|
|
18 հունվարի 2022թ. երեքշաբթի, ԱԿ Սրբոցն Անտոնի, Տրիփոնի, Պարսամայ եւ Ոնոփրիոսի ճգնաւորացն Ս. ԱՆՏՈՆ ԱՆԱՊԱՏԱԿԱՆ (250-356) Ս. Անտոն Անապատականը համարվում է անապատականների նախահայրը: Նա ազգությամբ եգիպտացի էր, հարուստ և բարեպաշտ ծնողների զավակ: Փոքր տարիքից սիրում էր հաճախակի առանձնանալ և աղոթել: Ծնողների մահից հետո, 19 տարեկանում, Անտոնը որոշեց հեռանալ աշխարհից և բնակություն հաստատել անապատում: Նրա անօրինակ ճգնությունները և Աստծո հանդեպ մեծ սերը շուտով հարուցեցին դևերի նախանձը, և նրանք սկսեցին զանազան փորձությունների ենթարկել Անտոնին: Սակայն դրանք բոլորն էլ ավարտվեցին նրանց պարտությամբ: Երուսաղեմ, ձեռ. 285, էջ 14ա, Հարանց վարք, 1430 թ., Կաֆա (Ղրիմ) Սկզբում նրանք խորհուրդներ էին ներշնչում ճգնավորական կյանքի դժվարությունների վերաբերյալ ու դրդում վերադառնալ հայրենիք, բայց Անտոնը աղոթքի զորությամբ հաղթահարեց դրանք: Այնուհետև դևերը փորձեցին աղտեղի ցանկություններ գրգռել նրա մեջ: Սակայն իմաստուն և աստվածասեր պատանին ավելի էր զորացնում իր աղոթքն ու ճգնությունները: Այսպես ընթանալով՝ ի վերջո նա ձեռք բերեց մեծ զգոնություն և խորհուրդները զանազանելու շնորհ: Սատանան, տեսնելով, որ իր խարդավանքները տկարացնելու փոխարեն առավել զորացնում են Անտոնին, դիմեց իր վերջին հնարքին. նա բազում դևերի հրամայեց հարձակվել Անտոնի վրա և գանահարել նրան: Ու երբ դա էլ չընկճեց սրբին, որոշեց նրան սարսափեցնել գազանների ահարկու կերպարանքներով, որոնք իբրև թե սպառնում էին կործանել Անտոնին: Բայց վերջինս չէր կորցնում իր զգոնությունը և երբեք չէր մոռանում, որ իր հետ է Քրիստոս, Ում առջև անզոր են բոլոր դևերը: Այսպես սատանան մատնվեց վերջնական պարտության, իսկ Անտոնը Տիրոջից այնպիսի զորություն ստացավ, որ այնուհետև ինքն էր հալածում դևերին և սարսափելի էր նրանց համար: Թեև Անտոնը կամենում էր առհասարակ մենակ լինել իր Տիրոջ հետ, բայց նրա ճգնությունների համբավը այնքան տարածվեց, որ բազում մարդիկ իրենց խնդիրներով սկսեցին այցելել նրան: Երանելին բոլորին էլ գոհացնում էր և խնդությամբ տուն ճանապարհում: Բայց նրա միակ փափագը Աստծուն առավել մերձենալն էր, Նրա անսահման սերը վայելելը, ուստի շարունակ հեռանում էր ավելի անմարդաբնակ վայրեր, ուր նրան կարողանում էին այցելել միայն իր օրինակով անապատական դարձած եղբայրները: Նա վախճանվեց շուրջ 105 տարեկանում՝ նախօրոք հայտնությամբ տեղեկանալով իր մահվան մասին: Հոգին ավանդելիս սուրբը խիստ զվարթ էր՝ օտար աշխարհից հայրենիք վերադարձողի նման:  |
