---

Կարգաւորութիւն հասարակաց աղօթից Հայաստանեայց Եկեղեցւոյ,
որ կատարի ի մէջ գիշերի՝ ի դէմս Հօր Աստուծոյ

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Օրհնեալ համագոյ եւ միասնական անբաժանելի Սուրբ Երրորդութիւնն՝ Հայր եւ Որդի եւ Հոգի Սուրբ, այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Գ
Տէ՛ր, զի՜ բազում եղեն նեղիչք իմ, եւ բազումք յարեան ի վերայ իմ:
Բազումք ասէին զանձնէ իմմէ, թէ՝ «Չիք փրկութիւն սորա առ Աստուած իւր»:
Այլ Դու, Տէ՛ր, օգնական իմ ես, փառք իմ եւ բարձրացուցիչ գլխոյ իմոյ:
Ձայնիւ իմով ես առ Տէր կարդացի, եւ լուաւ ինձ ի լեռնէ սրբոյ Իւրմէ:
Ես ննջեցի եւ ի քուն եղէ, զարթեայ, եւ Տէր ընդունելի իմ է:
Ոչ երկեայց ես ի բիւրաւոր զօրաց նոցա, ոյք շուրջանակի պատեալ պաշարեալ պահէին զիս:
Արի՛, Տէ՛ր, եւ փրկեա՛ զիս, Աստուա՛ծ իմ. զի Դու հարեր զամենեսեան, ոյք էին ընդ իս թշնամութեամբ ի տարապարտուց, եւ զատամունս մեղաւորաց փշրեսցես:
Տեառնդ է փրկութիւն, ի վերայ ժողովրդեան Քո՝ օրհնութիւն Քո:

ՍԱՂՄՈՍ ՁԷ
Տէ՛ր Աստուած փրկութեան իմոյ, ի տուէ կարդացի եւ ի գիշերի առաջի Քո:
Մտցեն աղօթք իմ առաջի Քո, Տէ՛ր, խոնարհեսցի ունկն Քո ի խնդրուածս իմ,
Զի լցաւ չարչարանօք անձն իմ, եւ կեանք իմ ի դժոխս մերձեցան, եւ համարեցայ ես ընդ այնոսիկ, որք իջանեն ի գուբ:
Եղէ ես որպէս մարդ առանց օգնականի եւ ի մեռեալս ազատ:
Որպէս զվիրաւորս, որք ննջեն ի գերեզմանի:
Զորս Դու ոչ յիշեցեր, նոքա ի ձեռանէ Քումմէ մերժեցան:
Եդին զիս ի գբի ներքնումն՝ ի խաւարի եւ ի ստուերս մահու:
Յիս հաստատեցաւ սրտմտութիւն Քո, զամենայն զբօսանս Քո ածեր ի վերայ իմ:
Հեռի արարեր յինէն զծանօթս իմ, եւ եդին զիս նշաւակ իւրեանց:
Մատնեցայ եւ ոչ ելանէի, աչք իմ տկարացան յաղքատութենէ:
Աղաղակեցի առ Տէր զօրհանապազ եւ համբարձի առ Քեզ զձեռս իմ:
Մի՞թէ մեռելոց առնիցես զսքանչելիս Քո, կամ բժիշկք յարուցեալ խոստովան առնիցի՞ն առ Քեզ:
Մի՞թէ պատմեսցէ ոք երբեք ի գերեզմանի զողորմութիւնս Քո կամ զճշմարտութիւնս Քո` ի կորստեան:
Մի՞թէ ճանաչիցին ի խաւարի սքանչելիք Քո, կամ արդարութիւն Քո` յերկիր մոռացեալ:
Ես առ Քեզ, Տէ՛ր, աղաղակեցի. առաւօտու աղօթք իմ ժամանեսցեն առ Քեզ:
Ընդէ՞ր, Տէ՛ր, մերժես զանձն իմ կամ դարձուցանես զերեսս Քո յինէն:
Տնանկ եւ վաստակաւոր եմ ես ի մանկութենէ իմմէ. ի բարձրութենէ խոնարհեցայ եւ ապշեցայ:
Յիս հաստատեցաւ բարկութիւն Քո, արհաւիրք Քո խռովեցուցին զիս,
Շրջեցան զինեւ որպէս ջուր, զօր ամենայն պաշարեցին զիս ի միասին:
Հեռի արարեր յինէն զբարեկամս իմ եւ զծանօթս իմ վասն թշուառութեան իմոյ:

ՍԱՂՄՈՍ ՃԲ
Օրհնեա՛, ա՛նձն իմ, զՏէր, եւ ամենայն ոսկերք իմ՝ զանուն սուրբ Նորա:
Օրհնեա՛, ա՛նձն իմ, զՏէր եւ մի՛ մոռանար զամենայն տուրս Նորա.
Ո քաւէ զմեղս քո, բժշկէ զամենայն հիւանդութիւնս քո.
Ո փրկէ յապականութենէ զկեանս քո, պսակէ զքեզ ողորմութեամբ եւ գթութեամբ.
Ո լնու ի բարութենէ զցանկութիւն քո, նորոգեսցի որպէս արծուոյ մանկութիւն քո:
Առնէ ողորմութիւնս Տէր եւ իրաւունս ամենայն զրկելոց:
Եցոյց Տէր զճանապարհս Իւր Մովսիսի եւ որդւոցն Իսրայելի զկամս Իւր:
Գթած, ողորմած է Տէր, երկայնամիտ եւ բազումողորմ:
Ոչ ի սպառ բարկանայ Տէր եւ ոչ յաւիտեան պահէ ոխս:
Ոչ ըստ մեղաց մերոց արար մեզ եւ ոչ ըստ անօրէնութեան մերում հատոյց մեզ.
Այլ որպէս բարձր են երկինք յերկրէ, այնպէս զօրացոյց Տէր զողորմութիւն Իւր ի վերայ երկիւղածաց Իւրոց:
Որչափ հեռի են արեւելք յարեւմտից, այնչափ հեռի արար ի մէնջ զանօրէնութիւնս մեր:
Որպէս գթայ հայր ի վերայ որդւոց իւրոց, այնպէս գթասցի Տէր յերկիւղածս Իւր.
Զի Նա գիտաց զստեղծուածս մեր եւ յիշեաց, թէ հող եմք:
Մարդոյ որպէս խոտոյ են աւուրք իւր, որպէս ծաղիկ վայրի՝ այնպէս ծաղկէ:
Շնչէ ի նմա հողմ, եւ ոչ է, եւ ոչ եւս երեւի տեղի նորա:
Բայց ողորմութիւն Տեառն յաւիտեանս յաւիտենից ի վերայ երկիւղածաց Իւրոց, եւ արդարութիւն Նորա յորդւոց մինչեւ յորդիս,
Ոյք պահեն զուխտս Նորա, յիշեն զպատուիրանս Նորա եւ առնեն զնա:
Տէր յերկինս պատրաստեաց զաթոռ Իւր, արքայութիւն Նորա ամենեցուն տիրէ:
Օրհնեցէ՛ք զՏէր, ամենայն հրեշտա՛կք Նորա՝ հզօրք զօրութեամբ, ոյք առնէք զբան Նորա ի լսել ձայնի պատգամաց Նորա:
Օրհնեցէ՛ք զՏէր, ամենայն զօրութի՛ւնք Նորա, պաշտօնեա՛յք եւ արարո՛ղք կամաց Նորա:
Օրհնեցէ՛ք զՏէր, ամենայն գո՛րծք Նորա. զի ընդ ամենայն տեղիս է տէրութիւն Նորա. օրհնեա՛, ա՛նձն իմ, զՏէր:

ՍԱՂՄՈՍ ՃԽԲ
Տէ՛ր, լո՛ւր աղօթից իմոց, ո՛ւնկն դիր խնդրուածաց իմոց ճշմարտութեամբ Քով:
Լո՛ւր ինձ արդարութեամբ Քով եւ մի՛ մտաներ ի դատաստան ընդ ծառայի Քում, զի ոչ արդարանայ առաջի Քո ամենայն կենդանի:
Հալածեաց թշնամին զանձն իմ, խոնարհ արար յերկիր զկեանս իմ եւ նստոյց զիս ի խաւարի որպէս մեռեալ յաւիտենից:
Ձանձրացաւ յիս հոգի իմ, եւ սիրտ իմ խռովեցաւ յիս:
Յիշեցի զաւուրսն զառաջինս, խորհեցայ յամենայն գործս Քո. յարարածս ձեռաց Քոց խորհեցայ եւ համբարձի առ Քեզ զձեռս իմ:
Անձն իմ որպէս զերկիր ծարաւի է առ Քեզ. վաղվաղակի լո՛ւր ինձ, Տէ՛ր, զի նուաղեաց յինէն հոգի իմ:
Մի՛ դարձուցաներ զերեսս Քո յինէն. նմանիցեմ այնոցիկ, ոյք իջանեն ի գուբ:
Լսելի՛ արա ինձ առաւօտու զողորմութիւնս Քո, զի ես ի Քեզ, Տէ՛ր, յուսացայ:
Ցո՛յց ինձ ճանապարհ, յոր եւ գնացից, զի առ Քեզ, Տէ՛ր, համբարձի զանձն իմ:
Փրկեա՛ զիս ի թշնամեաց իմոց, Տէ՛ր, զի զՔեզ ապաւէն ինձ արարի:
Ուսո՛ ինձ առնել զկամս Քո, զի Դու ես Աստուած իմ:
Հոգի Քո բարի առաջնորդեսցէ ինձ յերկիր ուղիղ:
Վասն անուան Քո, Տէ՛ր, կեցուսցես զիս, արդարութեամբ Քով հանցես ի նեղութենէ զանձն իմ:
Ողորմութեամբ Քով սատակեա՛ զթշնամիս իմ եւ կորո՛ զամենայն նեղիչս անձին իմոյ, զի ես ծառայ Քո եմ:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԵՐԳ ԳԻՇԵՐԱՅԻՆ
տեառն Ներսեսի Հայոց կաթողիկոսի

Յիշեսցուք ի գիշերի զանուն Քո, Տէ՛ր:
Բղխեսցեն սիրտք մեր զբան բարի, եւ լեզուք մեր պատմեսցեն զգործս երկնաւոր Թագաւորիդ:
Ի մէջ գիշերի յարուցեալ՝ խոստովանեսցուք զՔեզ, Տէ՛ր:
Զաղօթս մեր տացուք Քեզ, Տէ՛ր, ի գաւիթս Քո ի մէջ նոր Երուսաղեմի:
Ի գիշերի համբարձցուք զձեռս մեր սրբութեամբ առ Քեզ, Տէ՛ր:
Ի ձայն գոհութեան, ամենա՛յն հոգիք, օրհնեցէ՛ք զՏէր:
Փոխ. Զարթի՛ք, փա՛ռք իմ, զարթի՛ք, եւ ես զարթեայց առաւօտուց. ալէլուիա:
Զարթի՛ք ընդ զուարթունս, մանկու՛նք վերինն Սիոնի. ալէլուիա:
Զարթի՛ք, որդի՛ք լուսոյ, ի յօրհնութիւն Հօրն լուսոյ. ալէլուիա:
Զարթի՛ք, փրկեա՛լք արեամբ, եւ տո՛ւք զփառս Փրկողին. ալէլուիա:
Զարթի՛ք, նո՛ր ժողովուրդք՝ նոր երգս առեալ Նորոգողին. ալէլուիա:
Զարթի՛ք, հարսո՛ւնք հոգւով՝ սպասեալք գալոյ սուրբ Փեսային. ալէլուիա:
Զարթի՛ք, վառեա՛լք լուսով, ըստ իմաստուն սուրբ կուսանացն. ալէլուիա:
Զարթի՛ք, պատրաստեցէ՛ք իւղ լապտերաց ջերմ արտասուս. ալէլուիա:
Զարթի՛ք եւ մի՛ ննջէք, նման յիմար կուսից նիրհէք. ալէլուիա:
Զարթի՛ք, երկիր պագցուք եւ արտասուօք զայս ասասցուք. ալէլուիա:
Փոխ. Զարթի՛ր, ընդէ՞ր ննջես, Տէ՛ր, մի՛ մերժեր զմեզ ի սպառ:
Արի՛, Տէ՛ր, օգնեա՛ մեզ. տացուք անուանդ Քում զփառս:
Այժմ եւ յաւէտ Հօր եւ Որդւոյ եւ Սուրբ Հոգւոյն. ամէն:
Փոխ. Զարթուցեալքս ի զբաղմանէ գիշերային հանգստենէ:
Շնորհեսցէ մեզ մարդասէր Տէր մխիթարութիւն եւ ի սփոփանս Եկեղեցւոյ:
Ահիւ եւ դողութեամբ կացցուք ի յաղօթս:
Եկեալ խոստովանեսցուք զյանցանս:
Եւ գտցուք ի Քրիստոսէ զքաւութիւն եւ զմեծ զողորմութիւն:
Կցորդ. Անբաժանելի եւ համագոյ Երրորդութեանդ, համաձայնեալք ընդ զօրս երկնից, փառս մատուցանեմք:
Փա՜ռք Քեզ, որ յանարուեստ յաթոռ բարձրացեալ՝ հանգչիս, սո՛ւրբ Աստուած՝ հզօր եւ սքանչելագործ:
Փա՜ռք Քեզ, որ յանէից գոյացուցեր զամենայն արարածս, սո՛ւրբ Աստուած՝ անճառ Հօր անեղ Որդի:
Փա՜ռք Քեզ, որ տեսչութեամբ խնամես զամենայն արարածս, սո՛ւրբ Աստուած՝ Բղխումն անսպառ աղբեր:
Տէ՛ր, ժողովրդապետք Եկեղեցւոյ ի Քէն հայցեն՝ ասելով. «Հովի՛ւ բարի, ողորմեա՛ բանաւոր հօտի»:

Ամէն. ալէլուիա, ալէլուիա, ալէլուիա:
Ամէն. ալէլուիա, ալէլուիա, ալէլուիա:

ՔԱՐՈԶ
Զարթուցեալքս ամենեքեան ի հանգստենէ քնոյ, զոր շնորհեաց մեզ մարդասէրն Աստուած ի մխիթարութիւն եւ ի սփոփանս տկարութեան մերում, եւ եկեալքս միաբան հոգեւոր երգով ի փառաբանութիւն եւ ի պատիւ ամենասուրբ անուան Տեառն մերոյ եւ Փրկչին Յիսուսի Քրիստոսի՝ ահիւ եւ դողութեամբ կացցուք յաղօթս առաջի Նորա: Եւ գոհացարուք զՆմանէ ի գիշերային ժամուս յայսմիկ վասն իրաւանց եւ արդարութեան Նորա. որ ընտրեաց զմեզ ողորմութեամբն Իւրով եւ շնորհեաց մեզ բերել զնմանութիւն երկնային հրեշտակացն ի փառաբանիչս Տեառն Աստուծոյ ամենեցուն եւ մեզ լինիլ: Եւ մեք, այսուհետեւ սրբելով զանձինս մեր ի խղճէ եւ ի չար գործոց, համբարձցուք զձեռս մեր ի սրբութիւն առանց բարկութեան եւ երկմտութեան: Հաւատով խնդրեսցուք ի Նմանէ զքաւութիւն եւ զթողութիւն յանցանաց մերոց՝ խոստովան լինելով զգաղտնիս սրտից մերոց ծածկագիտին Աստուծոյ: Որպէս զի ընդունելով զպաղատանս մեր աղօթիւք եւ բարեխօսութեամբ ամենայն սրբոց՝ շնորհեսցէ մեզ մարդասէրն Աստուած կեալ առաքինութեամբ եւ անարատ վարուք ըստ կամաց Նորա յայսմ աշխարհիս եւ արժանաւոր լինելով յաւիտենական եւ երկնային խորանացն, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս: Տէ՛ր մեր, կեցո՛ եւ ողորմեա՛:
Կեցո՛, Տէ՛ր:
Զմնացուած գիշերիս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՈՂԲԵՐԳՈՒԹԻՒՆ ԱՆՁԻՆ ԶՂՋԱՑԵԼՈՅ
տեառն Ներսեսի Հայոց կաթողիկոսի

Աշխա՛րհ ամենայն, առ իս նայեցեալ՝ ախտակի՛ց լերուք:
Բանամ զշրթունս, բարբառիմ լեզուաւս, բողոքեմ զանձնէս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Գող եղէ մեղաց, գտող կորստեան, գուբ ինձ փորեցի:
Դաւեցի զանձն իմ, դաւաճանեցի, դարան գործեցի.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Երբեմն էի լոյս. եւ այժմ եմ խաւար եւ ստուեր մահու:
Զիա՞րդ պատմեցից զթիւ մեղաց իմոց, զի բազում են յոյժ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Էրկի՛նք եւ երկի՛ր, էկայք ողբացէ՛ք էղկելի զանձն իմ:
Ընտրեցի զչարն, ընկալայ կամաւ ըզհոյլս մեղաց.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Թաթաւիմ տղմով, թաւալիմ ի մեղս. թօթափիլ չկարեմ:
Ժանտ ախտիւ լցեալ՝ ժահահոտ եղէ ժամանակս բազումս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ի բաց մեկնեցայ ի սուրբ խորհրդոց, ի բարեաց գործոց:
Լաւ վարկաւ անձն իմ լուսոյն հեռանալ, լինել ընդ խաւար.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Խորհուրդք չարին խաբեն զհոգիս, խորասոյզ առնեն:
Ծածկեն անդնդօք, ծիծաղին գլորմամբս, ծանակ զիս առնեն.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Կամաւ կորացայ կարկամեալ անձամբս. կանգնիլ ոչ կարեմ:
Հուր մեղաց կիզող հրդեհեաց որ յիս հոգեւոր բարիս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ձաղկեցայ մեղօք, ձաղեցին տեսողք, ձանձրացաւ հոգիս:
Ղեղի դառնութեան, ղօղեալ ի սիրտ իմ, ղամբար իմ շիջաւ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ճաշակմամբ մեղաց ճաշեցի զմահ, ճոխս աղքատացայ:
Մեռեալ եմ հոգւովս, մոլորեալ՝ մտօքս, միայն կամ մարմնովս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Յորոգայթ մահու յորսողին անկայ, յաղթեցայ յախտից:
Նետից թշնամւոյն նշաւակ եղէ. նոր միշտ խոցոտիմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Շուրջ պատեալ զինեւ շունք բազումք եղեն. շաղախին արեամբս:
Որս եղէ չարին. ուռկանաւ մեղաց որսացաւ զանձն իմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Չարաչար վշտօք չարչարի անձն իմ. չունիմ դադարումն:
Պարտապան գտայ պարտուց յանցանաց պարտեալս ի մեղաց.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ջանամ զղջանալ, ջեռանիմ դարձեալ, ջեռնում հրով մեղաց:
Ռաբբի կոչեցայ, ռակայ անուանիմ ռամկական վարուքս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սիրով ցանկութեան սաստիկ բարկութեան սիրտ իմ խոցեալ է:
Վիրօք յանցանաց վշտանայ հոգիս. վարանեալ շրջիմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Տիրեցին ինձ չարք. տարագիր հանին տիրական գրկացն:
Րաբունւոյն բարւոյ րախճական ձայնին րոտինս ոչ լուայ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ցանկութիւն չարեաց ցանկալի դիմօք ցաւեցոյց զաչս իմ:
Ււրաքանչիւրոց ւիւսմամբ խուռն ախտից ւիւծեալ է հոգիս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Փութացի՛ր, ա՛նձն իմ, փախչիլ ի չարեաց, փափագիլ բարեաց:
Քեզ միշտ մե՛րձ ծանիր քուն մահու եկեալ քննող Դատաւոր.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սրբուհւոյ Աստուածածնին բարեխօսութեամբ յիշեա՛, Տէ՛ր, եւ ողորմեա՛:


ԱՂՕԹՔ
ԶՔէն գոհանամք, Տէր Աստուա՛ծ մեր, որ շնորհեցեր մեզ հանգիստ քնոյ խաղաղութեամբ: Եւ զարթուցեալ ժամանեցուցեր զմեզ կանխել յերկրպագութիւն ահաւոր եւ փառաւորեալ անուանդ Քում սրբոյ: Տո՛ւր մեզ, Տէ՛ր, աղաչեմք զՔեզ, զմնացուած գիշերիս խաղաղութեամբ անցուցանել. եւ զամենայն ժամանակս կենաց պանդխտութեան մերոյ երկիւղիւդ Քո ամրացո՛ եւ պահեա՛: Որպէս զի զգուշութեամբ եւ անարատ վարուք կրօնաւորեալք յայսմ աշխարհիս՝ ժամանեսցուք յանքոյթ եւ ի խաղաղ նաւահանգիստ յաւիտենական ի կեանսդ՝ շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի: Ընդ Որում Քեզ Հօր եւ Հոգւոյդ Սրբոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Նայեա՛ց, Տէ՛ր բարերար, ողորմութեամբ Քով յերկրպագուս եւ ի փառաբանիչս անուանդ Քում սրբոյ: Տէ՛ր զօրութեանց, խաղաղացո՛ զանձինս մեր յամենայն սատանայական խռովութեանց եւ յաշխարհական զբօսանաց: Զհրեշտակ խաղաղութեան Քո առաքեա՛ առ մեզ, որ եկեալ պահեսցէ զմեզ անխռովս ի տուէ եւ ի գիշերի, յարթնութեան եւ ի հանգստեան մերում: Որպէս զի բարեպաշտութեամբ եւ արժանաւորապէս Քեզ Տեառնդ ծառայելով ի կեանս յայսոսիկ՝ ժամանեսցուք յաւիտենական երկնից արքայութեան Քո, զոր պատրաստեցեր ի սկզբանէ աշխարհի սրբոց Քոց: Եւ ընդ նոսին գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից:

Օրհնեալ Տէր մեր Յիսուս Քրիստոս. ամէն:
Ալէլուիա, ալէլուիա:

ԿԱՆՈՆ «Ողորմեա», ԲՁ (սաղմոս ԾԵ-ՀԱ)
Ձայն Տեառն ի վերայ ջուրց, եւ Աստուած փառաց որոտաց, եւ Տէր ինքն ի վերայ ջուրց բազմաց:

ԿԱՆՈՆԱԳԼՈՒԽ

ՍԱՂՄՈՍ Հ
Ի Քեզ, Տէ՛ր, յուսացայ, մի՛ ամաչեցից յաւիտեան. ալէլուիա. յարդարութեան Քում փրկեա՛ եւ ապրեցո՛ զիս. ալէլուիա:
Խոնարհեցո՛ առ իս զունկն Քո եւ կեցո՛ զիս:
Լե՛ր իմ, Աստուա՛ծ, ապաւէն եւ տեղի ամուր՝ կեցուցանել զիս, զի հաստատութիւն իմ եւ ապաւէն իմ Դու ես:
Աստուա՛ծ իմ, փրկեա՛ զիս ի ձեռաց մեղաւորի, ի ձեռաց անօրինի եւ անիրաւի:
Դու ես համբերութիւն իմ, Տէ՛ր. Տէ՛ր, յոյս իմ ի մանկութենէ իմմէ:
Ի Քեզ հաստատեցայ ես յարգանդէ, յորովայնէ մօր իմոյ Դու ես ապաւէն իմ, եւ առ ի Քէն է օգնութիւն իմ յամենայն ժամ:

ՍԱՂՄՈՍ ՀԱ
Փոխ. Երկիր պագցեն Նմա ամենայն թագաւորք երկրի, եւ ամենայն ազգք ծառայեսցեն Նմա. ալէլուիա, ալէլուիա:
Զի փրկեաց զաղքատն ի ձեռաց հզօրի, զաղքատն եւ զտնանկն, որոյ ոչ է իւր օգնական:
Անխայեսցէ Նա յաղքատն եւ ի տնանկն եւ զանձինս տնանկաց կեցուսցէ, ի վաշխից չարաց փրկեսցէ զանձինս նոցա:
Պատուական է անուն Նորա առաջի նոցա, կեցցէ եւ տացի նմա յոսկւոյն Արաբացւոց:
Յաղօթս կացցեն առ Նա յամենայն ժամ եւ զօրհանապազ օրհնեսցեն զՆա:
Եղիցի հաստատութիւն ընդ ամենայն երկիր եւ ի վերայ գլխոց լերանց:
Բարձրասցի քան զԼիբանան պտուղ նորա եւ ծաղկեսցի ի քաղաքի Տեառն որպէս խոտ երկրի:
Եղիցի անուն Տեառն օրհնեալ յաւիտեան, զի յառաջ քան զարեւ է անուն Նորա:
Ի Նա օրհնեսցին ամենայն ազգք երկրի, եւ ամենայն ազինք երանիցեն Նմա:
Օրհնեալ Տէր Աստուած Իսրայելի, որ առնէ սքանչելիս միայն, եւ օրհնեալ է անուն սուրբ փառաց Նորա յաւիտեան:
Լցցի փառօք Նորա ամենայն երկիր. եղիցի, եղիցի:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Ալէլուիա, ալէլուիա:

ՇԱՐԱԿԱՆ ՀԱՆԳՍՏԵԱՆ

Հանգստեան բձ.

(Տրյ. Հանգստեան բձ. Ա.)

Հրեշտակային ձայնիւն օրհնեսցուք զԱմենասուրբ զԵրրորդութիւնն՝ փառաւորելով զՀայր, որ վերակոչեաց զամենեսեան ի մահուանէ յանմահութիւն։
Երգեցէ՛ք Տեառն երգ նոր, Եկեղեցի՛ք սրբեցելոց, Քրիստոսի երկրպագելով, որ վերադասեաց զամենեսեան ի մահուանէ յանմահութիւն։
Սրբասաց ձայնիւն օրհնեսցուք, հոգեւորական հնչմամբ գովեսցուք՝ Սուրբ զՀոգին փառաւորելով, որ վերահանգոյց զամենեսեան ի մահուանէ յանմահութիւն։

(Տրյ. Հանգստեան բձ. Բ.)

Ի ձայն փողոյ գալստեան Քո, Տէ՛ր, ամենայն հոգիք զարթիցեն՝ կալ ի դատաստանի Քում, Քրիստո՛ս Աստուած մեր:
Յորժամ հնչէ բարբառն ահագին, եւ հարկանի փող յարութեան մերոյ, եւ մեք գոչելով ասեմք. «Փա՜ռք գալստեան Քո, Տէ՛ր»:
Յորժամ առնես հատուցումն, Տէ՛ր, եւ սուրբք Քո պարծեսցին ի Քեզ, եւ մեզ շնորհեսցես, Փրկի՛չ, կալ ի յաջմէ Քումմէ։

(Տրյ. Հանգստեան բձ. Գ., 1-2 տներ)

Թագաւո՛ր անմահ, Արարի՛չ յաւիտենից, մարդասիրութեամբդ Քո խնայեա՛ յանձինս մեր, Ստեղծի՛չ կենդանեաց եւ Հանգուցի՛չ ննջեցելոց։
Ի խաչին բեւեռեցար, զմահու լուծեր զիշխանութիւն, յաւիտենից զննջեցեալսն վերածեր յանմահ ի կեանս, Ստեղծի՛չ կենդանեաց եւ Հանգուցի՛չ ննջեցելոց:

(Օրհ. Մեծի պահոց Զ կիւրակէի բձ. Բ.)

Ըստ աւետեաց մարգարէին, որ առ փրկեալքս արեամբ Գառինդ, ցնծամք եւ մեք ծառք անտառի ընդ գալուստ Տեառնդ կրկնակի. շնորհեա՛ մեզ, Տէ՛ր, ընդ արդարոցն՝ ընդ առ ի Քէն տնկեալ ծառոցն, այժմ յուսով զուարճանալ եւ յերկրորդին ընդ Քեզ ցնծալ:
Սմին նման տայ աւետիս Զաքարիաս նոր Սիոնի, եթէ՝ «Ուրա՛խ լեր, ահա գայ առ Քեզ խոնարհ եւ հեզ Արքայ՝ նստեալ ի յէշ եւ յաւանակ՝ կրկին ազանց գոլ օրինակ». Նստեա՛լդ յաթոռ քերովբէից, նի՛ստ գթութեամբ ի մեր հոգիս:
Զահեղ փառաց Քոց երեւումն, որ լինելոց է յերկրորդումն, ետես Դաւիթ յառաջագոյն, ծանոյց կանխաւ ազդմամբ Հոգւոյն, թէ՝ «Յայտնապէս Աստուած գայցէ, հուր առաջի Իւր բորբոքէ». յայնժամ, Յիսո՛ւս, ի մեզ խնայեա, գթա՛, Քրիստո՛ս, եւ ողորմեա՛:
Աստուածածի՛ն անհարսնացեալ, յերկրէ յերկինս հա՛րսն ընծայեալ, յորժամ բազմիս լուսոյ նման Քո Միածնիդ յաջակողմեան, յայնժամ մաղթեա՛ ընդ մեր զնոյն փրկել զմեզ յահեղ բոցոյն, համադասիլ ընդ արդարոց, երգել զփառս ընդ երկնայնոցն:

(Ողր. ապաշխարութեան բձ. Ա.)

Դարձո՛ զցասումն Քո ի մէնջ յաղաղակել հողեղինացս. բազմագո՛ւթ Տէր, խնայեա՛ եւ մի՛ կորուսաներ:
Կանգնեա՛ զանկեալս ի գլորմանէ, զվիրաւորեալս ի թշնամւոյն. որ բժիշկդ ես հիւանդաց, բժշկեա՛ զիմ զհիւանդութիւնս:
Ի յանցանաց իմոց թախծեալ անձն իմ, գոչեմ որպէս զմաքսաւորն. «Աստուա՛ծ, քաւեա՛ զիս՝ զմեղաւորս»:

(Օրհ. Յարութեան Ղազարու բձ.)

Յաստուածային ձայնէ գոչմանն սարսեցին դողալով կարապետք դժոխոց, եւ մեռեալն եկն արտաքս անապական:
Կեցեալ ի դուրս այրին եւ ձայնէր ազդ արարող բարբառովն ի գերեզմանն. «Ղազարէ՛, ե՛կ արտաքս անապական»:
Ելեալ ի գերեզմանէն երիզապինդ պատանօքն մեռեալն, հրամայեաց լուծանել ի կեանսն յաւիտենից:

(Ողր. Յարութեան բձ. Ա.)

Իջեր յերկնից, Որդի՛ Աստուծոյ, ազատեցեր զարարածս. անկանիմ առաջի Քո. ողորմեա՛ ինձ, Աստուած:
Ի խաչին բեւեռեցար, Աստուա՛ծ, եւ զմարդն ի կապանաց մահու արձակեցեր. եւ զիս մի՛ անտես առներ, որ մեղօքս եմ մեռեալ:
Ծագո՛ւմն Հօր յանմատոյց լուսոյն, որ իջեր ի գերեզման, կենդանացուցեր զարարածս Քո, եւ զիս մի՛ անտես առներ, քանզի Քեզ միայնոյ մեղայ:

(Օրհ. Հոգեգալստեան Բ աւուր բձ. Բ.)

Սարսափելի հողմոյ նման ահեղագոչ սաստիկ հնչմամբ երեւեցար ի վերնատանն, Հոգի՛դ, դասուն երկոտասան, որք առ ի Քէն մկրտեցան, որպէս զոսկի հրով մաքրեցան. մաքրեա՛ ի մէնջ զմէգ մեղաց եւ զգեցո՛ զլոյս փառաց։
Էկիր յերկիր աստուածաբար՝ դատել զաշխարհս իշխանաբար, ընդ արդարութեան եւ ընդ մեղաց եւ ընդ չարին դատաստանաց. բացեր զգանձդ անհիւթական, պարգեւս ետուր որդւոց մարդկան. մաքրեա՛ ի մէնջ զմէգ մեղաց եւ զգեցո՛ զլոյս փառաց։
Սէրն ի սիրոյ զՍէրդ առաքեաց, յԻնքն զանդամս Իւր Քեւ յօդեաց. զԵկեղեցի Իւր, զոր շինեաց, եօթն սեամբ Քո հաստատեաց. տնտես ի նմա եդ զառաքեալսն, եօթնեակ շնորհօք Քո զարդարեաց. մաքրեա՛ ի մէնջ զմէգ մեղաց եւ զգեցո՛ զլոյս փառաց։

(Ողր. Սուրբ Ծննդեան Է աւուր բձ.)

Խոնարհեցար ի բարձանց եւ մարմնացար ի Կուսէն, որ նստէիրդ ի քրովբէս, Արարի՛չդ արարածոց:
Երկինք չէին բաւական փառաց անմահ Անեղիդ. արգանդ Կուսին ժուժկալեալ՝ ընդունել զԳանձդ երկնային:
ՅՈրմէ սարսեալ սերովբէքն՝ ոչ իշխէին մերձենալ, ի խանձարուրս պատեցար եւ եդար ի մսուր յանբանից:

(Ողր. Գիւտ խաչին բձ.)

Այսօր խնդրի պատուական փայտ խաչին՝ աւանդեալն ի Գողգոթա, ի ձեռն աստուածասէր դշխոյին. եկա՛յք, հաւատացեա՛լք, երկրպագեսցուք աստուածային սուրբ նշանիս:
Այսօր ընծայէ Գողգոթա զծածկեալն ի յերկրի՝ վերաբերեալ անուշահոտ խնկովք, ի ձեռն երանելւոյն Յուդայի. եկա՛յք, հաւատացեա՛լք, երկրպագեսցուք աստուածային սուրբ նշանիս:

Փա՜ռք Հօր եւ Որդւոյ եւ Հոգւոյն Սրբոյ:

Այսօր ի ձեռն փրկական սուրբ խաչին կենագործի պատանին մեռեալ, եւ ողբայ սատանայ զկործանումն իւր. իսկ մեք, Քրիստոսի՛ հաւատացեալք, երկրպագեսցուք աստուածային սուրբ նշանիս:

Այժմ եւ միշտ եւ յաւիտեանս յաւիտենից. ամէն:

(Տրյ. Հանգստեան բձ. Գ., 3-րդ տուն)

Արժանաւորաց Քոց աղօթիւք յիշեա՛ զմեր զննջեցեալսն, յորժամ գայցես անճառ փառօք՝ հատուցանել մարդկան ըստ գործս. եւ մեր ննջեցելոցն շնորհեա՛ դասիլ ընդ սուրբս Քո։

ՍԱՂՄՈՍ ԾԳ
Աստուա՛ծ, յանուան Քում կեցո՛ զիս եւ ի զօրութեան Քում իրա՛ւ արա ինձ:
Աստուա՛ծ, լո՛ւր աղօթից իմոց, ո՛ւնկն դիր բանից բերանոյ իմոյ:
Օտարք յարեան ի վերայ իմ, եւ հզօրք խնդրեցին զանձն իմ եւ ոչ համարեցան զՔեզ Աստուած առաջի իւրեանց:
Ահա Աստուած օգնական իմ, եւ Տէր ընդունելի հոգւոյ իմոյ:
Ի դարձուցանել զչարն ի թշնամիս իմ՝ ճշմարտութեամբ Քով սատակեա՛ զնոսա:
Ես կամօք իմովք պատարագս մատուցից Քեզ եւ խոստովան եղէց անուան Քում, Տէ՛ր, զի բարի է:
Յամենայն նեղութենէ իմմէ փրկեցեր զիս, եւ ի թշնամիս իմ ետես ակն իմ:

ԱՒԵՏԱՐԱՆ ՏԱՃԱՐԻ
(ԲՁ, ԴՁ)

Սրբոյ Աւետարանիս Յիսուսի Քրիստոսի, որ ըստ Մարկոսի
(գլ. 13.1-13)

Տեառն մերոյ Յիսուսի Քրիստոսի

Եւ յելանելն Նորա ի տաճարէ անտի ասէ ցՆա մի յաշակերտացն Նորա. «Վարդապե՛տ, տե՛ս, որպիսի են քարինքս, եւ որպիսի շինուածք:
Պատասխանի ետ նմա Յիսուս եւ ասէ. «Տեսանե՞ս զայդ ամենայն շինուածս. ամէն ասեմ ձեզ, եթէ ոչ թողցի այդր քար ի քարի վերայ, որ ոչ քակտեսցի»:
Եւ մինչ նստէր Նա ի լերինն Ձիթենեաց յանդիման տաճարին, հարցանէին ցՆա առանձինն Պետրոս եւ Յակովբոս եւ Յովհաննէս եւ Անդրէաս:
«Ասա՛ մեզ. ե՞րբ լինիցի այդ, եւ զի՞նչ նշան է, յորժամ կատարելոց իցէ այդ ամենայն»: Պատասխանի ետ Յիսուս եւ ասէ ցնոսա. «Զգո՛յշ կացէք, մի՛ ոք զձեզ խաբիցէ, զի բազումք եկեսցեն յանուն Իմ եւ ասիցեն, թէ՝ ես եմ Քրիստոսն, եւ զբազումս մոլորեցուսցեն:
Այլ յորժամ լսիցէք պատերազմունս եւ համբաւս պատերազմաց, մի՛ խռովիցիք, զի պարտ է լինել, բայց չեւ է կատարած:
Զի յարիցէ ազգ յազգի վերայ, եւ թագաւորութիւն ի թագաւորութեան վերայ, եւ եղիցին շարժմունք ի տեղիս տեղիս, սովք եւ սրածութիւնք եւ խռովութիւնք. այլ այն ամենայն սկիզբն է երկանց:
Եւ զձեզ իսկ մատնեսցեն յատեանս, եւ ի ժողովուրդս տանջիցիք եւ առաջի դատաւորաց եւ թագաւորաց կայցէք վասն Իմ ի վկայութիւն նոցա եւ ամենայն հեթանոսաց. բայց նախ պարտ է աւետարանիս քարոզել:
Այլ յորժամ տանիցին զձեզ մատնել, մի՛ յառաջագոյն հոգայցէք եւ մի՛ զմտաւ ածիցէք, թէ զինչ խօսիցիք. այլ որ ինչ տացի ձեզ ի ժամուն յայնմիկ, զա՛յն խօսիցիք. զի ոչ դուք էք, որ խօսիցիքն, այլ Հոգին Սուրբ:
Մատնեսցէ եղբայր զեղբայր ի մահ, եւ հայր զորդի, եւ յարիցեն որդիք ի վերայ հարց եւ սպանանիցեն զնոսա:
Եւ եղիջիք ատեցեալք յամենեցունց վասն անուան Իմոյ. այլ որ համբերեսցէն ի սպառ, նա կեցցէ»:

ԵՐԳ ՏԵԱՌՆ ՆԵՐՍԵՍԻ
(ասացեալ առ ի Քրիստոս ննջեցելոց)

(ԲՁ, ԴՁ)

Ժողովեալքս ի հրաժարումն
Ծառայի Քո յաշխարհէ
Հայցեմք ի Քէն արտասուելով
Եւ պաղատիմք՝ զայս ասելով.
Ճանապարհ ընդ Քեզ ելից
Ննջեցելոյս լե՛ր ուղեկից,
Ի յօթեւանս Հօր Քո լուսոյ
Զննջեցեալս մեր հանգո՛:

Ի փրկութեան մերոյ սկզբան
Մկրտեցար ի Յորդանան,
Զոր շնորհեցեր նոր աւազան
Ի մաքրութիւն մեղաց մարդկան.
Հայցմամբ կրկին Կարապետին՝
Մեծին ի ծնունդս Մկրտչին,
Ի յօթեւանս Հօր Քո լուսոյ
Զննջեցեալս մեր հանգո՛:

Լուսաւոր ձայնիւ յերկնից
ԶՔեզ դաւանեաց Հայր էակից.
Աղաւնակերպ Հոգին իջեալ,
Առ համագոյդ Իւր հանգուցեալ.
Զմկրտեալս նովին Հոգւով
Յորդեգրութիւն Հօր հաւատով
Ի յօթեւանս Հօր Քո լուսոյ
Զննջեցեալս մեր հանգո՛:

Խաւար մեղաց հալածեցաւ,
Լոյս գիտութեան Քեւ ծագեցաւ,
Խայթուած օձին բժշկեցաւ,
Հիւանդութիւն մեր ողջացաւ.
Կենդանարա՛րդ մեռելոց
Եւ Լուսատո՛ւդ խաւարելոց,
Ի յօթեւանս Հօր Քո լուսոյ
Զննջեցեալս մեր հանգո՛:

Ծագումն անուն առ ի Հօրէ,
Որ ընտրեցեր ի յաշխարհէ,
Լուսաւորի՛չ տիեզերաց,
Զդասս ընտրեալ աշակերտաց.
Աղաչանօք առաքելոց՝
Փող յարութեան մեր եղելոց,
Ի յօթեւանս Հօր Քո լուսոյ
Զննջեցեալս մեր հանգո՛:

Կեա՛նք ի Կենաց, Լո՛յս ի Լուսոյ,
Որ ստեղծեր զմեզ ի հողոյ,
Նորոգեցեր դարձեալ կրկին
Ծննդեամբ սրբոյ աւազանին,
Զոր կեցուցեր շնորհիւ Քոյին
Ի մահուանէն այն առաջին.
Ի յօթեւանս Հօր Քո լուսոյ
Զննջեցեալս մեր հանգո՛:

Հոգւով լցեր զմարդն առաջին,
Զոր կորուսեալ խաբմամբ չարին.
Զնոյն Հոգի բանիւ Քոյին
Հեղեր յոգիս մեր վերստին.
Նովին Հոգւով Սուրբ եւ բարի
Առաջնորդեա՛ հոգւոյ սորին.
Ի յօթեւանս Հօր Քո լուսոյ
Զննջեցեալս մեր հանգո՛:

Ձայնեցեր առ Ղազարոս,
Որով ետուր մեռելոց յոյս.
Կենդանութեամբ չորեքօրեայն
Կենդանացան, որք յԱդամայն:
Կենաց ձայնիւ վերջին փողոյ
Կոչեա՛ զսա յայսմ հողոյ.
Ի յօթեւանս Հօր Քո լուսոյ
Զննջեցեալս մեր հանգո՛:

Ղօղեալ սարսեաց պահակ մահու
Ի կենարար ձայնին լրոյ,
Արագապէս զոյգ ընդ բանին
Ետ զմեռեալն ըստ հրամանին.
Իշխանք օդոյս այս սարսեսցեն,
Զհոգի սորա մի՛ արգելցեն.
Ի յօթեւանս Հօր Քո լուսոյ
Զննջեցեալս մեր հանգո՛:

ԵՐԳ
Աղաչանօք սրբոյ խաչին
Եւ անբարբառ բարեխօսին,
Եւ սրբոյ Աստուածածնին,
Եւ Յովհաննու Կարապետին,
Եւ սրբոյն Ստեփանոսին
Եւ առաջին մարտիրոսին,
Եւ սրբոյ Լուսաւորչին՝
Հայաստանեայց հայրապետին,
Եւ սրբոց առաքելոց,
Եւ համօրէն մարտիրոսաց.
Ողորմա՛ծ Տէր, ողորմեա՛
Հոգւոցն մեր ննջեցելոց:

ՄԱՂԹԱՆՔ
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն. եւ մեզ՝ մեղաւորացս, շնորհեա՛ զթողութիւն յանցանաց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայելէ փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

ՄԱՂԹԱՆՔ
Քրիստոս Աստուա՛ծ մեր, անճառելի տէրութեանդ շնորհիւ եւ բարեխօսութեամբ օրհնաբանեալ անարատ ծնողիդ՝ սրբուհւոյ Աստուածածնին եւ միշտ Կուսին, լուսաւորեալ պայծառացո՛ զհոգիս համօրէն հաւատացելոց, յուսով ի Քեզ ննջեցելոց, եւ այնոցիկ, որք ընդ հովանեաւ սրբոյ տաճարիս են հանգուցեալ:

ՇԱՐԱԿԱՆ ՕՐՀՆՈՒԹԵԱՆ

Օրհնութիւն սրբոց կուսանացն Հռիփսիմեանց դկ.

(Օրհ. Սրբոցն Հռիփսիմեանց դկ., 1-34 տներ)

Անձի՛նք նուիրեալք սիրոյն Քրիստոսի, երկնաւոր նահատա՛կք եւ կուսա՛նք իմաստունք, ի պարծանս ձեր բարձրացեալ՝ տօնէ մայր Սիոն դստերօքն իւրովք:
Բարբառք երկնաւորք լցին զերկիր, քանզի հոտ անուշից բուրեցայք ի Քրիստոս, ողջակէ՛զք բանաւորք եւ զո՛հք փրկութեան եւ որո՛ջք անարատք՝ ընծայեալք Աստուծոյ:
Գեղեցկութիւնք մարմնաւոր պայծառութեան ձերոյ յիմարեցոյց զթագաւորն, եւ պակեան հեթանոսք. ի գեղ սքանչելի աստուածատուր կուսանացն տարփացեալ՝ զուարթունքն ընդ մարդկան տօնեցին:
Դարձեալ վերստին արարչագործ զօրութիւն, եւ դարձեալ Եդեմ աստուածատունկ զարդարի, քանզի ծառն կենաց տնկեցաւ ի դրախտին՝ բերելով մեզ պտուղ զերանելին Հռիփսիմէ:
Երկունք մահաբերք անիծիցն լուծան, եւ Ադամ վերստին աստուածակերպ ճոխանայ. փոխանակ Եւայի՝ դստերք նորա, մարտիրոսք եւ կուսանք ընծայեալք Աստուծոյ:
Զօրք հրեշտակաց ընդ մարդկան տօնեցին, եւ կանայք ի յերկինս գրեցան զինաւորք. կուսութեամբ ընդ մահու պատերազմեալք յաղթեցին՝ խաչակից լինելով կուսածին Արարչին:
Է զարմացումն եւ ի վեր քան զհրաշս խորհրդոց եւ բանից հրեշտակաց եւ մարդկան, քանզի Էնն Աստուած ամենազօր զօրութեամբն խոնարհեալ՝ տեսանէր զհանդէս կուսանացն:
Ընկերք միամիտք մարմնական կենցաղոյս, նահատակք հաւասարք եւ հոգւով միացեալք, միաբան ընթացեալք ի տեղի ճակատու՝ զինեցան հաւատով եւ կացին յանդիման:
Թուլացան կորովիք հաստաձիգ աղեղանց, եւ տկար կանայքն վառեցան զինու. թագաւորն պերճացեալ զօրութեամբ եւ փառօք, ի մանուկ ի կուսէն պարտեալ՝ ամաչէր:
Ժողովեալ բազմութեան ազգաց եւ ազանց՝ ոչ զօրէին առ մի նահատակ, քանզի հասեալ ի թիկունս աներեւոյթ օգնութիւնն՝ խորտակեաց յայտնապէս զգաղտնի պատերազմն:
Ի վերայ միոյ պատուական մարգարտի խաղացին ցնծալով ամենայն հեթանոսք. արեւմուտք յարեւելս ընթացեալ հասին՝ քարոզել յայտնապէս զչքնաղ տեսութիւն:
Լուան թագաւորք եւ լցան խնդութեամբ, որսալ յանձն առին զգաղտնի մեծութիւնն. պարգեւել իրերաց խոստանային բանիւք եւ ծածուկ հնարիւք գողանալ ի միմեանց:
Խորհուրդք հոգեւորք յղութեանցն յայտնէր, եւ երկունք փրկութեան աշխարհի ճեպէին, քանզի կամք վերին հրամանին քաղցրացեալ իջուցին ի վերուստ զպարգեւս փրկութեան:
Ծնան կուսանք ազգս բազումս, եւ մարք մանկունք զհրապարակս ծերոց. ի գիրկս սրբութեան աղօթից եւ պահոց աճեցին հաւատով՝ զարգացեալք ի Քրիստոս:
Կանայք պատուականք քաղաքաւ եւ ազգաւ, վաճառականք առատք անյայտ մարգարտին եդին զանձինս գրաւականս բազմաց եւ եղեն փրկանք անծանօթ աշխարհին:
Հռիփսիմէ՝ մեծ խորհուրդ եւ անուն ցանկալի, ընտրեալ ի յերկրի եւ դասեալ ընդ հրեշտակս. եղեր օրինակ սրբութեան կուսանաց, վարդապետութիւն արանց արդարոց:
Ձեզ նմանիլ կարօտին ամենայն հոգիք՝ միացեալք սրբութեամբ եւ սիրոյն Քրիստոսի, զի մահուամբ ձերով մեզ ճանապարհ հորդեցիք՝ ելանել ամենայն մարդոյ առ Աստուած:
Ղեկավարք ճարտարք հոգեւոր հմտութեամբ, թեթեւաբեռն մարմնով եւ մտօք սլացեալք. ընդ երկայն ասպարէզս ծովածուփ կենցաղոյս անվնաս նաւեցիք եւ հասիք առ Քրիստոս:
Ճշմարիտ որթոյն Քրիստոսի շառաւիղք եւ ողկոյզք՝ ճմլեալք երկնաւոր Մշակին. կոխեցայք ճգնութեամբ ի հնձանս ձեր, զի ուրախ լինիջիք անմահական բաժակաւն:
Մերժեցին զկարիս մարմնական կենցաղոյս, զի ծանեան, եթէ երազ է եւ սուտ պաճուճանք. ոչ հեշտացան ի գրգանս փափկութեան, իմացան, եթէ սնոտի է անցաւոր մեծութիւնս:
Յանդաստանս հոգեւորս աղօթից եւ պահոց վաստակեալք յուսով զամենայն ժամանակս, ժուժկալեալք փորձութեանց եւ պէս պէս լլկանաց եւ եղեալք ժառանգորդք անթառամ պսակին:
Նախանձելի յօրինեցին զառագաստ կուսութեան՝ նոր նորոգեալ արեամբ եւ հրով. մատնեցին զանձինս սուսերաց եւ ջահից եւ անշէջ լապտերօքն հետեւեալ՝ մտին յառագաստն:
Շինուածք երկնաւորք ի յերկրի հաստատեալք եւ արձանք լուսեղէնք ի յերկինս կանգնեալք՝ ինքեանք ելին եւ այլոց ցուցին զճանապարհս ցանկալի զվերինն Երուսաղեմի:
Ո՛վ զգաստութեան իմաստուն կուսանացն, որոց ոչ յաղթեաց հեղգութիւն եւ քուն, այլ արթունք եւ պատրաստք մնալով երկնաւոր հարսանեացն, զի մտցեն ի յառագաստ անմահ Փեսային:
Չունի ոք ի նոսա անուն չարութեան եւ ոչ նախատինս յիմար կոչելոյ. քանզի միով պնդութեամբ հոգւով արութեան միաբան քաջացան, առ հասարակ ցնծասցեն:
Պարակցեալք քաջազէն բռնութեամբ՝ ի յերկրէ ի յերկինս տարադէմ գնացին փախստեայք. ինքեանք ելին եւ մեզ ուսուցին բազում նեղութեամբ մտանել յայն հանգիստն:
Ջերմեռանդն աղօթիւք եւ սիրովն առ Աստուած հայցեցին զհնարս փրկութեան՝ բառնալով զխաւար դիւապաշտ մոլորութեանց յաշխարհէ, պայծառացեալք լուսովն, որ ի Հօրէ ծագեցաւ:
Ռահս յոլովս առաքինութեան յայտնեցին որդւոց մարդկան վերանալ յաշխարհէ՝ անստերիւր հոգեւորական վարուք ելանել ի բանակս երկնաւորս անմարմին հրեշտակացն:
Սոքա են քարինք սուրբք՝ հիմնեցեալք ի յերկրի, զոր կանխաւ տեսեալ՝ գուշակեաց մարգարէն. ի նոյն ի նիւթոյ շինեցաւ կաթուղիկէ Եկեղեցի՝ բարձրացեալ փառօք ի պարծանս խաչին:
Վասն ձեր, երանեա՛լ նահատակք, զօրք հրեշտակաց անմարմին զուարթնոցն ի յերկնից ի յերկիր հեղան, եւ մարդիկ խառնեցան ի գունդս զինուորաց Քրիստոսի Աստուծոյ:
Տօնեսցուք ստուգութեամբ ի հնձանս նոցունց, զի արբեալք լիցուք անմահական բաժակաւն, քանզի բաշխեն զբժշկութիւն հոգւոց եւ մարմնոց եւ զպարգեւս երկնաւորս սիրողաց իւրեանց:
Րաբունւոյն հրամանաւ աներեւոյթ ազդմամբ յարեւմտից յարեւելս եկեալ հասին, զի լուսով հրեշտակական վարուք կուսութեան փարատեցին զխաւար դիւապաշտ մոլորութեանցն:
Ցնծութեամբ տօնեսցուք զյիշատակս նոցունց, զի եւ նոցին հաղորդեսցուք փրկութեան՝ խնդրելով յԱրարչէն զպարգեւս երկնաւորս եւ զդասիլն ընդ նոսին ի յարկսն լուսեղէն:
Ւիւծեալք մաշեցան յուսացեալք ի մեծութիւն, եւ կանայք վեհազինք գերազանցեալք յաղթեցին. բուրվառք ոսկեղէնք հրով Հոգւոյն վառեցան՝ ջահազգեստեալք ի Քրիստոս եւ դասեալք ընդ հրեշտակս:

(Ողր. Հոգեգալստեան Դ աւուր դկ.)

Աղբի՛ւր կենաց, Բաշխո՛ղ շնորհաց, Հոգի՛դ՝ իջեալ ի բարձանց, զանապական պարգեւս Քո բաժանեցեր յառաքեալս։
Որ ի վերայ ջուրցն գոլով՝ ստեղծանէիր զարարածս, իջեալ ի ջուրս աւազանին՝ ծնանիս որդիս Աստուծոյ։
Որ զարդարեալ նորոգես միշտ զնոր Քո զԵկեղեցի, պէս պէս շնորհաց Քոց պարգեւօք փայլին մանկունք սորա։

(Տրյ. Հանգստեան դկ. Բ.)

Խնդրեմք ի Քէն, Թագաւո՛ր փառաց, Փառաւորեա՛լդ ի զուարթնոց. զննջեցեալսն մեր ընկա՛լ, մարդասէ՛ր Տէր, եւ հանգո՛ ընդ սուրբս Քո։
Յորժամ գաս փառօք Հօր՝ դատել զերկիր, արդարութեան Արեգա՛կն, զննջեցեալսն մեր ընկա՛լ, մարդասէ՛ր Տէր, եւ հանգո՛ ընդ սուրբս Քո։
Ի նստիլ Քո յատենի, Դատաւո՛ր ահեղ, Քրիստոս Փրկի՛չ մեր եւ Յո՛յս, զննջեցեալսն մեր ընկա՛լ, մարդասէ՛ր Տէր, եւ հանգո՛ ընդ սուրբս Քո։

(Օրհ. Վերափոխման սուրբ Աստուածածնին Բ աւուր դկ. Գ., 16-18 տներ)

Հոյլք վերին զօրացն իջեալ, շուրջ զԿուսիւն պար առեալ. զերգս օրհնութեան եղանակեալ, քաղցր ձայնիւ ակումբ առեալ. զեռահիւսեակն նուագեալ, զՄի Տէրութիւնն երգաբանեալ:
Ձայնակից նոցին եղեալ դասք երջանիկ պետացն ընտրեալ, ի Հոգւոյն վերաբերեալ, որք յընդհանուր աշխարհ սփռեալ. անմարմնոցն համաձայնեալ, զԿոյսն սուրբ օրհնաբանեալ:
Ղամբարափայլ ջահիւք լուցեալ, սուրբ կուսանացն գումարեալ, զերգս օրհնութեան նուագեալ ի պատիւ մօրն ամէնօրհնեալ. բարեբանեալ ես, Կո՛յս գովեալ, յորմէ Աստուած Բանն ծնեալ:

(Տրյ. Խաչվերացի շաբաթու դկ.)

Խաչի Քո, Քրիստո՛ս, երկրպագեն արարածք ամենայն, որ ի փրկութիւն մեզ կանգնեցաւ. սա եղիցի մեզ պահապան յաղթող՝ ապրեցուցանել զմեզ ի պատրանաց բանսարկուին:
Ի սմա բարձրացար, Բարձո՛ղդ անիծից, որ փառաւորեալդ ես ընդ Հօր, ժողովել զհեռացեալսն կենսաբեր փայտիւն, ապրեցուցանել զմեզ ի պատրանաց բանսարկուին:
Սովաւ լուսաւորեցան արարածք ամենայն, սմա սպասէին արգելեալքն ի մեղսասէր բանտին, որ ազատեաց զմեզ ի պատրանաց բանսարկուին:

Փա՜ռք Հօր եւ Որդւոյ եւ Հոգւոյն Սրբոյ:

(Օրհ. Սրբոցն Հռիփսիմեանց դկ., 35-րդ տուն)

Փառաց ի փառս բարձրացեալ՝ պարծին ի պատիւ եւ ի փառս երեսուն եւ եօթեանքն, քանզի այս է թիւ երանեալ կուսանացն, որք անթառամ պսակեցան յանվախճան յաւիտեան:

Այժմ եւ միշտ եւ յաւիտեանս յաւիտենից. ամէն:

(Օրհ. Սրբոցն Հռիփսիմեանց դկ., 36-րդ տուն)

Քեզ, որ ցնծութիւնդ ես, Քրիստո՛ս Աստուած, եւ ուրախութիւն ամենայն արդարոց, քաղցրասցին վասն մեր աղաչանք սրբոցն՝ շնորհելով զթողութիւն մեր բազում յանցանացն:

ՄԱՂԹԱՆՔ
Բարեխօսութեամբ սրբուհւոյ Աստուածածնին եւ Յովհաննու Մկրտչին, սրբոյն Ստեփանոսի Նախավկային եւ սրբոյն Գրիգորի մերոյ Լուսաւորչին, յիշատակաւ եւ աղօթիւք սրբոց կուսանացն Գայիանեանց, որոց այսօր է յիշատակ, եւ վասն խաչի Քո պատուականի, Տէ՛ր, ընկա՛լ զաղաչանս մեր եւ կեցո՛ զմեզ:

ՔԱՐՈԶ
(ԲՁ, ԴՁ)
Վասն գտանելոյ մեզ զշնորհս եւ զողորմութիւն ի բարերար Տեառնէ մերմէ զՏէր աղաչեսցուք:
Տէ՛ր, ողորմեա՛:
Վասն փրկելոյ զմեզ ի զրպարտութենէ մարդկան եւ յորոգայթից սատանայի զՏէր աղաչեսցուք:
Տէ՛ր, ողորմեա՛:
Վասն ամենայն անձանց քրիստոնէից եւ տանց հաւատացելոց զՏէր աղաչեսցուք:
Տէ՛ր, ողորմեա՛:
Վասն որք ի լերինս, յայրս եւ ի փապարս բնակեալ են՝ սուրբ հարքն մեր, զՏէր աղաչեսցուք:
Տէ՛ր, ողորմեա՛:
Վասն որք սաղմոսիւք եւ օրհնութեամբ կատարեն զամենայն ժամանակս կենաց իւրեանց զՏէր աղաչեսցուք:
Տէ՛ր, ողորմեա՛:
Վասն հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
(ԲՁ, ԴՁ)
Գոհանամք զՔէն, Տէր Աստուա՛ծ մեր, որ զարթուցեր զմեզ ի հանգստենէ քնոյ շնորհիւ ողորմութեան Քո: Զարթո՛ զմիտս մեր արդարութեամբ առ Քեզ, Տէր Աստուա՛ծ մեր, զի տեսցեն աչք մեր զփրկութիւն Քո: Եկեսցէ եւ բնակեսցի առ մեզ Աստուածութիւն Քո, եւ ողորմութիւն Քո հովանի եւ պահապան լիցի ի վերայ պաշտօնէից Քոց: Եւ զմեզ՝ զծառայքս Քո, արժանի՛ արա ի տուէ եւ ի գիշերի եւ յամենայն ժամու միշտ խորհիլ ի սէր պատուիրանաց Քոց եւ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Կենդանարար զօրութիւն եւ աղբիւր անմահութեան Դու ես, Քրիստո՛ս Աստուած Փրկիչ մեր, որ շնորհեցեր մեզ ի մէջ գիշերի յառնել եւ խոստովան լինիլ առ Քեզ վասն իրաւանց եւ արդարութեան Քո. եւ այժմ աղաչեմք զՔեզ, Տէր Աստուա՛ծ մեր, արա՛ զմեզ արթունս եւ պատրաստս ի ժամ առաւօտու ընդ սուրբս Քո եւ ընդ նոսին գոհանալով փառաւորել զՔեզ ընդ Հօր եւ ընդ Սուրբ Հոգւոյդ այժմ եւ միշտ եւ յաւիտեանս յաւիտենից. ամէն:

Թագաւոր յաւիտեան:
Բարեխօսութեամբ սրբոց կուսանացն Գայիանեանց պարգեւեա՛ մեզ, Տէ՛ր, առնուլ մասն եւ բաժին ընդ հրաւիրեալսն ի կոչումն արքայութեան երկնից:
Սաղմոս. Սքանչելի է Աստուած ի վերայ սրբոց Իւրոց, Աստուած Իսրայելի: Նա տացէ զօրութիւն հաստատութեան ժողովրդեան Իւրոյ. օրհնեալ է Աստուած առնուլ մասն եւ բաժին ընդ հրաւիրեալսն ի կոչումն արքայութեան երկնից:
Փոխ. Մարտիրո՛սք երանեալք եւ փառաւորեալք, որք բազում տանջանացն համբերեցիք. դուք զլոյսն կենաց զգեցեալ ունիք, եւ առ Քրիստոս վասն մեր բարեխօսեցէ՛ք:

ՄԱՂԹԱՆՔ
(ԲՁ, ԴՁ)
Գոհութեամբ եւ ճշմարիտ խոստովանութեամբ անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: