---

Կարգաւորութիւն հասարակաց աղօթից Իններորդի ժամուն,
որ կատարի ի դէմս Որդւոյն Աստուծոյ, այլ եւ մահուանն եւ բանական հոգւոյն աւանդմանն


Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Օրհնեալ Որդիդ Սուրբ՝ Աստուած ճշմարիտ. ամէն:

ՍԱՂՄՈՍ Ծ
Ողորմեա՛ ինձ, Աստուա՛ծ, ըստ մեծի ողորմութեան Քում, ըստ բազում գթութեան Քում քաւեա՛ զանօրէնութիւնս իմ:
Առաւե՛լ լուա զիս յանօրէնութենէ իմմէ եւ ի մեղաց իմոց սո՛ւրբ արա զիս:
Զանօրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ:
Քեզ միայն մեղայ, Տէ՛ր, եւ չար առաջի Քո արարի,
Որպէս արդար եղիցիս ի բանս Քո եւ յաղթող ի դատել Քեզ:
Անօրէնութեամբ յղացաւ եւ ի մեղս ծնաւ զիս մայր իմ:
Դու, Տէ՛ր, զճշմարտութիւն սիրեցեր, զանյայտս եւ զծածկեալս իմաստութեամբ Քով յայտնեցեր ինձ:
Ցօղեա՛ յիս մշտկաւ, եւ սուրբ եղէց, լուա՛, եւ քան զձիւն սպիտակ եղէց:
Լսելի՛ արա ինձ զցնծութիւն եւ զուրախութիւն, եւ ցնծասցեն ոսկերք իմ տառապեալք:
Դարձո՛ զերեսս Քո ի մեղաց իմոց եւ զամենայն անօրէնութիւնս իմ քաւեա՛ յինէն:
Սիրտ սուրբ հաստատեա՛ յիս, Աստուա՛ծ, եւ հոգի ուղիղ նորոգեա՛ ի փորի իմում:
Մի՛ ընկենուր զիս, Տէ՛ր, յերեսաց Քոց եւ զՀոգի Քո Սուրբ մի՛ հաներ յինէն:
Տո՛ւր ինձ ցնծութիւն փրկութեան Քո եւ հոգւով պետութեան Քո հաստատեա՛ զիս:
Ուսուցից անօրինաց զճանապարհս Քո, եւ ամպարիշտք առ Քեզ դարձցին:
Փրկեա՛ զիս յարենէ, Աստուա՛ծ, Աստուա՛ծ փրկութեան իմոյ. ցնծասցէ լեզու իմ յարդարութեան Քում:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Թէ կամեցեալ էիր, պատարագս մատուցանէաք, բայց Դու ընդ ողջակէզս իսկ ոչ հաճեցար:
Պատարագ Աստուծոյ՝ հոգի խոնարհ. զսիրտ սուրբ եւ զհոգի խոնարհ Աստուած ոչ արհամարհէ:
Բարի՛ արա, Տէ՛ր, կամօք Քովք Սիոնի, եւ շինեսցին պարիսպքն Երուսաղեմի:
Յայնժամ հաճեսցիս ընդ պատարագս արդարութեան, ուխտից պատարագս հանցեն ի սեղան Քո զուարակս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:


ԵՐԳ ԻՆՆԵՐՈՐԴԻ ԺԱՄՈՒՆ

Չարչարակցեալ Քեզ տիւ լուսոյ՝
Երեք ժամու խաւարելոյ,
Պայծառացեալ յիններորդին՝
Ի տիպ լրման մահու ստուերին.
Ջա՛հդ լուսոյ մեծապայծառ,
Աւանդեցեր զհոգիդ առ Հայր.
Ռահիւ կցորդ Քեզ ի յերկինս
Զմեզ ուղղեա՛ Հոգւով Քոյին:

Սանդարամետք սարսեցին,
Զկապեալ հոգիսն արձակեցին,
Վէմք ի Վիմէդ պատառեցան,
Ի տապանաց մեռեալք յարեան.
Տարերք երկրի տատանէին,
Եւ աշխարհի սիւնք դողային.
Րամեալքս առ Քեզ պաղատեսցուք,
Զի ընդ արդարսն դասեսցուք:

Ցուցեր յայնժամ սքանչելիս,
Եւ այժմ մեզ ողորմեսցիս.
Ւիւծեալ բնութիւնս Քեւ ողջացաւ,
Շնորհեա՛ եւ մեզ լինել անցաւ.
Փոխան մահու Քո կենարար
Կեցո՛ զմեզ, Տէ՛ր բարերար.
Քեզ պաղատիմք ըստ աւազակին.
Յիշեա՛ զմեզ յօրն ահագին:


