեցար.
Եկա՛յք, փրկեա՛լք, ընդ զուարթնոյն
Տո՛ւք օրհնութիւն Յարուցելոյն:

Երեւեցար խնկաբերիցն
Յողջոյն կենացն ուրախալից
Եւ ի լերինն Գալիլիա
Առաքելոց մետասանից.
Արժանացո՛ զմեզ ընդ նոսին
ԶՔեզ տեսանել յօրն վերջին.
Եկա՛յք, փրկեա՛լք, ընդ զուարթնոյն
Տո՛ւք օրհնութիւն Յարուցելոյն:

Սիոնի՛ որդիք, զարթի՛ք,
Հարսին Լուսոյ տո՛ւք աւետիք,
Եթէ՝ Փեսայն քո յարուցեալ
Յաղթեաց մահու իշխանութեամբ.
Գայ պսակէ զքեզ փառօք,
Ե՛լ ընդ առաջ պճնեալ զարդուք,
Երգեա՛ երգ նոր Յարուցելոյն՝
Ննջեցելոց կենաց Պտղոյն:

ՔԱՐՈԶ
Խնդրեսցուք հաւատով միաբանութեամբ ի Տեառնէ, զի զողորմութեան զշնորհս Իւր արասցէ ի վերայ մեր: Տէրն ամենակալ կեցուսցէ եւ ողորմեսցի:
Կեցո՛, Տէ՛ր:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Քում ամենազօր եւ հրաշալի յարութեանդ, Քրիստոս Աստուա՛ծ մեր, երկիր պագանեն զօրք հրեշտակաց, զի Դու միայն ունիս զանմահութիւն՝ Բնակեալդ ի լոյս անմատոյց: Եւ մեք՝ հողեղէն արարածքս, խոնարհեալք երկիւղիւ երկիր պագանեմք, զսուրբ եւ զհրաշալի եւ զյաղթող զյարութիւնն Քո օրհնեմք եւ փառաւորեմք: Եւ ընդ երկնային զօրսն մատուցանեմք զօրհնութիւն եւ զփառս ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Եւ ապա, եդեալ զսուրբ խաչն եւ զաւետարանն ի վերա գրքակալին, երկիրպագցեն ամենեքեան:

ՇԱՐԱԿԱՆ ԽԱՉԻ

(Շրկ. Խաչվերացի բկ.)

Խաչի Քո, Քրիստո՛ս, երկիրպագանեմք. եւ զսուրբ թաղումնդ Քո մեծացուցանեմք. եւ զսուրբ յարութիւնդ Քո փառաւորեմք:
Եկա՛յք, հաւատացե՛լք, երկրպագեսցո՛ւք Քրիստոսի Աստուծոյ մերոյ, վասն զի եկն ի ձեռն խաչի Իւրոյ շնորհեաց պարգեւս աշխարհի:
Սուրբ Աստուա՛ծ, սուրբ եւ հզօր, սուրբ եւ անմահ, որ յարեար ի մեռելոց. ողորմեա՛ մեզ: (Երիցս կրկնելով)

(Շրկ. Խաչվերացի ակ.)

Փա՜ռք սուրբ խաչիդ, ալէլուիա. սուրբ թաղմանդ, ալէլուիա. սուրբ յարութեանդ, ալէլուիա:
Նշանեցաւ առ մեզ լոյս երեսաց Քոց, եւ ետուր ուրախութիւն սրտից մերոց:
Ի պտղոյ ցորենոյ, գինւոյ եւ ձիթոյ լցուցեր զնոսա:
Փա՜ռք սուրբ խաչիդ, ալէլուիա. սուրբ թաղմանդ, ալէլուիա. սուրբ յարութեանդ, ալէլուիա:
Նշանեցաւ առ մեզ լոյս երեսաց Քոց, եւ ետուր ուրախութիւն սրտից մերոց:
Ի պտղոյ ցորենոյ, գինւոյ եւ ձիթոյ լցուցեր զնոսա:
Փա՜ռք եւ երկրպագութիւն Հօր եւ Որդւոյ եւ Սրբոյ Հոգւոյն. այժմ եւ միշտ եւ յաւիտեանս յաւիտենից. ամէն:

(Օրհ. Խաչվերացի Գշ. բկ.)

Խաչն կենարար, որ եղեւ մեզ փրկութիւն, սովաւ ամենեքեան զՔեզ բարեբանեմք:
Որ ի Հօրէ լուսոյ լոյս ճառագայթեալ ի յերկրի եւ գաւազան զօրութեան հաւատացելոց, սովաւ ամենեքեան զՔեզ բարեբանեմք:
Որ լուսափայլ ծագմամբ հրաշափառապէս մեզ ցուցաւ ի յօգնութիւն ընդդէմ թշնամւոյն, սովաւ ամենեքեան զՔեզ բարեբանեմք:

Փա՜ռք եւ երկրպագութիւն Հօր եւ Որդւոյ եւ Սրբոյ Հոգւոյն. այժմ եւ միշտ եւ յաւիտեանս յաւիտենից. ամէն:

(Ողր. Յարութեան բկ. Բ.)

Յարեար, Տէ՛ր, աւերեցեր զդժոխս. ի յերկինս համբարձար եւ ընդ աջմէ Հօր նստար:

Եւ եկեալ երկու երկու համբուրեսցեն զսուրբ խաչն եւ զԱւետարանն եւ ասասցեն զմիմեանս «Քրիստոս յարեաւ ի մեռելոց. ձեզ եւ մեզ` մեծ աւետիս»:

ՔԱՐՈԶ ԽԱՉԻ
Սուրբ խաչիւս աղաչեսցուք զՏէր, զի սովաւ փրկեսցէ զմեզ ի մեղաց եւ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Կեցո՛, Տէ՛ր:

ԱՂՕԹՔ
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Պահպանեա՛ զմեզ, Քրիստոս Աստուա՛ծ մեր, ընդ հովանեաւ սուրբ եւ պատուական խաչիւդ Քով ի խաղաղութեան: Փրկեա՛ յերեւելի եւ յաներեւոյթ թշնամւոյն: Արժանաւորեա՛ գոհութեամբ փառաւորել զՔեզ ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: