русский  english    
ԵԿԵՂԵՑԱԿԱՆ ՕՐԱՑՈՒՅՑ
ԵԿԵՂԵՑԱԿԱՆ ՕՐԱՑՈՒՅՑ / ԺԱՄԱԿԱՐԳՈՒԹՅՈՒՆ / ԱՌԱՒՕՏԵԱՆ ԺԱՄ
30 հունիսի 2020թ. երեքշաբթի, ԴԿ
Սրբոցն Դանիելի մարգարէին եւ երից մանկանցն Սեդրակայ, Միսաքայ եւ Աբեդնագովի

Կարգաւորութիւն հասարակաց աղօթից Առաւօտու ժամուն,
որ կատարի ի դէմս Որդւոյն Աստուծոյ, որ երեւեցաւ իւղաբերիցն



Օրհնեալ Տէր մեր Յիսուս Քրիստոս. ամէն:


Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

Լցաք առաւօտու ողորմութեամբ Քով, ցնծացաք եւ ուրախ եղաք զամենայն աւուրս կենաց մերոց:
Ուրախ եղաք փոխանակ աւուրցն, յորս խոնարհ արարեր զմեզ, եւ ամացն՝ յորս տեսաք զչարչարանս:
Հայեա՛, Տէ՛ր, ի ծառայս Քո եւ ի գործս ձեռաց Քոց եւ առաջնորդեա՛ որդւոց նոցա. եղիցի լոյս Տեառն Աստուծոյ ի վերայ մեր:
Զգործս ձեռաց մերոց ուղի՛ղ արա ի մեզ, Տէ՛ր, եւ զգործս ձեռաց մերոց յաջողեա՛ մեզ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Եւ եւս խաղաղութեան զՏէր աղաչեսցուք. ընկա՛լ, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՕՐՀՆՈՒԹԻՒՆ ԵՐԻՑ ՄԱՆԿԱՆՑՆ
Օրհնեալ ես, Տէ՛ր Աստուած հարցն մերոց, գովեալ եւ փառաւորեալ է անուն Քո յաւիտեան:
Յիրաւունս անցուցեր զայս ամենայն ընդ մեզ. արդար ես Դու, Տէ՛ր, եւ ամենայն գործք Քո ճշմարիտ են:
Ճանապարհք Քո ուղիղ են, եւ ամենայն դատաստանք Քո արդար են:
Դատաստան արդարութեան ածեր ի վերայ մեր ըստ ամենայնի, զոր ինչ ածեր ի վերայ մեր, եւ քաղաքի սրբոյ հարցն մերոց Երուսաղեմի:
Արդարութեամբ եւ յիրաւի ածեր զայս ամենայն ի վերայ մեր վասն մեղաց մերոց:
Անօրինեցաք եւ յանցեաք ապստամբ լինիլ ի Քէն, մեղաք յամենայնի եւ պատուիրանաց Քոց մեք ոչ անսացաք:
Ոչ պահեցաք եւ ոչ արարաք, որպէս պատուիրեցեր Դու մեզ, զի զբարիս գտցուք մեք ի Քէն:
Արդ, զամենայն, զոր արարեր եւ զոր ինչ ածեր ի վերայ մեր, արդար դատաստանաւ արարեր:
Մատնեցեր զմեզ ի ձեռս թշնամեաց մերոց՝ անօրինաց, խստաց եւ ապստամբողաց:
Ի ձեռս թագաւորի անօրինի եւ չարի քան զամենայն երկիր մատնեցեր զմեզ:
Եւ արդ, ոչ գոյ մեզ ժամ բանալ զբերանս մեր, զի ամօթ եւ նախատինք եղաք ծառայից Քոց եւ պաշտօնէից:
Այլ մի՛ մատներ զմեզ ի սպառ վասն անուան Քո, մի՛ ցրեր զուխտս Քո եւ մի՛ ի բացեայ առներ զողորմութիւնս Քո ի մէնջ:
Վասն Աբրահամու սիրելւոյ Քո, Իսահակայ ծառայի Քո եւ Իսրայելի սրբոյ Քո:
Խոստացար նոցա եւ ասացեր. «Բազմացուցից զզաւակ ձեր որպէս զաստեղս երկնից բազմութեամբ եւ որպէս զաւազ առ ափն ծովու»:
Եւ արդ, Տէ՛ր, նուազեցաք մեք քան զամենայն ազգս եւ եմք տառապեալ յամենայն երկրի այսօր վասն մեղաց մերոց:
Ոչ գոյ ի ժամանակի յայսմիկ իշխան, մարգարէ եւ առաջնորդ. ո՛չ ողջակէզք պատարագաց, ո՛չ խունկք օրինաց եւ ո՛չ տեղի պատարագս մատուցանելոյ առաջի Քո եւ զողորմութիւն գտանել ի Քէն:
Այլ անձամբք խոնարհեալ եւ հոգւով տառապանաց ընդունելի լիցուք մեք որպէս զողջակէզս խոյոց եւ զուարակաց եւ որպէս բիւրաւորս գառանց պարարտաց:
Այնպէս ընդունելի լիցին պատարագք մեր այսօր առաջի Քո, զի կատարեալ գտցուք զկնի Քո, զի չիք ամօթ յուսացելոցս ի Քեզ:
Եւ արդ, գամք զհետ Քո ամենայն սրտիւք մերովք, երկնչիմք ի Քէն եւ խնդրեմք զերեսս Քո. Տէ՛ր, մի՛ յամօթ առներ զմեզ:
Այլ արա՛ առ մեզ ըստ հեզութեան Քում եւ ըստ բազում ողորմութեան Քում. փրկեա՛ զմեզ վասն սքանչելեաց Քոց, Տէ՛ր, եւ փառաւորեսցի անուն Քո յաւիտեան:
Յամօթ լիցին ամենեքեան, որք չարչարեն զծառայս Քո. ամաչեցեալ լիցին բռնութիւնք նոցա, եւ ամենայն զօրութիւնք նոցա խորտակեսցին:
Եւ ծանիցեն, զի Դու ես Տէր Աստուած միայն, որ փառաւորեալդ ես ի վերայ ամենայն տիեզերաց:
Օրհնեալ ես Դու, Տէ՛ր Աստուած հարցն մերոց, գովեալ եւ առաւել բարձրացեալ յաւիտեան:
Եւ օրհնեալ է անուն սուրբ փառաց Քոց, գովեալ եւ առաւել բարձրացեալ յաւիտեան:
Օրհնեալ ես ի տաճարի փառաց սրբութեան Քո, գովեալ եւ առաւել բարձրացեալ յաւիտեան:
Օրհնեալ ես ի վերայ աթոռոյ արքայութեան Քո, գովեալ եւ առաւել բարձրացեալ յաւիտեան:
Օրհնեալ ես, որ նստիս ի քերովբէս եւ հայիս յանդունդս, գովեալ եւ առաւել բարձրացեալ յաւիտեան:
Օրհնեալ ես ի վերայ հաստատութեան երկնից, գովեալ եւ առաւել բարձրացեալ յաւիտեան:
Օրհնեցէ՛ք, ամենայն գո՛րծք Տեառն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, երկի՛նք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, հրեշտա՛կք Տեառն եւ ջո՛ւրք, որ ի վերայ երկնից, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, զօրութի՛ւնք Տեառն, արեգա՛կն եւ լուսի՛ն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, աստե՛ղք երկնից, անձրե՛ւք եւ ցօ՛ղք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, ամենայն հո՛ղմք, հո՛ւր եւ ջե՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, ցո՛ւրտ եւ տօ՛թ, ցօ՛ղ եւ ձիւնաբե՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, սա՛ռն եւ պա՛րզ, եղեա՛մն եւ ձի՛ւն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, տի՛ւք եւ գիշե՛րք, լո՛յս եւ խաւա՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, ա՛մպք եւ փայլատակո՛ւնք եւ երկի՛ր, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, լերի՛նք եւ բլո՛ւրք եւ ամենայն բո՛յսք երկրի, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, աղբի՛ւրք, ծո՛վք եւ գե՛տք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, կէ՛տք եւ ամենայն կայտա՛ռք, որ ի ջուրս, եւ թռչո՛ւնք երկնից, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, գազա՛նք եւ անասո՛ւնք եւ որդի՛ք մարդկան, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեսցէ Իսրայէլ զՏէր, օրհնեսցէ եւ բարձր արասցէ զՆա յաւիտեան:
Օրհնեցէ՛ք, քահանա՛յք, զՏէր. օրհնեցէ՛ք եւ բա՛րձր արարէք զՆա յաւիտեան
Օրհնեցէք, ծառա՛յք Տեառն, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, անձի՛նք եւ շո՛ւնչք արդարոց, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, սո՛ւրբք եւ խոնա՛րհք սրտիւք, զՏէր. օրհնեցէ՛ք եւ բա՛րձր արարէք զՆա յաւիտեան:
Օրհնեցէ՛ք, Անանիա՛, Ազարիա՛ եւ Միսայէ՛լ, զՏէր. օրհնեցէ՛ք եւ բա՛րձր արարէք զՆա յաւիտեան:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՄԱՂԹԱՆՔ
Օրհնեցէ՛ք, ամենա՛յն արարածք, զԱրարիչն արարածոց, զՏէրն տերանց, զԹագաւորն թագաւորաց, զԱստուածն աստուածոց:
Օրհնեցէ՛ք, գովեցէ՛ք, բարեբանեցէ՛ք, զի քաղցր է, զի յաւիտեան է ողորմութիւն Նորա:

«ՀԱՐՑ» ՇԱՐԱԿԱՆ

(Հրց. Համօրէն մարտիրոսաց ակ. Բ.)


Որ Բարձրեալդ ես եւ ի սուրբս հանգուցեալ, զՔեզ բարեբանեմք, Աստուա՛ծ հարցն մերոց:
Որ զսիրելիս Քո զերիս մանկունսն անապականս պահեցեր ի հրոյն, զՔեզ բարեբանեմք, Աստուա՛ծ հարցն մերոց:
Որ ցուցեր զզօրութիւն Աստուածութեանդ Քո չար եւ անօրէն թագաւորին, զՔեզ բարեբանեմք, Աստուա՛ծ հարցն մերոց:
Գ. ԶՏէ՛ր օրհնեցէք եւ բա՛րձր արարէք զՆա յաւիտեան:
Որք մատնեցին զանձինս իւրեանց տանջանաց եւ դասակից եղեն վերին զուարթնոցն, ընդ նոսին զՏէ՛ր օրհնեցէք եւ բա՛րձր արարէք զՆա յաւիտեան:
Ընդ կամաւոր չարչարանս սրբոց վկայիցն, քահանա՛յք եւ ժողովո՛ւրդ, բարեբանեցէ՛ք զանմահ Թագաւորն զՔրիստոս եւ բա՛րձր արարէք զՆա յաւիտեան:

ՔԱՐՈԶ
Եկեալքս ամենեքեան ի սուրբ, կաթողիկէ եւ առաքելական Եկեղեցի աղաչեսցուք զՄիածին Որդին Աստուծոյ՝ զՏէրն մեր եւ զՓրկիչն Յիսուս Քրիստոս, որ էջ փառօք Հօր ի մէջ հնոցին եւ փրկեաց զերիս մանկունսն ի Քաղդէացւոց անտի. լուսաւոր եւ սուրբ պահեսցէ զմիտս մեր, զի մի՛ երբեք խաբիցուք մեք ի մեղաց եւ ի ցանկութենէ աշխարհի: Այլ արժանի եղիցուք պահել զպատուիրանս Նորա, առնուլ զպսակն լուսոյ եւ կենաց ի յանձինս մեր, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս՝ Տէր մեր. կեցո՛ եւ ողորմեա՛:

ՄԱՂԹԱՆՔ
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ցօղեա՛, Տէ՛ր, զցօղ բարերար ողորմութեան Քո ի մեղուցեալ անձինս մեր, շիջո՛ զբոց հնոցի յանցանաց մերոց եւ փրկեա՛ զմեզ ի յաւիտենական հրոյն:
Արա՛ արժանի ընդ երիս սուրբ մանկունսն եւ ընդ երանելի սուրբ վկայսն օրհնել զՔեզ, գովել եւ Քեզ գոհութիւն եւ փառս մատուցանել Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԵՐԳ ՄԱՐԻԱՄՈՒ ԱՍՏՈՒԱԾԱԾՆԻՆ
Մեծացուսցէ անձն իմ զՏէր, եւ ցնծասցէ հոգի իմ Աստուծով Փրկչաւ իմով:
Այց արար ի վերայ խոնարհութեան աղախնոյ Իւրոյ. այսուհետեւ երանիցեն ինձ ամենայն ազգք:
Արար ընդ իս մեծամեծս Հզօրն. եւ Սուրբ է անուն Նորա:
Ողորմութիւն արար ազգաց յազգս երկիւղածաց Իւրոց, արար զօրութիւն բազկաւ Իւրով:
Ցրուեաց զամբարտաւանս ի մտաց սրտից եւ քակեաց զհզօրս յաթոռոց:
Զխոնարհս բարձրացոյց, զկարօտս ելից բարութեամբ եւ զմեծատունս արձակեաց ունայնս:
Պաշտպանեաց Իսրայելի ծառայի Իւրոյ՝ յիշելով զողորմութիւն Իւր:
Որպէս խօսեցաւ առ հարսն մեր ընդ Աբրահամու եւ զաւակի նորա յաւիտեան:

ՕՐՀՆՈՒԹԻՒՆ ԶԱՔԱՐԻԱՅԻ՝ ՀՕՐՆ ՅՈՎՀԱՆՆՈՒ ՄԿՐՏՉԻ
Օրհնեալ Տէր Աստուած Իսրայելի, որ յայց ել եւ արար փրկութիւն ժողովրդեան Իւրոյ:
Յարոյց մեզ եղջիւր փրկութեան ի տանէ Դաւթի ծառայի Իւրոյ, որպէս խօսեցաւ բերանովք սրբոցն, որ յաւիտենից մարգարէքն էին:
Փրկութիւն ի թշնամեաց մերոց եւ ի ձեռաց ամենայն ատելեաց մերոց:
Առնել ողորմութիւն առ հարս մեր եւ յիշել զկտակարանս սրբութեան Իւրոյ:
Երդումն, զոր երդուաւ Աբրահամու հօր մերոյ՝ տալ մեզ առանց երկիւղի զփրկութիւն թշնամեաց մերոց:
Պաշտել զՆա սրբութեամբ եւ արդարութեամբ առաջի Նորա զամենայն աւուրս կենաց մերոց:
Եւ դու, մանո՛ւկ, մարգարէ Բարձրելոյն կոչեսջիր, գնասցես առաջի Տեառն՝ պատրաստել զճանապարհս Նորա, տալ զգիտութիւն փրկութեան ժողովրդեան Իւրոյ՝ ի թողութիւն ամենայն մեղաց մերոց, վասն գթոյ ողորմութեան Տեառն Աստուծոյ մերոյ, որով երեւեցաւ մեզ Արեգակն ի բարձանց՝ լուսաւոր առնել զխաւար մեր, ծագել լոյս ի վերայ այսոցիկ, որ նստէաք ի խաւարի եւ ի ստուերս մահու, ուղղել զոտս մեր ի ճանապարհս խաղաղութեան:

ԱՂՕԹՔ ՍԻՄԷՈՆԻ ԾԵՐՈՒՆՒՈՅՆ
Արդ արձակեա զծառայս Քո, Տէ՛ր, ըստ բանի Քում ի խաղաղութիւն, զի տեսին աչք իմ զփրկութիւն Քո, զոր պատրաստեցեր առաջի ամենայն ժողովրդոց. լոյս յայտնեցաւ հեթանոսաց եւ փառք՝ ժողովրդեան Քում Իսրայելի:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՄԵԾԱՑՈՒՍՑԷ» ՇԱՐԱԿԱՆ

(Մեծ. ակ.)


Անարա՛տ տաճար, բնակարա՛ն անբաւ Բանին Աստուծոյ, Մարիամ սո՛ւրբ Կոյս, զքեզ եւ զԾնեալն ի քէն մեծացուցանեմք։
Յարգանդի կրեցեր, որ յառաջ քան զյաւիտեանս ի Հօրէ զԲանն, եւ ծնար մարմնով. զքեզ եւ զԾնեալն ի քէն մեծացուցանեմք։
Արդ, խնդրեմք ի քէն. անդադար բարեխօսեա՛ վասն անձանց մերոց առ Որդին Քո Միածին փրկել զմեզ ի փորձութենէ եւ յամենայն վտանգից մերոց։

ՔԱՐՈԶ
Սուրբ զԱստուածածինն եւ զամենայն սուրբս բարեխօս արասցուք առ Հայր ի յերկինս, զի կամեցեալ ողորմեսցի եւ գթացեալ կեցուսցէ զարարածս Իւր:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Ընկա՛լ, Տէ՛ր, զաղաչանս մեր բարեխօսութեամբ սուրբ Աստուածածնին՝ անարատ ծնողի Միածնի Որդւոյ Քո, եւ աղաչանօք ամենայն սրբոց Քոց եւ որոց այսօր է յիշատակ: Լո՛ւր մեզ, Տէ՛ր, եւ ողորմեա՛: Ներեա՛, քաւեա՛ եւ թո՛ղ զմեղս մեր: Արժանաւորեա՛ գոհութեամբ փառաւորել զՔեզ ընդ Որդւոյ եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ Ծ
Ողորմեա՛ ինձ, Աստուա՛ծ, ըստ մեծի ողորմութեան Քում, ըստ բազում գթութեան Քում քաւեա՛ զանօրէնութիւնս իմ:
Առաւե՛լ լուա զիս յանօրէնութենէ իմմէ եւ ի մեղաց իմոց սո՛ւրբ արա զիս:
Զանօրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ:
Քեզ միայն մեղայ, Տէ՛ր, եւ չար առաջի Քո արարի,
Որպէս արդար եղիցիս ի բանս Քո եւ յաղթող ի դատել Քեզ:
Անօրէնութեամբ յղացաւ եւ ի մեղս ծնաւ զիս մայր իմ:
Դու, Տէ՛ր, զճշմարտութիւն սիրեցեր, զանյայտս եւ զծածկեալս իմաստութեամբ Քով յայտնեցեր ինձ:
Ցօղեա՛ յիս մշտկաւ, եւ սուրբ եղէց, լուա՛, եւ քան զձիւն սպիտակ եղէց:
Լսելի՛ արա ինձ զցնծութիւն եւ զուրախութիւն, եւ ցնծասցեն ոսկերք իմ տառապեալք:
Դարձո՛ զերեսս Քո ի մեղաց իմոց եւ զամենայն անօրէնութիւնս իմ քաւեա՛ յինէն:
Սիրտ սուրբ հաստատեա՛ յիս, Աստուա՛ծ, եւ հոգի ուղիղ նորոգեա՛ ի փորի իմում:
Մի՛ ընկենուր զիս, Տէ՛ր, յերեսաց Քոց եւ զՀոգի Քո Սուրբ մի՛ հաներ յինէն:
Տո՛ւր ինձ ցնծութիւն փրկութեան Քո եւ հոգւով պետութեան Քո հաստատեա՛ զիս:
Ուսուցից անօրինաց զճանապարհս Քո, եւ ամպարիշտք առ Քեզ դարձցին:
Փրկեա՛ զիս յարենէ, Աստուա՛ծ, Աստուա՛ծ փրկութեան իմոյ. ցնծասցէ լեզու իմ յարդարութեան Քում:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Թէ կամեցեալ էիր, պատարագս մատուցանէաք, բայց Դու ընդ ողջակէզս իսկ ոչ հաճեցար:
Պատարագ Աստուծոյ՝ հոգի խոնարհ. զսիրտ սուրբ եւ զհոգի խոնարհ Աստուած ոչ արհամարհէ:
Բարի՛ արա, Տէ՛ր, կամօք Քովք Սիոնի, եւ շինեսցին պարիսպքն Երուսաղեմի:
Յայնժամ հաճեսցիս ընդ պատարագս արդարութեան, ուխտից պատարագս հանցեն ի սեղան Քո զուարակս:

«ՈՂՈՐՄԵԱ» ՇԱՐԱԿԱՆ

(Ողր. Սրբոց մարգարէից աձ.)


Որ զծածկեալ խորհուրդ կենաց տնօրէնութեանդ Քո, Քրիստո՛ս, ընդհանուր ազգի մարդկան յայտնեցեր մարգարէիւք՝ զծագումն լուսոյ Արեգականդ արդարութեան:
Որք ուսուցին Իսրայելի երկրպագել Քում տէրութեանդ եւ յայտնի քարոզեցին զփրկութիւն հեթանոսաց, եթէ գայ Մեսիա Թագաւոր Իսրայելի:
Որք տաճարի նմանութեամբ ցուցին զարգանդ սուրբ Կուսին, ուստի տուեալ եղեւ մեզ Հաց կենաց անմահութեան, զՈր օրհնեն անդադար երկնային զինուորութիւնքն:

ՔԱՐՈԶ
Երկրպագեմք Քեզ, Տէր Աստուա՛ծ մեր, անցեալքս ընդ երկարութիւն գիշերիս. եւ կանխեալքս ի տեղւոջ խոստովանութեան մատուցանեմք զառաւօտու աղօթս մեր: ԶՔեզ, Տէ՛ր, օրհնեմք եւ փառաւորեմք. եւ զՔէն, Տէ՛ր, գոհանամք, որ արժանի արարեր զգիշերս խաղաղութեամբ անցուցանել եւ հասանիլ ի ժամ առաւօտուս: Արժանաւորեա՛ զմեզ, Տէ՛ր, անճառ խոստմանց Քոց, զոր խոստացար սիրելեաց Քոց, ճշմարի՛տդ Աստուած Յիսուս Քրիստոս, Տէ՛ր մեր. կեցո՛ եւ ողորմեա՛:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ՄԱՂԹԱՆՔ
Բարեխօսութեամբ եւ աղօթիւք սրբոցն Դանիելի մարգարէին եւ երից մանկանցն Սեդրակայ, Միսաքայ եւ Աբեդնագովի, որոց այսօր է յիշատակ, եւ ամենայն սրբոց Քոց լո՛ւր մեզ, Տէ՛ր, եւ ողորմեա՛: Ներեա՛, քաւեա՛ եւ թո՛ղ զմեղս մեր: Արժանաւորեա՛ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԽԸ
Ալէլուիա, ալէլուիա:
Օրհնեցէ՛ք զՏէր յերկնից, օրհնեցէ՛ք զՆա ի բարձանց:
Օրհնեցէ՛ք զՆա, ամենայն հրեշտա՛կք Նորա. օրհնեցէ՛ք զՆա, ամենայն զօրութի՛ւնք Նորա:
Օրհնեցէ՛ք զՆա, արեգա՛կն եւ լուսի՛ն. օրհնեցէ՛ք զՆա, ամենայն աստե՛ղք եւ լո՛յսք:
Օրհնեցէ՛ք զՆա, երկի՛նք երկնից եւ ջո՛ւրք, որ ի վերոյ քան զերկինս:
Օրհնեցէ՛ք զանուն Տեառն, զի Նա ասաց, եւ եղեն. հրամայեաց, եւ հաստատեցան:
Կացոյց զնա յաւիտեանս յաւիտենից. սահման եդ, եւ ոչ անցանեն:
Օրհնեցէ՛ք զՏէր յերկրէ, վիշա՛պք եւ ամենայն խո՛րք,
Հո՛ւր եւ կարկո՛ւտ, ձի՛ւն եւ սա՛ռն, հո՛ղմ եւ մրրի՛կ, որք առնէք զբան Նորա.
Լերի՛նք եւ ամենայն բարձո՛ւնք, ծա՛ռք պտղաբերք եւ ամենայն մա՛յրք.
Գազա՛նք եւ ամենայն անասո՛ւնք, սողո՛ւնք եւ ամենայն թռչո՛ւնք թեւաւորք.
Թագաւո՛րք երկրի եւ զօ՛րք իւրեանց, իշխա՛նք եւ ամենայն դատաւո՛րք երկրի:
Երիտասա՛րդք եւ կուսա՛նք, ծե՛րք եւ տղա՛յք, օրհնեցէ՛ք զանուն Տեառն:
Բարձրացաւ անուն Նորա միայն. խոստովանութիւն Նմա՝ յերկինս եւ յերկրի:
Բարձր առնէ Տէր զեղջիւր ժողովրդեան Իւրոյ. օրհնութիւն Նմա՝ յամենայն սրբոց Նորա, յորդւոցն Իսրայելի ժողովոյն, որ մերձ է առ Տէր:

ՍԱՂՄՈՍ ՃԽԹ
Օրհնեցէ՛ք զՏէր յօրհնութիւն ի նոր. օրհնութիւն Նմա յԵկեղեցիս սրբոց:
Ուրախասցի Իսրայէլ յԱրարիչ իւր, որդիք Սիոնի ցնծասցեն ի Թագաւորն իւրեանց:
Օրհնեցէ՛ք զանուն Նորա օրհնութեամբ. սաղմոսիւք եւ օրհնութեամբ սաղմոս երգեսցեն Նմա:
Հաճի Տէր ընդ ժողովուրդ Իւր սուրբ եւ բարձր առնէ զհեզս ի փրկութեան:
Պարծեսցին սուրբքն փառօք եւ ցնծասցեն ի հանգիստ իւրեանց եւ բարձր արասցեն զԱստուած բերանովք իւրեանց:
Սուր երկսայրի ետ ի ձեռս նոցա՝ առնուլ զհատուցումն ի հեթանոսաց՝ ի յանդիմանութիւն ամենայն ժողովրդոց:
Ի կապել զթագաւորս նոցա կապանօք, զզօրավարս նոցա՝ ձեռնակապօք երկաթեօք.
Առնել նոցա դատաստան ըստ Գրոց. եւ փառք այս են ամենայն սրբոց Նորա:

ՍԱՂՄՈՍ ՃԾ
Օրհնեցէ՛ք զԱստուած ի սրբութեան Նորա. օրհնեցէ՛ք զՆա ի հաստատութեան, ի զօրութեան Նորա:
Oրհնեցէ՛ք զՆա ի զօրութեան Նորա. օրհնեցէ՛ք զՆա ի բազում մեծութեան Նորա:
Օրհնեցէ՛ք զՆա ի ձայն օրհնութեան. օրհնեցէ՛ք զՆա սաղմոսիւք եւ օրհնութեամբ:
Օրհնեցէ՛ք զՆա ցնծութեամբ. գովեցէ՛ք զՆա ուրախութեամբ:
Օրհնեցէ՛ք զՆա ի բանս քաղցր. գովեցէ՛ք զՆա ի բարբառ լսելի:
Օրհնեցէ՛ք զՆա ի ձայն գոհութեան. ամենա՛յն հոգիք, օրհնեցէ՛ք զՏէր:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՏԷՐ ՅԵՐԿՆԻՑ» ՇԱՐԱԿԱՆ

(Տրյ. Սրբոց մարգարէից աձ.)


Երգս առեալ մարգարէիցն՝ հրաշալի ձայնիւ անդադար օրհնաբանեն զՄարմնացեալն ի սուրբ Կուսէն, որ երեւեցաւ մեզ ի փրկութիւն:
Զնեղութիւն եւ զչարչարանս յանձն առին կամաւորապէս, ժուժկալեալ համբերեցին վասն անուանն Տեառն, որ երեւեցաւ մեզ ի փրկութիւն:
Աներկիւղ քարոզեցին յաշխարհի զճշմարիտ մարդեղութիւն Մարմնացելոյն ի սուրբ Կուսէն, որ երեւեցաւ մեզ ի փրկութիւն:

ՕՐՀՆՈՒԹԻՒՆ ԱՌԱՒՕՏՈՒ

Փա՜ռք ի բարձունս Աստուծոյ եւ յերկիր խաղաղութիւն, ի մարդիկ հաճութիւն. եւ օրհնութի՜ւն Քեզ ի բարձունս: Օրհնեալ ես, Տէր Աստուա՛ծ մեր, օրհնեմք զՔեզ եւ գովեմք զՔեզ: Խոստովանիմք, Տէ՛ր, զՔեզ եւ երկիր պագանեմք Քեզ: Փառաւորեմք զՔեզ, գոհանամք, Տէ՛ր, զՔէն վասն մեծի փառաց Քոց: Տէ՛ր Թագաւոր, Սո՛ւրբդ երկնային, Աստուա՛ծ եւ Հա՛յր ամենակալ, Տէ՛ր եւ Որդի՛ Հօր Միածին, Յիսո՛ւս Քրիստոս եւ Սուրբ Որդի՛, Տէ՛ր Աստուած, Գա՛ռն Աստուծոյ եւ Որդի՛ Հօր, որ առեր զմերս ի Կուսէն: Ողորմեցար, բարձեր զմեղս աշխարհի. եւ արդ ընկա՛լ զաղաչանս մեր: Սո՛ւրբդ, որ նստիս ընդ աջմէ Հօր, ողորմեա՛ց մեզ. զի Դու միայն սուրբ, Դու միայն բարձրեալ ես, Դու միայն Տէր մեր Յիսուս Քրիստոս: Տէր եւ Հոգիդ Սուրբ, որ ի փառս Աստուած ընդ Հօր. ամէն:
Եւ յամենայն ժամ օրհնեմք զՔեզ, Տէ՛ր, եւ գովեմք զանուն սուրբ Քո յաւիտեան եւ յաւիտեանս յաւիտենից: Արժանի՛ արա, Տէ՛ր, զօրս զայս խաղաղութեամբ. եւ առանց մեղաց պահեա՛ զմեզ: Օրհնեալ ես, Տէ՛ր Աստուած հարցն մերոց. գովեալ եւ փառաւորեալ է անուն սուրբ Քո յաւիտեանս. ամէն:
Օրհնեա՛լ Տէր, ուսո՛ ինձ զարդարութիւնս Քո: (Երիցս կրկնեա՛)
Տէ՛ր, ապաւէն եղեր մեզ ազգէ յազգ: Ես աղաչեմ, Տէ՛ր, ողորմեա՛ ինձ եւ բժշկեա՛ զանձն իմ. ես մեղայ Քեզ: Ցո՛յց մեզ, Տէ՛ր, զողորմութիւնս Քո. եւ զփրկութիւնս Քո տո՛ւր մեզ: Տէ՛ր, ողորմութիւն Քո յաւիտեան. զգործս ձեռաց Քոց մի՛ անտես առներ: Տէ՛ր իմ, զՔեզ ապաւէն ինձ արարի. ուսո՛ ինձ առնել զկամս Քո, զի Դու ես Աստուած իմ: Ի Քէն է, Տէ՛ր, աղբիւր կենդանութեան, եւ լուսով երեսաց Քոց տեսանեմք զլոյս: Ծագեա՛ զողորմութիւնս Քո, որք ճանաչեն զՔեզ, Տէ՛ր:

ՄԱՂԹԱՆՔ
Փա՜ռք, պատի՜ւ եւ երկրպագութի՜ւն ի բարձունս Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԱՌԱՒՕՏՈՒ ԵՐԳ
Ոչ են բանք, եւ ոչ են խօսք, որոց ոչ լսին ձայնք նոցա:
Յեկեղեցիս բարեբանեցէ՛ք զԱստուած. եւ զՏէր՝ յաղբերացն Իսրայելի:

ՔԱՐՈԶ
ի սրբոյն Գրիգորէ Լուսաւորչէն մերմէ ասացեալ
վասն սրբոց Հռիփսիմեանց, այլ եւ վասն առաքելոց եւ մարգարէից

Աստուա՛ծ մեծ, հզօր եւ փառաւորեալ, լուսաւորի՛չ սրբոց եւ ի սուրբս հանգուցեալ, զճգնութիւն սրբոց առաքելոցն բարեխօս ունիմք առ Քեզ. աղաչեմք:
Լո՛ւր, Տէ՛ր, եւ ողորմեա՛:
Որ անդադար օրհնաբանիս ի դասուց հոգեղինաց երկնաւոր զուարթնոցն, արժանաւորեա՛ զմեզ ուղիղ փառատրութեամբ ընդ սուրբս Քո երկրպագել մեծի եւ ահաւոր տէրութեանդ Քո. աղաչեմք:
Լո՛ւր, Տէ՛ր, եւ ողորմեա՛:
Օրհնեմք զՔեզ միաբան սիրով ի յիշատակս վկայից Քոց, որք հետեւողք եղեն լուսազարդ ճանապարհաց Քոց, Տէ՛ր, որ վասն մեր յանձն առեր զչարչարանս խաչի եւ մահու. աղաչեմք:
Լո՛ւր, Տէ՛ր, եւ ողորմեա՛:
Կատարիչք հաճոյից կամաց Աստուածութեանդ Քո զանձինս իւրեանց պատարագեցին ի վկայութիւն ճշմարիտ սիրոյ Քո եւ բուրեցին զհոտ անուշից տէրութեանդ Քո. աղաչեմք:
Լո՛ւր, Տէ՛ր, եւ ողորմեա՛:
Սրբեցին զանձինս իւրեանց տաճար անուանդ Քում սրբոյ՝ մաքրեալք զմիտս եւ զխորհուրդս իւրեանց երկիւղիւդ Քով սրբով, եւ դասակիցք եղեն հոգեղինաց երկնաւոր զուարթնոցն. աղաչեմք:
Լո՛ւր, Տէ՛ր, եւ ողորմեա՛:
Բարեխօսութեամբ սրբուհւոյ Աստուածածնին եւ Յովհաննու Կարապետին, սրբոյն Ստեփանոսի Նախավկային եւ սրբոց առաքելոց, մարգարէից եւ մարտիրոսաց եւ սրբոյն Գրիգորի մերոյ Լուսաւորչին, բարեխօսութեամբ եւ աղօթիւք սրբոցն Դանիելի մարգարէին եւ երից մանկանցն Սեդրակայ, Միսաքայ եւ Աբեդնագովի, որոց այսօր է յիշատակ, եւ ամենայն սրբոց Քոց, Տէ՛ր, որք միացան ի սէր Աստուածութեանդ Քո, յիշեա՛ զհոգիս ննջեցելոց մերոց եւ ա՛յց արա ի Քում գալստեանդ. աղաչեմք:
Յիշեա՛, Տէ՛ր, եւ ողորմեա՛:
Եւ եւս առաւել զյորդորումն սիրոյ եւ զգործս բարեաց պարգեւել մեզ խնդրեմք:
Տո՛ւր մեզ, Տէ՛ր Աստուած:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Գոհանամք զՔէն, Տէր Աստուա՛ծ մեր, որ երեւելի լուսով Քով զուարճացուցեր զամենայն արարածս Քո, իսկ իմանալի լուսով պատուիրանաց Քոց զամենեսեան լուսաւորեցեր զհաւատացեալս ի Քեզ: Զօրացո՛ եւ զմեզ, Տէ՛ր, ի պահպանութիւն պատուիրանաց Քոց ի տուընջեանս յայսմիկ եւ յամենայն ժամանակի, որպէս զի լուսաւորեալ մտօք միշտ զհաճոյս Քո արասցուք եւ հանդերձեալ բարեացդ հասցուք ընդ ամենայն սուրբս Քո շնորհօք եւ մարդասիրութեամբ Տեառնդ մերոյ եւ Փրկչիդ Յիսուսի Քրիստոսի, Որում վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:

Խաղաղութի՜ւն ամենեցուն:
Աստուծոյ երկրպագեսցուք:

Խաղաղութի՛ւն մեր եւ Կեա՛նք, որ ի Հօրէ առաքեցար, Միածին Որդի՛ Աստուծոյ, Տէ՛ր մեր եւ Փրկիչ Յիսո՛ւս Քրիստոս, տո՛ւր մեզ զխաղաղութիւն Քո, զոր շնորհեցեր սրբոց Քոց առաքելոց փչմամբ Քո ի նոսա զկենդանացուցիչ եւ զամենազօր Հոգիդ Քո Սուրբ. որպէս զի եւ մեք խաղաղացեալք յամենայն աշխարհական սահեցմանց՝ լիցուք տաճար եւ բնակարան աստուածային շնորհացդ եւ գոհանալով փառաւորեսցուք զՔեզ ընդ Հօր եւ Սուրբ Հոգւոյդ, Քրիստոս Աստուա՛ծ մեր, այժմ եւ միշտ եւ յաւիտեանս յաւիտենից. ամէն:

ԵՐԵՔՍՐԲԵԱՆ
Սուրբ Աստուա՛ծ, սուրբ եւ հզօր, սուրբ եւ անմահ, որ խաչեցար վասն մեր. ողորմեա՛ մեզ:
(Երիցս կրկնեա՛)

Փառաւորեալ եւ օրհնեալ, միշտ սուրբ Կոյս Աստուածածի՛ն Մարիամ, մա՛յր Քրիստոսի, մատո՛ զաղաչանս մեր Որդւոյ քո եւ Աստուծոյ մերոյ:

ՄԱՂԹԱՆՔ
Փրկել զմեզ ի փորձութենէ եւ յամենայն վտանգից մերոց:

ՔԱՐՈԶ
Եւ եւս խաղաղութեան զՏէր աղաչեսցուք:
Վասն լսելի լինելոյ Տեառն Աստուծոյ ձայնի աղաչանաց մերոց՝ բարեխօսութեամբ սուրբ Աստուածածնին, եւ իջանելոյ ի վերայ մեր ողորմութեան եւ գթութեան Տեառն Աստուծոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Օրհնութի՜ւն եւ փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԺԲ
Օրհնեցէ՛ք, մանկո՛ւնք, զՏէր. եւ օրհնեցէ՛ք զանուն Տեառն:
Եղիցի անուն Տեառն օրհնեալ յայսմ հետէ մինչեւ յաւիտեան:
Յարեւելից մինչեւ ի մուտս արեւու օրհնեալ է անուն Տեառն:
Բարձր է ի վերայ ամենայն ազգաց Տէր, եւ յերկինս են փառք Նորա:
Ո՞վ է որպէս Տէր Աստուած մեր ի բարձունս բնակեալ եւ զխոնարհս տեսանէ յերկինս եւ յերկրի:
Յարուցանէ զաղքատս յերկրէ եւ բարձր առնէ զտառապեալս յաղբեւաց:
Նստուցանէ զնոսա իշխանս՝ ընդ իշխանս ժողովրդեան Իւրոյ:
Բնակեցուցանէ զամուլն ի տան ուրախամիտ՝ որպէս մայր որդւովք բերկրեալ:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

«ՄԱՆԿՈՒՆՔ» ՇԱՐԱԿԱՆ

(Մնկ. Սրբոց մարգարէից դձ.)


Որ զյառաջագոյն ընտրեալսն առաքեցեր յաշխարհ սուրբ զմարգարէսն՝ աւետարանել զՔո գալուստդ անթարգմանելի տնօրէնութեամբ, սոքօք շնորհեա՛ հաստատութիւն Եկեղեցւոյ Քում սրբոյ:
Որոց ետուր իշխանութիւն բացատրել զիջումն Քո յաշխարհ, աստանօր կատարեցեր զմարգարէիցն զտեսութիւն. սոքօք շնորհեա՛ հաստատութիւն Եկեղեցւոյ Քում սրբոյ:
Որ զմահ գերի առեալ՝ մահուամբ զմահ կոխեցեր՝ արձակելով զերամս մարգարէիցն յանստուեր Քո հանգիստդ, սոքօք շնորհեա՛ հաստատութիւն Եկեղեցւոյ Քում սրբոյ:

ՔԱՐՈԶ
Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ զՏէր աղաչեսցուք. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:

ԱՂՕԹՔ
Սուրբ ես, Տէր Աստուա՛ծ մեր, հզօր եւ փառաւորեալ, որ նստիս ի կառս քերովբէականս եւ լոյս ծագիս յարարածս Քո: Լուսաւորեա՛ զմեզ, Տէ՛ր, ի ժամ առաւօտուս, որպէս զի ի ծագել լուսոյ տուընջեանս ծագեսցի առ մեզ գութ մարդասիրութեան Քո: Հեռացո՛ ի մէնջ, Տէ՛ր, զխաբէութիւն սատանայի եւ զբռնութիւն նորա խորտակեա՛ աղօթիւք եւ բարեխօսութեամբ ամենայն սրբոց: Արա՛ եւ զերկիրս պտղաբեր ի սնունդս ծառայից Քոց, յորոց հանապազ փառաւորեալ գովի Ամենասուրբ Երրորդութիւնդ այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ ՃԺԴ
Սիրեցի, զի լուիցէ Տէր զձայն աղօթից իմոց:
Զի խոնարհեցոյց զունկն Իւր առ իս, եւ ես յաւուրս իմ կարդացի առ Նա:
Շրջեցան զինեւ երկունք մահու, եւ վիշտք դժոխոց գտին զիս:
Զնեղութիւն եւ զանձկութիւն գտի, եւ զանուն Տեառն կարդացի:
Ո՛ Տէր, փրկեա՛ զանձն իմ. ողորմած եւ արդար է Տէր Աստուած մեր:
Ողորմի եւ պահէ զտղայս Տէր. ես խոնարհ եղէ, եւ Տէր կեցոյց զիս:
Դա՛րձ, ա՛նձն իմ, ի հանգիստ քո, զի Տէր օգնեաց քեզ:
Փրկեաց զանձն իմ ի մահուանէ, զաչս իմ՝ յարտասուաց եւ զոտս իմ՝ ի գայթակղութենէ:
Հաճոյ եղէց առաջի Տեառն յերկրին կենդանեաց:

ՍԱՂՄՈՍ ՃԺԵ
Հաւատացի, զոր եւ խօսեցայ, եւ ես խոնարհ եղէ յոյժ:
Ես ասացի ի զարմանալ իմում, թէ ամենայն մարդ սուտ է:
Զի՞նչ տաց տրիտուր Տեառն ընդ ամենայնի, զոր եւ ետ ինձ:
Զբաժակ փրկութեան ընկալայց եւ զանուն Տեառն կարդացից:
Զաղօթս իմ Տեառն տաց առաջի ամենայն ժողովրդեան Նորա:
Պատուական է առաջի Տեառն մահ սրբոց Իւրոց:
Ո՜ Տէր, ես ծառայ Քո եմ, ծառայ եւ որդի աղախնոյ Քո:
Հատեր զկապանս իմ. Քեզ մատուցից պատարագ օրհնութեան եւ զանուն Տեառն կարդացից:
Զաղօթս իմ Տեառն տաց առաջի ամենայն ժողովրդեան Նորա, ի գաւիթս տան Տեառն եւ ի մէջ քո, Երուսաղէ՛մ:

ՍԱՂՄՈՍ ՃԺԶ
Օրհնեցէ՛ք զՏէր, ամենա՛յն ազինք, գովեցէ՛ք զՆա, ամենա՛յն ժողովուրդք:
Զօրասցի ողորմութիւն Նորա ի վերայ մեր, եւ ճշմարտութիւն Տեառն մնասցէ յաւիտեան:

ՍԱՂՄՈՍ ԾԳ
Աստուա՛ծ, յանուան Քում կեցո՛ զիս եւ ի զօրութեան Քում իրա՛ւ արա ինձ:
Աստուա՛ծ, լո՛ւր աղօթից իմոց, ո՛ւնկն դիր բանից բերանոյ իմոյ:
Օտարք յարեան ի վերայ իմ, եւ հզօրք խնդրեցին զանձն իմ եւ ոչ համարեցան զՔեզ Աստուած առաջի իւրեանց:
Ահա Աստուած օգնական իմ, եւ Տէր ընդունելի հոգւոյ իմոյ:
Ի դարձուցանել զչարն ի թշնամիս իմ՝ ճշմարտութեամբ Քով սատակեա՛ զնոսա:
Ես կամօք իմովք պատարագս մատուցից Քեզ եւ խոստովան եղէց անուան Քում, Տէ՛ր, զի բարի է:
Յամենայն նեղութենէ իմմէ փրկեցեր զիս, եւ ի թշնամիս իմ ետես ակն իմ:

ՍԱՂՄՈՍ ՁԵ
Տո՛ւր զօրութիւն ծառայի Քո, կեցո՛ զորդի աղախնոյ Քո եւ արա՛ առ իս նշան բարութեան:
Տեսցեն ատելիք իմ եւ ամաչեսցեն, զի Դու, Տէ՛ր, օգնեցեր ինձ եւ մխիթարեցեր զիս:

Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:

ԵՐԳ ՏԵԱՌՆ ՆԵՐՍԻՍԻ
վասն երրորդի աւուր արարչութեանն
եւ վասն երրորդի դարուն եւ ի Յովհաննէս Մկրտիչն

Երեքշաբթի

Էական Բանն, որ ընդ Հօր
Արարչակից եւ համազօր,
Յերրորդ աւուր զջուրսն զատոյց,
Զբոյսս եւ զտունկս բղխեցոյց.
Իսկ ի յերրորդ դարուն դարձեալ
Զջուրցն հեղեղ ցամաքեցոյց,
ԶՆոյ տապանաւն իւր ապրեցոյց,
Զկենդանեաց սեռս աճեցոյց.
Տո՛ւք օրհնութիւն անճառ Լուսոյն՝
Հօր եւ Որդւոյ եւ Սուրբ Հոգւոյն:

Ընդ ծառոց երկրի զգալեաց
Տնկեաց եւ զտունկս իմանալեաց՝
Զհեղեղ մեղացն ցածուցեալ,
Զդասս արդարոց բազմացուցեալ,
Յորոց եւ մեծն ի ծնունդս կանանց՝
Միջնորդ շնորհաց եւ օրինաց.
Տո՛ւք օրհնութիւն անճառ Լուսոյն՝
Հօր եւ Որդւոյ եւ Սուրբ Հոգւոյն:

Թագաւորին երկնից զինուոր՝
Արքայութեան աւետաւոր,
Խնդրեա՛ դնել ելս ի սրտի
Առ ի հովտէս տրտմականէ
Յուխտեալ տեղին տէրունական՝
Ի խոստացեալն որդւոց մարդկան.
Տո՛ւք օրհնութիւն անճառ Լուսոյն՝
Հօր եւ Որդւոյ եւ Սուրբ Հոգւոյն:

Ժառանգին Հօր սպասաւո՛ր
Եւ յարգանդէ երկրպագող,
Կարապետ եւ մկրտիչ
Այնմ, որ մեղաց մերոց քաւիչ,
Լե՛ր բարեխօս առ նոյն գթած
Ջնջել զգիր մեր յանցանաց.
Տո՛ւք օրհնութիւն անճառ Լուսոյն՝
Հօր եւ Որդւոյ եւ Սուրբ Հոգւոյն:

Ի Հօրէ լոյս ծագեցար
Մեռեալ բնութեանս կենդանարար,
Առաքեցեր յառաջընթաց
Սուրբ զՅովհաննէս քարոզ կենաց.
Սորին հայցմամբ, Ամենակա՛լ,
Զպաղատանս մեր ընկա՛լ.
Տո՛ւք օրհնութիւն անճառ Լուսոյն՝
Հօր եւ Որդւոյ եւ Սուրբ Հոգւոյն:

Լուսաշաւիղ յերկինս ելին
Հողանիւթեայ սուրբ հրեշտակին.
Արժանացո՛ զմեզ նորին
Նեղ եւ անձուկ ճանապարհին,
Զի հետեւողք գոլով նորին
Հօր Քո վերին օթեւանին,
Եւ երգեսցուք ընդ երջանկացն
Որդւոց լուսոյ Քեզ երգս փառաց:

ՄԱՂԹԱՆՔ
Քրիստոս Աստուա՛ծ մեր, վասն սուրբ խաչի Քո պատուականի զխաղաղութիւն Քո տո՛ւր մեզ, Տէ՛ր:
Վասն սրբուհւոյ Աստուածածնին եւ Յովհաննու Կարապետին եւ սրբոյն Ստեփանոսի Նախավկային զխաղաղութիւն Քո տո՛ւր մեզ, Տէ՛ր:
Վասն սրբոց Քոց առաքելոց, մարգարէից, վարդապետաց, մարտիրոսաց, հայրապետաց, ճգնաւորաց, կուսանաց, միանձանց եւ երկնային զօրացն զխաղաղութիւն Քո տո՛ւր մեզ, Տէ՛ր:
Եւ վասն նախկին լուսաւորչացն մերոց Թադէոսի եւ Բարթողիմէոսի եւ սրբոց Յակոբեանց՝ երջանիկ առաքելոցն, եւ սրբոյն Գրիգորի մերոյ Լուսաւորչին եւ սրբոցն Յակոբայ Մծբնայ հայրապետին, Մարուգէի ճգնաւորին, Մելիտոսի եպիսկոպոսին եւ Գէորգայ զօրավարին, բարեխօսութեամբ, յիշատակաւ եւ աղօթիւք սրբոցն Դանիելի մարգարէին եւ երից մանկանցն Սեդրակայ, Միսաքայ եւ Աբեդնագովի, որոց այսօր է յիշատակ, զխաղաղութիւն եւ զմեծ զողորմութիւն Քո պարգեւեա՛ մեզ, մարդասէ՛ր Տէր:

ՔԱՐՈԶ
Սուրբ ճգնաւորօքն աղաչեսցուք զՏէր, որք զչարսն պարտեցին, նեղութեանցն համբերեցին, լուսեղէն եւ երկնային անթառամ պսակացն արժանի եղեն: Աղօթիւք նոցա եւ բարեխօսութեամբ մեզ ողորմեսցի:
Ամենակալ Տէր Աստուա՛ծ մեր, կեցո՛ եւ ողորմեա՛:

ԱՂՕԹՔ
Որ ընտրեցեր եւ ընկալար զերանելի զվկայսն Քո, Քրիստոս Աստուա՛ծ մեր, եւ հաղորդս արարեր զնոսա կամաւոր չարչարանաց Քոց, արդ, բարեխօս առ Քեզ ունիմք, որք աստ եւ ընդ ամենայն տիեզերս սուրբք իցեն. որպէս զի աղօթիւք նոցա եւ բարեխօսութեամբ խաղաղացուսցես զկենցաղավարութիւնս մեր՝ փրկելով զմեզ յերեւելի եւ յաներեւոյթ թշնամւոյն: Շնորհեա՛ մեզ, Տէ՛ր, ըստ օրինակի նոցա կեալ եւ զվախճանն մեր կնքեա՛ ուղղափառ խոստովանութեամբ ի յոյս կենացն յաւիտենից: Զի եւ մեք արժանի եղիցուք մտանել յերկնային խորանսն լուսոյ եւ ժառանգել զպատրաստեալն ի սկզբանէ աշխարհի սրբոց Քոց զարքայութիւնդ. եւ ընդ նոսին գոհանալով փառաւորեսցուք զՔեզ ընդ Հօր եւ ընդ Սրբոյ Հոգւոյդ այժմ եւ միշտ եւ յաւիտեանս յաւիտենից. ամէն:

Ի Սարկաւագ վարդապետէն ասացեալ
Յիշեա՛, Տէ՛ր, զպաշտօնեայս Քո, զծնողսն մեր, զվարդապետս, զեղբարս, զընկերս, զկերակրողս, զուխտաւորս, զճանապարհորդս, զհանգուցիչս, զվաստակաւորս, զխոստովանողս, զապաշխարողս, զգերիս, զհիւանդս, զնեղեալս, զիշխանս, զչարարարս, զբարերարս, զթշնամիս, զատելիս եւ որք պատուիրեցին մեզ հաւատով:

Յիշեա՛, Տէ՛ր, եւ ողորմեա՛:

Բարերար եւ բազումողո՛րմ Աստուած, Քո անմոռաց գիտութեամբդ եւ անբաւ մարդասիրութեամբդ յիշեա՛ զամենայն հաւատացեալս ի Քեզ եւ ողորմեա՛ ամենեցուն: Օգնեա՛ եւ փրկեա՛ յիւրաքանչիւր վտանգից եւ ի փորձութեանց: Արժանաւորեա՛ գոհութեամբ փառաւորել զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:

Օրհնեալ Տէր մեր Յիսուս Քրիստոս. ամէն:


Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:

 
sacredtradition.am