ՄԱՂԹԱՆՔ
Յամենայն ժամու աղաչանք իմ այս են. ի մեղաց իմոց սո՛ւրբ արա զիս, Տէ՛ր, եւ յօտարէն պահեա՛ զծառայս Քո, մարդասէ՛ր Տէր:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Աղաչեսցուք զկենսատու Փրկիչն մեր Քրիստոս, որ կամաւոր խաչելութեամբն Իւրով զարարածս փրկեաց եւ հեղմամբ արեան Իւրոյ զթողութիւն շնորհեաց յուսացելոց Իւրոց:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Անկեալ առաջի Քո, բարերար եւ բազումողո՛րմ Աստուած, աղաչեմք ամենայն սրտիւք մերովք եւ խնդրեմք զգթութիւն ի Քէն, որպէս խոստացար ծառայից Քոց եւ ասացեր. «Զամենայն, զոր ինչ խնդրիցէք հաւատով յանուն Որդւոյ ի Հօրէ, տացի ձեզ»: Շնորհեա՛ եւ այժմ հաւատացելոցս ի Քեզ եւ կատարեա՛ ի բարի զխնդրուածս մեր, զի ի Քեզ եմք ապաւինեալ: Եւ Քո առատ ողորմութեամբդ մխիթարեա՛ զմեզ ի կեանս յայսոսիկ եւ առաջնորդեալ հասո՛ յանճառ երկնից արքայութիւնդ ի փառաբանութիւն եւ ի պատիւ Ամենասուրբ Երրորդութեանդ այժմ եւ միշտ եւ յաւիտեանս յաւիտենից. ամէն:

Ի Սարկաւագ վարդապետէն ասացեալ
Յիշեա՛, Տէ՛ր, զպաշտօնեայս Քո, զծնողսն մեր, զվարդապետս, զեղբարս, զընկերս, զկերակրողս, զուխտաւորս, զճանապարհորդս, զհանգուցիչս, զվաստակաւորս, զխոստովանողս, զապաշխարողս, զգերիս, զհիւանդս, զնեղեալս, զիշխանս, զչարարարս, զբարերարս, զթշնամիս, զատելիս եւ որք պատուիրեցին մեզ հաւատով:

Յիշեա՛, Տէ՛ր, եւ ողորմեա՛:

Բարերար եւ բազումողո՛րմ Աստուած, Քո անմոռաց գիտութեամբդ եւ անբաւ մարդասիրութեամբդ յիշեա՛ զամենայն հաւատացեալս ի Քեզ եւ ողորմեա՛ ամենեցուն: Օգնեա՛ եւ փրկեա՛ յիւրաքանչիւր վտանգից եւ ի փորձութեանց: Արժանաւորեա՛ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԺԴ
Սիրեցի, զի լուիցէ Տէր զձայն աղօթից իմոց:
Զի խոնարհեցոյց զունկն Իւր առ իս, եւ ես յաւուրս իմ կարդացի առ Նա:
Շրջեցան զինեւ երկունք մահու, եւ վիշտք դժոխոց գտին զիս:
Զնեղութիւն եւ զանձկութիւն գտի, եւ զանուն Տեառն կարդացի:
Ո՛ Տէր, փրկեա՛ զանձն իմ. ողորմած եւ արդար է Տէր Աստուած մեր:
Ողորմի եւ պահէ զտղայս Տէր. ես խոնարհ եղէ, եւ Տէր կեցոյց զիս:
Դա՛րձ, ա՛նձն իմ, ի հանգիստ քո, զի Տէր օգնեաց քեզ:
Փրկեաց զանձն իմ ի մահուանէ, զաչս իմ՝ յարտասուաց եւ զոտս իմ՝ ի գայթակղութենէ:
Հաճոյ եղէց առաջի Տեառն յերկրին կենդանեաց:

ՍԱՂՄՈՍ ՃԺԵ
Հաւատացի, զոր եւ խօսեցայ, եւ ես խոնարհ եղէ յոյժ:
Ես ասացի ի զարմանալ իմում, թէ ամենայն մարդ սուտ է:
Զի՞նչ տաց տրիտուր Տեառն ընդ ամենայնի, զոր եւ ետ ինձ:
Զբաժակ փրկութեան ընկալայց եւ զանուն Տեառն կարդացից:
Զաղօթս իմ Տեառն տաց առաջի ամենայն ժողովրդեան Նորա:
Պատուական է առաջի Տեառն մահ սրբոց Իւրոց:
Ո՜ Տէր, ես ծառայ Քո եմ, ծառայ եւ որդի աղախնոյ Քո:
Հատեր զկապանս իմ. Քեզ մատուցից պատարագ օրհնութեան եւ զանուն Տեառն կարդացից:
Զաղօթս իմ Տեառն տաց առաջի ամենայն ժողովրդեան Նորա, ի գաւիթս տան Տեառն եւ ի մէջ քո, Երուսաղէ՛մ:

ՍԱՂՄՈՍ ՃԺԶ
Օրհնեցէ՛ք զՏէր, ամենա՛յն ազինք, գովեցէ՛ք զՆա, ամենա՛յն ժողովուրդք:
Զօրասցի ողորմութիւն Նորա ի վերայ մեր, եւ ճշմարտութիւն Տեառն մնասցէ յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՇԱՐԱԿԱՆ ՀԱՆԳՍՏԵԱՆ

(Ողր. Հանգստեան գկ.)

Յանսկզբնական ծոցոյ Հօր խոնարհեալ Բա՛նդ, մարմնացար ի Կուսէն վասն փրկութեան մերոյ. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Անոխակալ քաղցրութեամբ, Որդի՛ Աստուծոյ, հաճեցար բառնալ զմեղս աշխարհի Քո խաչելութեամբն. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Կամաւորական մահուամբ Քո լուծեր զերկունս մահու եւ արժանի արարեր թողութեան յանցանաց քաւիչ Քո արեամբ. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Որ փոխանակ մեղաւորաց զմեռանիլ յանձն առեր, իջանելով ի դժոխս՝ փրկեցեր ի մեղսասէր բանտէն զգերեալսն, աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։
Բարեբանեմք զանչափ Քո զմարդասիրութիւնդ, որ երեքօրեայ յարուցեալ՝ զկենդանութիւն պարգեւեցեր աշխարհի. աղաչեմք զՔեզ, զննջեցեալսն մեր ի Քեզ ուղիղ հաւատով՝ յիշեա՛, Տէ՛ր, յորժամ գաս թագաւորութեամբդ Քո։

(Աւագ օրհ. գկ. Է., 3-րդ տուն)

Մաքուր եւ անբիծ Կո՛յս յետ ծննդեան, որ մարմնով ծնար զԱրձակողն ի կապից մահու, բարեխօ՛ս լեր վասն անձանց մերոց փրկել ի սպառնալեաց գեհենոյն:

ՄԱՂԹԱՆՔ
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն եւ մեզ՝ մեղաւորացս, շնորհեա՛ զթողութիւն յանցանաց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

ՄԱՂԹԱՆՔ
Զսաղմոսերգութիւնս եւ զաղաչանս ընկալցի մարդասէրն Աստուած ի հաճոյս բարերար կամաց Իւրոց, մեր մեղացն եւ մեր բազում յանցանացն թողութիւն շնորհեսցէ, ի չարեաց փրկեսցէ, ի մեղաց պահեսցէ. եւ Նմա՝ փա՜ռք յաւիտեանս. ամէն:

Օրհնեալ թագաւորութիւն Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՃԱՇՈՒ ԺԱՄԱՄՈՒՏ
Քրիստոս յարեաւ ի մեռելոց. մահուամբ զմահ կոխեաց եւ յարութեամբն Իւրով մեզ զկեանս պարգեւեաց: Նմա՝ փա՜ռք յաւիտեանս. ամէն:

Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՃԱՇՈՒ ՓՈԽ

ՍԱՂՄՈՍ ՃԽԷ
Գովեա՛, Երուսաղէ՛մ, զՏէր:
Եւ օրհնեա՛ զԱստուած քո, Սիո՛ն:
Զի զօրացոյց զնիգս դրանց քոց եւ օրհնեաց զորդիս քո ի քեզ:
Ո եդ զսահմանս քո ի խաղաղութիւն, պարարտութեամբ ցորենոյ լցոյց զքեզ:
Առաքէ զբան Իւր յերկիր, վաղվաղ ընթանան պատգամք Նորա:
Դնէ զձիւն որպէս զասր եւ զմէգ որպէս փոշի ցանեաց:
Արկանէ զսառն որպէս պատառս. առաջի ցրտոյ Նորա ո՞ կարէ կալ:
Առաքէ զբան Իւր եւ հալէ զնոսա. շնչեսցեն հողմք, եւ գնասցեն ջուրք:
Պատմէ զբան Իւր Յակոբայ, զարդարութիւն եւ զիրաւունս՝ Իսրայելի:
Ոչ այսպէս արար ամենայն ազգաց Տէր եւ զդատաստանս Իւր ոչ յայտնեաց նոցա:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՃԱՇՈՒ ՇԱՐԱԿԱՆ

(Ճշւ. Յարութեան գկ.)

Լուսով Աստուածութեան Քո, Քրիստո՛ս, լուսաւորեցեր սուրբ զԵկեղեցի. պահեա՛ զսա անշարժ յաւիտեան:
Տօնէ այսօր Երուսաղէմ հաւատացելոց բազմութեամբ զնաւակատիս սուրբ Եկեղեցւոյ. պահեա՛ զսա անշարժ յաւիտեան:
Բացան դրունք հաւատոյ նոր Սիոնի՝ ընդունել զանմահ Փեսայդ յառագաստ. բաշխէ զմարմին Քո եւ զարիւն. պահեա՛ զսա անշարժ յաւիտեան:

ԵՐԵՔՍՐԲԵԱՆ
Սուրբ Աստուա՛ծ, սուրբ եւ հզօր, սուրբ եւ անմահ, որ յարեար ի մեռելոց. ողորմեա՛ մեզ:
(Երիցս կրկնեա՛)

ՔԱՐՈԶ
Եւ եւս խաղաղութեան զՏէր աղաչեսցուք:
Տէ՛ր, ողորմեա՛:
Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ զՏէր աղաչեսցուք:
Տէ՛ր, ողորմեա՛:
Վասն ամենայն սուրբ եւ ուղղափառ եպիսկոպոսաց զՏէր աղաչեսցուք:
Տէ՛ր, ողորմեա՛:
Վասն հայրապետին մերոյ տեառն (այս անուն) կենաց եւ փրկութեան հոգւոյ նորին զՏէր աղաչեսցուք:
Տէ՛ր, ողորմեա՛:
Վասն վարդապետաց, քահանայից, սարկաւագաց, դպրաց եւ ամենայն ուխտի մանկանց Եկեղեցւոյ զՏէր աղաչեսցուք:
Տէ՛ր, ողորմեա՛:
Վասն բարեպաշտ թագաւորաց եւ աստուածասէր իշխանաց, զօրավարաց եւ զօրաց նոցին զՏէր աղաչեսցուք:
Տէ՛ր, ողորմեա՛:
Վասն հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՄԱՂԹԱՆՔ
Զի ողորմած եւ մարդասէր ես՝ Աստուած գոլով, եւ Քեզ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԱՇՈՒ

ՍԱՂՄՈՍ ԺԶ
Լո՛ւր, Տէ՛ր, արդարութեան եւ նայեա՛ ի խնդրուածս իմ. ո՛ւնկն դիր աղօթից իմոց, զի ոչ շրթամբք նենգաւորօք:
Յերեսաց Քոց իրաւունք ինձ ելցեն, եւ աչք իմ տեսցեն զուղղութիւն:
Փորձեցեր զսիրտ իմ եւ քննեցեր ի գիշերի, փորձեցեր զիս, եւ ոչ գտաւ յիս անիրաւութիւն:
Մի՛ խօսեսցի բերան իմ զգործս որդւոց մարդկան. վասն բանից շրթանց Քոց ես պահեցից զճանապարհս խիստս:
Հաստատեա՛ զշաւիղս իմ ի ճանապարհի Քում, զի մի՛ գայթակղեսցին գնացք իմ:
Ես առ Քեզ, Տէ՛ր, կարդացի, զի լուար ինձ, Աստուա՛ծ. խոնարհեցո՛ առ իս զունկն Քո եւ լո՛ւր բանից իմոց:
Սքանչելի արարեր զողորմութիւնս Քո, ո փրկես զայնոսիկ, որ յուսացեալ են ի Քեզ՝ յայնցանէ, որ հակառակ կան աջոյ Քո:
Պահեա՛ զիս որպէս բիբ ական. ընդ հովանեաւ թեւոց Քոց ծածկեսցես զիս յերեսաց ամպարշտաց, ոյք տառապեցուցին զիս:
Թշնամիք զանձն իմ պաշարեցին, ի ճարպս իւրեանց արգելան, եւ բերանք նոցա խօսեցան զամբարտաւանութիւն:
Մերժեցին զիս, եւ այժմ դարձեալ պատեցան զինեւ, ուշ եդին խոնարհեցուցանել զիս յերկիր:
Համարեցան ինձ որպէս առիւծ, զի պատրաստ է յորս, որպէս կորիւն առիւծու, զի նստի դարանեալ:
Արի՛, Տէ՛ր, ժամանեա՛ նոցա եւ խափանեա՛ զնոսա. փրկեա՛ զանձն իմ յամպարշտաց ի սրոյ եւ ի ձեռանէ թշնամւոյն:
Տէ՛ր, կորո՛ զնոսա յերկրէ, բաժանեա՛ եւ խափանեա՛ զնոսա ի կեանս իւրեանց:
Գաղտնեօք Քովք լցան որովայնք նոցա, յագեցան կերակրովք եւ թողին զմնացուածս տղայոց իւրեանց:
Ես արդարութեամբ երեւեցայց երեսաց Քոց, յագեցայց յերեւիլ փառաց Քոց:

ՍԱՂՄՈՍ ԺԷ
Սիրեցից զՔեզ, Տէ՛ր, զօրութի՛ւն իմ. Տէր հաստատիչ իմ, ապաւէն իմ եւ փրկիչ իմ:
Աստուած օգնական իմ, եւ ես յուսամ ի Նա. ապաւէն իմ, եղջիւր փրկութեան իմոյ, ընդունելի իմ է:
Օրհնելով կարդացից առ Տէր եւ ի թշնամեաց իմոց ապրեցայց:
Շուրջ եղեն զինեւ երկունք մահու, եւ ուղխք անօրէնութեան խռովեցուցին զիս:
Վիշտք դժոխոց պաշարեցին զիս, եւ ժամանեցին ինձ որոգայթք մահու:
Ի նեղութեան իմում ես առ Տէր կարդացի եւ առ Աստուած իմ աղաղակեցի:
Լուաւ ինձ ի տաճարէ սրբոյ Իւրմէ ձայնի աղօթից իմոց, եւ աղաղակ իմ առաջի Նորա մտցէ յականջս Նորա:
Խռովեցաւ եւ դողաց երկիր, եւ հիմունք լերանց սասանեցան եւ խռովեցան, զի բարկացաւ ի վերայ նոցա Աստուած:
Ել ծուխ ի բարկութենէ Նորա, եւ հուր յերեսաց Նորա բորբոքեցաւ, եւ փայլատակունք հատան ի Նմանէ:
Խոնարհեցոյց զերկինս եւ էջ, եւ մէգ ի ներքոյ ոտից Նորա:
Ել ի քերովբէս եւ թռեաւ. եւ սլացաւ Նա ի թեւս հողմոց:
Եդ զխաւար ի ծածկոյթ Իւր, եւ շուրջ զՆովաւ են յարկք Իւր եւ խաւարային ջուրք մինչեւ յամպս օդոց:
Ի փայլատակել Նորա առաջի Նորա՝ ամպք անցուցին զկարկուտ եւ զկայծակունս հուր:
Որոտաց Տէր յերկնից, եւ Բարձրեալն ետ զձայն Իւր ի կարկուտ եւ ի կայծակունս հուր:
Առաքեաց զնետս Իւր եւ ցրուեաց զնոսա, յաճախեաց զփայլատակունս Իւր եւ խռովեցոյց զնոսա:
Երեւեցան աղբերք ջուրց, եւ յայտնեցան հիմունք աշխարհի:
Ի սաստէ Քումմէ, Տէ՛ր, եւ ի շնչել հոգւոյ բարկութեան Քո:
Առաքեաց ի բարձանց եւ ընկալաւ զիս, ընկալաւ զիս ի ջուրց բազմաց:
Փրկեսցէ զիս Տէր ի թշնամեաց իմոց հզօրաց եւ յատելեաց իմոց, զի հզօրք եղեն քան զիս:
Ժամանեցին ինձ յաւուր չարչարանաց իմոց. եղեւ Տէր հզօրիչ իմ եւ եհան զիս յանդորր եւ փրկեաց զիս Տէր, զի կամեցաւ զիս:
Հատուսցէ ինձ Տէր ըստ արդարութեան իմում, ըստ ամբծութեան իմում հատուսցէ ինձ:
Ես պահեցից զճանապարհս Տեառն եւ ոչ ամպարշտեցայց յԱստուծոյ իմմէ:
Ամենայն իրաւունք Նորա առաջի իմ են, եւ զարդարութիւն Իւր ոչ ի բացէ արար յինէն:
Եղէց եւ ես ամբիծ ընդ Նմա եւ զգուշացայց յանօրէնութենէ իմմէ:
Հատուսցէ ինձ Տէր ըստ արդարութեան իմում, ըստ սրբութեան ձեռաց իմոց առաջի աչաց Իւրոց:
Ընդ սրբոյն սուրբ եղիցես, ընդ առն ամբծի ամբիծ եղիցես, ընդ ընտրեալսն ընտրեալ եղիցես եւ զթեւրսն կործանեսցես:
Դու զժողովուրդս խոնարհս կեցուցանես եւ զաչս ամբարտաւանից Դու խոնարհեցուցանես:
Դու լուսաւոր առնես զճրագ իմ. Տէ՛ր Աստուած իմ, լո՛յս արա ինձ ի խաւարի:
Քեւ փրկեցայց ի փորձութենէ, Աստուծով իմով անցից ընդ պարիսպս:
Աստուա՛ծ իմ, ամբիծ են ճանապարհք Քո, եւ բանք Տեառն ընտրեալ են եւ ապաւէն ամենեցուն, որք յուսան ի Նա:
Վասն զի ո՞վ է Աստուած բաց ի Տեառնէ կամ ո՞վ է Աստուած բաց յԱստուծոյ մերմէ:
Աստուա՛ծ, որ զգեցուցեր ինձ զօրութիւն եւ եդիր յամբծութեան զճանապարհս իմ:
Հաստատեցեր զոտս իմ որպէս զեղջերուի եւ ի վերայ բարձանց կացուցեր զիս:
Ուսուցեր զձեռս իմ ի պատերազմ եւ արարեր զբազուկ իմ որպէս զաղեղն հաստ եւ ետուր ինձ զպաշտպանութիւն փրկութեան Քո:
Աջ Քո ընկալաւ զիս, եւ խրատ Քո կանգնեաց զիս ի սպառ եւ խրատ Քո ուսուսցէ զիս:
Ընդարձակեցեր զգնացս իմ ի ստորեւ իմով, եւ ոչ տկարացան շաւիղք իմ:
Հալածեցից զթշնամիս իմ եւ հասից նոցա եւ ոչ դարձայց ի նոցանէ, մինչեւ սպառեցից զնոսա:
Նեղեցից զնոսա, եւ այլ մի՛ կարասցեն կալ եւ անկցին ի ներքոյ ոտից իմոց:
Զգեցուցեր ինձ զօրութիւն ի պատերազմի, զյարուցեալսն ի վերայ իմ ի ներքոյ իմ արարեր:
Զթշնամիս իմ հալածականս արարեր եւ զատելիս իմ սատակեցեր:
Աղաղակեցին, եւ ոչ ոք էր, որ փրկէր զնոսա. կարդացին առ Տէր, եւ ոչ լուաւ նոցա:
Մանրեցից զնոսա որպէս փոշի առաջի հողմոյ, որպէս կաւ գռեհաց կոխեցից զնոսա:
Փրկեսցէ զիս Տէր ի հակառակութենէ ժողովրդոց եւ կացուսցէ զիս գլուխ հեթանոսաց:
Ժողովուրդ, զոր ոչ գիտէի, ծառայեաց ինձ եւ ի լուր ականջաց լուաւ ինձ:
Որդիք օտարաց ստեցին ինձ, որդիք օտարաց մաշեցան եւ կաղացան ի շաւղաց իւրեանց:
Կենդանի է Տէր, եւ օրհնեալ է Աստուած. եւ բարձր եղիցի Աստուած փրկութեան իմոյ:
Աստուած է, որ խնդրէ զվրէժ իմ եւ հնազանդ առնէ զժողովուրդս ընդ ինեւ:
Փրկիչ իմ ի թշնամեաց իմոց բարկացողաց, յայնցանէ, որ յարուցեալ են ի վերայ իմ, բարձր արարեր զիս եւ յառնէ անիրաւէ փրկեցեր զիս:
Վասն այսորիկ խոստովան եղէց Քեզ ի հեթանոսս եւ անուան Քում սաղմոս ասացից:
Մեծ արարեր զփրկութիւն թագաւորի Նորա՝ առնել ողորմութիւն ընդ օծելոյ Նորա ընդ Դաւթի եւ ընդ զաւակի նորա ազգէ մինչեւ յազգ:

ՍԱՂՄՈՍ ԺԸ
Երկինք պատմեն զփառս Աստուծոյ, եւ զարարածս ձեռաց Նորա պատմէ հաստատութիւն:
Օր աւուր բղխէ զբան, եւ գիշեր գիշերի ցուցանէ զգիտութիւն:
Ոչ են բանք, եւ ոչ են խօսք, որոց ոչ լսին ձայնք նոցա:
Ընդ ամենայն երկիր ել բարբառ նոցա, մինչեւ ի ծագս աշխարհի են խօսք նոցա:
Յարեւու եհար զխորան իւր, եւ ինքն որպէս փեսայ, զի ելանէ յառագաստէ իւրմէ, ցնծայ նա որպէս սկայ յընթանալ զճանապարհս իւր:
Ի ծագաց երկնից են ելք նորա, հանգիստ նորա մինչեւ ի ծագս նորուն. եւ ոչ ոք իցէ, որ թաքիցէ ի տապոյ նորա:
Օրէնք Տեառն ամբիծ են եւ դարձուցանեն զհոգիս. վկայութիւն Տեառն հաւատարիմ է եւ իմաստուն առնէ զտղայս:
Արդարութիւնք Տեառն ուղիղ են եւ ուրախ առնեն զսիրտս. պատուիրանք Տեառն լոյս են եւ լոյս տան աչաց, երկիւղ Տեառն սուրբ է եւ մնայ յաւիտեան:
Դատաստան Տեառն ճշմարիտ է եւ արդար ի նոյն:
Ցանկալի է նա քան զոսկի եւ քան զականս պատուականս բազումս, քաղցր է նա քան զմեղու խորիսխ:
Քանզի ծառայ Քո պահէսցէ զայս ի պահել նմա հատուցումն բազում:
Զյանցուածս իւր ո՞վ կարէ առնուլ ի միտ. ի գաղտնեաց իմոց սո՛ւրբ արա զիս, Տէ՛ր, եւ յօտարէն պահեա՛ զծառայս Քո:
Ապա թէ ոչ՝ տիրեսցեն ինձ. յայնժամ ամբիծ եղէց եւ սուրբ եղէց ի մեղաց մեծաց:
Եղիցին Քեզ հաճոյ բանք բերանոյ իմոյ եւ խորհուրդք սրտի իմոյ առաջի Քո յամենայն ժամ. Տէր օգնական իմ եւ փրկիչ իմ:

ՄԵՍԵԴԻ ՃԱՇՈՒ

Կցորդ. Տեսին ամենայն ծագք երկրի զփրկութիւն Աստուծոյ մերոյ:
Օրհնեցէ՛ք զՏէր յօրհնութիւն նոր, զի սքանչելիս արար:


ՍԱՂՄՈՍ ՂԲ
Ալէլուիա, ալէլուիա:
Տէր թագաւորեաց, զվայելչութիւն զգեցաւ, զգեցաւ Տէր զզօրութիւն, ընդ մէջ Իւր էած:
Հաստատեաց զաշխարհ, զի մի՛ սասանեսցի. պատրաստ է աթոռ Քո ի սկզբանէ, յաւիտեանս Դու ես:
Ամբարձան գետք, Տէ՛ր, եւ ամբարձին գետք զձայնս իւրեանց. եւ յարիցեն գետք ի գնացս իւրեանց:
Ի ձայնէ ջուրց բազմաց սքանչելի եղեն զբօսանք ծովու:
Սքանչելի ես Դու, Տէ՛ր, ի բարձունս. վկայութեանց Քոց մեք յոյժ հաւատացաք:
Տան Քում վայել է սրբութիւն, Տէ՛ր, ընդ երկայն աւուրս:

Փա՜ռք Քեզ, Տէր Աստուա՛ծ մեր:

ՀԱՆԳԱՆԱԿ ՆԻԿԻԱԿԱՆ

Հաւատամք ի Մի Աստուած՝ ի Հայրն ամենակալ, յԱրարիչն երկնի եւ երկրի, երեւելեաց եւ աներեւութից: Եւ ի Մի Տէր Յիսուս Քրիստոս՝ յՈրդին Աստուծոյ՝ ծնեալն յԱստուծոյ Հօրէ միածին, այսինքն՝ յէութենէ Հօր: Աստուած յԱստուծոյ, Լոյս ի Լուսոյ, Աստուած ճշմարիտ յԱստուծոյ ճշմարտէ՝ ծնունդ եւ ոչ արարած: Նոյն Ինքն ի բնութենէ Հօր, Որով ամենայն ինչ եղեւ յերկինս եւ ի վերայ երկրի՝ երեւելիք եւ աներեւոյթք: Որ յաղագս մեր մարդկան եւ վասն մերոյ փրկութեան իջեալ յերկնից՝ մարմնացաւ, մարդացաւ, ծնաւ կատարելապէս ի Մարիամայ սրբոյ Կուսէն Հոգւովն Սրբով: Որով էառ զմարմին, զհոգի եւ զմիտ եւ զամենայն, որ ինչ է ի մարդ՝ ճշմարտապէս եւ ոչ կարծեօք: Չարչարեալ, խաչեալ, թաղեալ, յերրորդ աւուր յարուցեալ, ելեալ ի յերկինս նովին մարմնովն՝ նստաւ ընդ աջմէ Հօր: Գալոց է նովին մարմնովն եւ փառօք Հօր ի դատել զկենդանիս եւ զմեռեալս, Որոյ թագաւորութեանն ոչ գոյ վախճան: Հաւատամք եւ ի Սուրբ Հոգին՝ յանեղն եւ ի կատարեալն, որ խօսեցաւ յՕրէնս եւ ի Մարգարէս եւ յԱւետարանս. որ էջն ի Յորդանան, քարոզեաց յառաքեալսն եւ բնակեցաւ ի սուրբսն: Հաւատամք եւ ի մի միայն ընդհանրական եւ յառաքելական սուրբ Եկեղեցի. ի մի մկրտութիւն, յապաշխարութիւն, ի քաւութիւն եւ ի թողութիւն մեղաց, ի յարութիւնն մեռելոց, ի դատաստանն յաւիտենից հոգւոց եւ մարմնոց, յարքայութիւնն երկնից եւ ի կեանսն յաւիտենականս:

Մինչեւ ցաստ են հաւատոյ բանք:

Իսկ որք ասեն՝ էր երբեմն, յորժամ ոչ էր Որդի, կամ՝ էր երբեմն, յորժամ ոչ էր Սուրբ Հոգի, կամ թէ՝ յոչէից եղեն, կամ՝ յայլմէ էութենէ ասեն լինիլ զՈրդին Աստուծոյ եւ կամ զՍուրբ Հոգին, եւ թէ՝ փոփոխելիք են կամ այլայլելիք, զայնպիսիսն նզովէ կաթողիկէ եւ առաքելական Եկեղեցի:

Ի սրբոյ Լուսաւորչէն մերմէ ասացեալ.
Իսկ մեք փառաւորեսցուք, որ յառաջ քան զյաւիտեանս, երկիր պագանելով Սրբոյ Երրորդութեանն եւ Միոյ Աստուածութեանն՝ Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. ամէն:

ՔԱՐՈԶ
Եւ եւս խաղաղութեան զՏէր աղաչեսցուք:
Եւ եւս հաւատով աղաչեսցուք եւ խնդրեսցուք ի Տեառնէ Աստուծոյ եւ ի Փրկչէն մերմէ Յիսուսէ Քրիստոսէ ի ժամուս պաշտաման եւ աղօթից, զի արժանի ընդունելութեան արասցէ, լուիցէ Տէր ձայնի աղաչանաց մերոց, ընկալցի զխնդրուածս սրտից մերոց, թողցէ զյանցանս մեր, ողորմեսցի ի վերայ մեր: Աղօթք մեր եւ խնդրուածք յամենայն ժամ մտցեն առաջի մեծի տէրութեան Նորա, եւ Նա տացէ մեզ միաբան միով հաւատով եւ արդարութեամբ վաստակիլ ի գործս բարեաց, զի զողորմութեան զշնորհն Իւր արասցէ ի վերայ մեր Տէրն ամենակալ, կեցուսցէ եւ ողորմեսցի:
Զժամս եւ զառաջիկայ օրս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Տէ՛ր մեր եւ Փրկիչ Յիսո՛ւս Քրիստոս, որ մեծդ ես ողորմութեամբ եւ առատ՝ պարգեւօք բարերարութեան Քո, որ Դու Քոյին կամաւդ ի ժամուս յայսմիկ համբերեցեր չարչարանաց խաչի եւ մահու յաղագս մեղաց մերոց եւ պարգեւեցեր առատապէս զպարգեւս Հոգւոյդ Սրբոյ երանելի առաքելոցն, հաղո՛րդս արա եւ զմեզ, Տէ՛ր, աղաչեմք զՔեզ, աստուածային պարգեւացդ, թողութեան մեղաց եւ ընդունելութեան Հոգւոյդ Սրբոյ. որպէս զի արժանաւորք եղիցուք գոհութեամբ փառաւորել զՔեզ ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Խաղաղութեամբ Քով, Քրիստոս Փրկի՛չ մեր, որ ի վեր է քան զամենայն միտս եւ զբանս, ամրացո՛ զմեզ եւ աներկի՛ւղ պահեա յամենայն չարէ: Հաւասարեա՛ զմեզ ընդ ճշմարիտ երկրպագուս Քո, որք Հոգւով եւ ճշմարտութեամբ Քեզ երկիր պագանեն: Վասն զի Ամենասուրբ Երրորդութեանդ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:
Օրհնեալ Տէր մեր Յիսուս Քրիստոս:
Տէր Աստուած օրհնեսցէ զամենեսեանդ. ամէն:

Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Դպ. Միայն Սուրբ, միայն Տէր, Յիսուս Քրիստոս՝ ի փառս Աստուծոյ Հօր. ամէն:
Քհ. Օրհնեալ Հայր Սուրբ՝ Աստուած ճշմարիտ:
Դպ. Ամէն:
Քհ. Օրհնեալ Որդիդ Սուրբ՝ Աստուած ճշմարիտ:
Դպ. Ամէն:
Քհ. Օրհնեալ Հոգիդ Սուրբ՝ Աստուած ճշմարիտ:
Դպ. Ամէն:
Քհ. Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Դպ. Հայր Սուրբ, Որդիդ Սուրբ, Հոգիդ Սուրբ:
Քհ. Օրհնութի՜ւն Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Դպ. Եղիցի անուն Տեառն օրհնեալ յայսմ հետէ մինչեւ յաւիտեան: (Երիցս կրկնեա՛)
Քհ. Կատարումն Օրինաց եւ Մարգարէից Դու ես, Քրիստո՛ս Աստուած Փրկիչ մեր, որ լցեր զամենայն հայրակամ տնօրէնութիւնս Քո. լի՛ց եւ զմեզ Հոգւովդ Քով Սրբով:
Սրկ. Օրհնեցից զՏէր յամենայն ժամ, յամենայն ժամ օրհնութիւն Նորա՝ ի բերան իմ:
Քհ. Օրհնեա՛լ եղերուք ի շնորհաց Սուրբ Հոգւոյն, երթա՛յք խաղաղութեամբ, եւ Տէր եղիցի ընդ ձեզ՝ ընդ ամենեսեանդ. ամէն: