ՍԱԴՈՒԿԵՑԻՆԵՐ | Ս. ՍԱՀԱԿ ՊԱՐԹԵՎ (348-439) | Ս. ՍԱՀԱԿ ԵՎ Ս. ՀՈՎՍԵՓ ԿԱՐՆԵՑԻՆԵՐ (+808) | ՍԱՂԱՎԱՐՏ | ՍԱՂՄՈՍ | ՍԱՂՄՈՍԱՎԱՆՔ | ՍԱՂՄՈՍԵՐԳՈՒԹՅՈՒՆ | ՍԱՄԱՐԱՑԻ | ՍԱՄՈՒԵԼ ՄԱՐԳԱՐԵ | ՍԱՄՓՍՈՆ | ՍԱՆԱՀԻՆԻ ՎԱՆՔ | Ս. ՍԱՆԴՈՒԽՏ (+46) | ՍԱՏԱՆԱ | Ս. ՍԱՐԳԻՍ ԶՈՐԱՎԱՐ (+363) | Ս. ՍԱՐԳԻՍ ԵՎ Ս. ԲԱԳՈՍ ՎԿԱՆԵՐ (+300) | ՍԱՐԳԻՍ ՇՆՈՐՀԱԼԻ (XII դ.) | ՍԱՐԿԱՎԱԳ | ՍԵՂԱՆ | ՍԵՎԱՆԱՎԱՆՔ | ՍԵՐ | Ս. ՍԻՄԵՈՆ ՍՅՈՒՆԱԿՅԱՑ (+459) | ՍԿԻՀ | ՍՅՈՒՆԻ ՎԱՆՔ | ՍՈԴՈՄ ԵՎ ԳՈՄՈՐ | ՍՈՂՈՄՈՆ ԹԱԳԱՎՈՐ | Ս. ՍՈՓԻԱ, Ս. ՊԻՍՏՈՍ, Ս. ԷԼՊԻՍ ԵՎ Ս. ԱԳԱՊԵ (+137) | ՍՈՓՈՆԻԱ ՄԱՐԳԱՐԵ (մ. թ. ա. VII դ. երկրորդ կես) | ՍՊԻՏԱԿԱՎՈՐ Ս. ԱՍՏՎԱԾԱԾԻՆ ՎԱՆՔ | Ս. ՍՏԵՓԱՆՈՍ ՆԱԽԱՎԿԱ | ՍՏԵՓԱՆՈՍ ՍՅՈՒՆԵՑԻ (մոտ 660-735) | ՍՐԲԱԶԱՆ ԱՎԱՆԴՈՒԹՅՈՒՆ | ՍՐԲԱՊԱՏԿԵՐ | ՍՐԲԵՐ | ՍՐԲՈՒԹՅՈՒՆ | ՍՐԲՈՒԹՅՈՒՆ ՍՐԲՈՑ | ՍՈՒՐԲ ԵՐՐՈՐԴՈՒԹՅՈՒՆ | ՍՈՒՐԲ ՀՈԳԻ | Ս. ՍՈՒՔԻԱՍՅԱՆՔ (+ 140-ական թթ.)

---

id445Սողոմոնը Դավիթ թագավորի 10-րդ որդին էր, որին նա շատ էր սիրում և, երբ ծերացավ, հրամայեց, որ նրան օծեն ու ողջ ժողովրդի առջև հայտարարեն Իսրայելի ապագա թագավոր: Վախճանից առաջ Դավիթը Սողոմոնին տվեց իր վերջին պատգամները՝ միշտ պահպանել սրտի մաքրությունն ու հավատարմությունը Տիրոջ նկատմամբ և արդար լինել ամեն ինչում, ինչպես նաև նկարագրեց իր վաղեմի երազանքի՝ Աստծո տաճարի կառուցման մանրամասները:

Սողոմոնը ճշտությամբ կատարեց հոր բոլոր խորհուրդները: Եվ Աստծո շնորհը նրա վրա էր:
Մի օր Տերը երազում ասաց նրան, որ խնդրի Իրենից, ինչ որ ցանկանում է: Եվ Սողոմոնը խնդրեց ոչ թե հարստություն, փառք կամ հաղթություն թշնամիների նկատմամբ, այլ իմաստություն, որպեսզի կարողանա առանց մեղանչելու, արդարությամբ դատել և կառավարել ժողովրդին: Աստված գնահատեց Սողոմոնի խոնարհ ու ազնիվ ցանկությունը և նրան ոչ միայն իմաստուն և հանճարեղ սիրտ շնորհեց, այլև փառք ու հարստություն, այնպես որ նրա նման մեկ այլ թագավոր չգտնվեց երկրի վրա:
Սողոմոնը կառավարում էր Իսրայելի ժողովրդին մեծ իմաստությամբ և արդարությամբ: Իր գիտելիքներով ու խորաթափանց մտքով նա գերազանցում էր Արևելքի բոլոր իմաստուններին և ապշեցնում իր հյուրերին: Նրա թագավորության օրոք ժողովուրդն ապրում էր անհոգ ու երջանիկ, որովհետև խաղաղություն էր տիրում, և երկիրը շարունակ բարգավաճում էր:
Սողոմոնը ոչինչ չխնայեց Երուսաղեմի Տաճարի համար, որպեսզի այն փայլի վեհաշուք տեսքով: Երբ տաճարը կառուցվում էր, Աստված Սողոմոնին ասաց. «Եթե դու շարժվես Իմ օրենքներով, առաջնորդվես Իմ որոշումներով և կատարես Իմ բոլոր պատվիրանները, Ես կապրեմ Իսրայելի որդիների մեջ ու չեմ լքի Իմ ժողովրդին» [Գ Թագ. 6.12-13]:
Եվ արդարև, Սողոմոնի թագավորության շրջանը Իսրայելի պատմության ոսկե դարը եղավ:
Սակայն երբ նա ծերացավ, հրապուրվելով իր թագավորության փառքով՝ հպարտացավ ու հեռացավ Աստծուց, մոռացավ Նրա խոստումը և նախազգուշացումը, թողեց իր հայրերի հավատը և սկսեց ծառայել կուռքերի: Բացի այդ, նա սկսեց անարդար վարվել իր ժողովրդի հետ՝ ծանրացնելով հարկերը: Այս ամենի հետևանքով Աստված երես թեքեց Սողոմոնից, ժողովուրդն աստիճանաբար դադարեց սիրել նրան, ու բազմացան դժգոհությունները, որոնք ի վերջո հանգեցրին թագավորության պառակտմանը (տե՛ս Իսրայելի թագավորներ):
Սակայն որքան էլ մեծ էր Սողոմոնի անկումն ու մոլորությունը, նրա թագավորության առաջին տարիների իմաստությունը և փառքը՝ այդ ընթացքում նրա գրած գրքերով հանդերձ, մնում են որպես Եկեղեցու սրբազան ժառանգությունը: Նրա առակների գիրքն առ այսօր մեզ համար առաքինության և իմաստության ուղեցույց են հանդիսանում, իսկ մարգարեական Երգ երգոցը Քրիստոսին և Եկեղեցուն միավորող սիրո խորհուրդների գանձարանն է: