id529Ս. Տրիփոնի և ս. Ոնոփրիոսի հետ իբրև ճգնավոր հիշատակվող այս սրբի մասին ստույգ տեղեկություններ պահպանված չեն: Սակայն մեծ հավանականությամբ այս անունը նույնացվում է ս. Բարսիմեոսի (կամ Բարսամիայի) հետ, որը Եդեսիայի եպիսկոպոսն էր Տրայանոս կայսեր օրոք (98-117): Վկայաբանության համաձայն՝ սուրբ եպիսկոպոսը մեծ եռանդով ու զորությամբ քարոզում ու դարձի էր բերում բազում հեթանոսների, որոնց թվում էին քաղաքի քուրմ Սարբիլիոսն ու նրա քույր Բեբայիան: Միասին մկրտվելով սուրբ եպիսկոպոսի ձեռքով՝ նրանք բացահայտորեն վկայեցին իրենց դարձի մասին և մարտիրոսության պսակի արժանացան: Ձերբակալվեց նաև ս. Պարսամը և ենթարկվեց խստագույն չարչարանքների, սակայն դահիճները չհասցրին կյանքից զրկել նրան, քանի որ վրա հասավ կայսեր՝ ձերբակալված քրիստոնյաներին ազատություն շնորհելու հրամանը: Սուրբ եպիսկոպոսը, շարունակելով իր փրկավետ քարոզչությունը, վախճանվել է խաղաղությամբ: