|
30 նոյեմբերի 2024թ. շաբաթ, ԳՁ Սրբոց առաքելոցն եւ առաջին լուսաւորչացն մերոց Թադէոսի եւ Բարդուղիմէոսի Ս. ԲԱՐԴՈՒՂԻՄԵՈՍ ԱՌԱՔՅԱԼ Նոր Կտակարանում Բարդուղիմեոսը հիշատակվում է նաև Նաթանայել անունով: Հիսուսը, նրա մասին վկայելով, ասում է. «Ահա, արդարև, մի իսրայելացի, որի մեջ նենգություն չկա» [Հովհ. 1.47]: Նաթանայելը առաջինն է Հիսուսին Աստծո Որդի դավանում [տե՛ս Հովհ. 1.49], այդ իսկ պատճառով կոչվում է նախադավան առաքյալ:Բարդուղիմեոս առաքյալն իր քարոզչությամբ հասել է մինչև Հնդկաստան և հետդարձի ճանապարհին մտել է Հայոց աշխարհ: Նա իր քարոզչությունը սկսել է Գողթն գավառում, որտեղ կառուցել է Ս. Տյառնընդառաջ կոչվող եկեղեցին: Ավանդության համաձայն՝ Բարդուղիմեոսը Հայաստան է բերել Տիրամոր սրբապատկերը և Անձևացյաց գավառում Անահիտ դիցուհու մեհյանի տեղում հիմնել է Ս. Աստվածածին եկեղեցին, ինչպես նաև կուսանոց:  Ս. Էջմիածնի գանձատուն, XVIII դ. Հեղինակ՝ Հովնաթան Հովնաթանյան Նա մեր երկրում բազում հրաշքներ է գործել և շատ աշակերտներ ունեցել: Նրա հետևորդներից էր նաև Սանատրուկ թագավորի քույրը՝ Ոգուհին, որը նահատակվել է ս. Սանդուխտի պես: Ըստ ավանդության՝ Բարդուղիմեոս և Թադեոս առաքյալները հանդիպել են Հայաստանում՝ Արտաշատի կամրջի վրա: Բարդուղիմեոսի նահատակության մասին ասվում է, որ նրան թրածեծ արեցին և մարմինը նետեցին քաղաքից դուրս, բայց սուրբը դեռևս կենդանի էր, և շատերը վերջում լսեցին նրա խոսքը: Առաքյալն ավանդեց հոգին՝ տեսնելով ս. Թադեոս առաքյալի տեսիլքը երկնքում:  |
